November 06, 2022 Pathianni zing dar 10:00 khan BCM Biak In thar, Shalom, Chawngte ‘P’ chu Rev. R. Lalbiakliana General Secretary -in a hawng. Biak In hawnna hi Biak In pawn-ah neih a ni a, hemi hnu hian Biak In chhungah lutin Pathian biak inkhawm neih zui nghal a ni.

Inkhawm hi Rev LH Lalmalsawma, Bialtu Pastor in a kaihruai a, Upa A Lalhmunsanga, Secretary, Building Committee-in Biak In sak dan leh Kohhran dinhmun tlangpui report a pe a, Biak In hawngtu - General Secretary-in thucah a sawi. Biak in hawnna inkhawm ah hian  Chawngte East Pastor Bial zaipawl leh BCM Shalom Kohhran zaipawl  ten Pathian fakna hla sa in hun an hmang bawk.

Biak In thar sakna tur hian kum 2015-ah Building Committee dinin hma lak tan a ni a. March 21, 2016 ah Rev. Aibula fanai, Bialtu Pastor-in lungphum phumin bul tan a ni a.  A dung feet 91 a vang feet 40 feet niin mi 550-600 vel len theihna ni in, Biak in hnuai lamah hian chhawng hnih (basement 1 leh 2) awm in Hall atana hman a ni ang. Biak In sak nan hian tha sang khat chuang leh cheng nuai 130 sen a ni.