November 06, 2022 Pathianni zing dar 10:00 khan BCM Biak In thar, Shalom, Chawngte ‘P’ chu Rev. R. Lalbiakliana General Secretary-in a hawng a, Biak In hawnna hi Biak In pawn-ah neih a ni a, hemi hnu hian Biak In chhungah lutin Pathian biak inkhawm neih zui nghal a ni. Inkhawm hi Rev LH Lalmalsawma, Bialtu Pastor in a kaihruai a, Upa A Lalhmunsanga, Secretary, Building Committee-in Biak In sak dan leh Kohhran dinhmun tlangpui report a pe a, Biak In hawngtu - General Secretary-in thucah a sawi. Biak in hawnna inkhawm ah hian  Chawngte East Pastor Bial zaipawl leh BCM Shalom Kohhran zaipawl  ten Pathian fakna hla sa in hun an hmang bawk.

Live on YouTube : Khawnvar Channel

Baptist Church of Mizoram, Pastoral Committee Meeting No. 167, November 8 & 9, 2022-a neih chuan Baptist Church of Mizoram hnuaia Pastor hna thawk tur mi 9 a la thar a, a hnuaia hming tarlante hi an ni.

November 6, 2022 Pathianni kha Khawvel Sunday School Ni a ni a. He Ni hi Mizoram Baptist Kohhran tinah hman a ni. Pathianni chawhma inkhawmah thupui ruat sa awm lo mahse Sunday sikul pawimawhna te, Pathian thu zir pawimawhna leh a tangkaina kawng hrang hrang thu chah ngaihthlak a ni a, Sunday Sikul hunah pawh zirlai inang tlang zirin, Sunday Sikul lo intan dan leh a darhzau zel dan te, Sunday School thil tum leh pawimawna te zir a ni bawk.

November Thawhtanni hmasa ber hi khawvel pum huapa Baptist Kohhran inzawmkhawm (Baptist World Alliance) -a, Womens’ Day of Prayer Day (BWA- Hmeichhia te Tawngtai Ni) a ni a. He ni hi kum tin neih thin a ni.  Kuminah pawh November 7 hian khawvel pumah thupui pakhat “Hnehtu nun” (II Korinth 2: 14) tih hmangin tawngtai programme hman a ni a. Mizoram Baptist Kohhran Hmeichhe Pawl (MBKHP) pawhin he ni hi zawm ve-in chawhma dar 10:00 atangin BKHP member ten mahni Unit theuhah Tawngtai programme hi an hmang a ni.

November 4-6, 2022 chhung khan MBKHP Hruaitu te chuan Paithar Pastor Bial, Saizawh ‘E’ Kohhranah Leadership Training leh Seminar an neihpui a, MBKHP Hruaitute Pi P.C. Lalvohbiki, President MBKHP; Pi V. Lalnunziri Executive Committee member leh Pi V. Zothanbuangi Executive Committee member te an kal a ni. Seminar thupuiah ‘Nu mawhphurhna – Chhungkua leh Kohhranah’ tih hman a ni.

November 3, 2022 (ningani)-a Mission Board thukhawm chuan heng a hnuaia tarlan mi 9 te hi Missionary atan a la a. Mi dang 6 panel list ah a dah bawk.

#BCM Central church ten MP & MH field an tlawh October 17-27, 2022 chhung khan BCM Central Church, Aizawl- Member 11 leh Bialtu Pastor Rev. T. Lalsangvunga te chuan Madhya Pradesh & Maharastra Field (Kurku) an tlawh a. October 17-ah Aizawl chhuahsanin October 19 ah Field Headquarters, Dharni tluang takin an thleng a. BCM rawnbawlna Area-a Kohran hrang hrang 8 tlawh kualin rawngbawlna an nei a October 27 khan tluang takin Aizawl an thleng leh a ni.

November 1, 2022 (Thawhlehni) khan Medical & Health Department Committee Meeting, Sap Upa leh Pu Buanga Hall, Serkawnah neih a ni a. Meeting hi Rev. Dr. R. Zolawma, President-in kaihruaiin Director, Mediacl & Health Department Upa Dr. Lalramzuva’n Department report tlangpui ziakin a pe bawk.

Relief  & Development Department kaltlanga kan rawngbawlpui  Canadian Baptist Ministry, India Team leader Rev Dr. S K Komravalli leh a thawhpui CP Raju te chu October 2-4 chhung  khan Headquarters Office tlawhin an lo kal a. BCM Office ah anmahni lo lawmin AGS Service Rev R Lalnunziran anmahni lawmna thu tawi a sawi a, General Secretary Rev R Lalbiaklianan thilpek a hlan bawk.

October 28, 2022 (Zirtawpni) chawhma dar 11:00 khan Christian Education Department Committee Meeting, Sap Upa leh Pu Buanga Hall, Serkawn-ah neih a ni a. Meeting hi Rev. Dr. R. Zolawma, President-in a kaihruai a,  Committee Secretary, Rev. R. Lalbiakliana’n report tlangpui a pe.

November 1-4 chhung khan Eye Care, Aizawl leh Christian Hospital, Serkawn te tangkawpin  Mit entirna runpui (Eye Camp) an buatsaih a. A tan ni-ah mi 9 an zai a, Nilaini, Ningani, leh Zirtawpni-ah te Mit entir leh mit zai hi chhunzawm leh a ni.

October 31, 2022 (Thawhtanni) chawhnu dar 1:00 khan Revival & Evangelism Committee Meeting, Headquarters Office Committee Hall No 1-ah neih a ni a. Committee Chairman Rev. R. Lalbiakliana'n meeting a kaihruai a, Secretary Rev. Vanlalmuankima'n report tlangpui a pe bawk.

October 31, 2022 (Thawhtanni) khan Baptist Higher Secondary School, Serkawn a thawktu te chuan nilengin Intuaitharna (Reatreat) hun an nei a. Chawhma hunah Rev. L. Vanlalsanga, Director Education Department-in Inkhawm kaihruaiin, Pathian hnena inkawltirna a neih bakah fuihna thuchah tawi a sawi a. Hmasawnna tura infuihtharna leh hmalam hun thlirna te, School Programme leh thiltih hrang hranga hmasawn ngaihna te, School inenkawlna leh inkaihhruaina chungchanga hmasawn tulna te sawihona neiin hun hman a ni.

MBMP hruaitute chuan October 30, Pathianni khan BMP din chhan Campaign nei in, Pangzawl Bial, Bungtlang Bial, Thingsai Bial, S. Vanlaiphai Bial, Leite Bial leh Ṭawipui North Bialah te hetiang hian hun an hmang: