November 4-6, 2022 chhung khan MBKHP Hruaitu te chuan Paithar Pastor Bial, Saizawh ‘E’ Kohhranah Leadership Training leh Seminar an neihpui a, MBKHP Hruaitute Pi P.C. Lalvohbiki, President MBKHP; Pi V. Lalnunziri Executive Committee member leh Pi V. Zothanbuangi Executive Committee member te an kal a ni. Seminar thupuiah ‘Nu mawhphurhna – Chhungkua leh Kohhranah’ tih hman a ni.
Inrinni chhunah Saizawh Biak Inah Seminar hi neiin, Bial chhunga Unit hrang hrang atangin member an kal tha hle a. Inrinni zan Pathianni zing leh Pathianni zanah te chanvo insemin Saizawh E Kohhranah hian Bial pum huapin hun an hmang chhunzawm a, Pathianni chawhnu-ah Bial pum huapin Inpawlhona neih a ni bawk. MBKHP rawngbawlna report te, Chhawmdawlna In rawngbawlna report te pe-in, zawhna leh chhanna hun hman a ni bawk. He Programme hman chhung hian Bialtu Pastor, Rev. R. Lalkhamliana leh Tualchhung Kohhran Upa leh Rawngbawltuten an tawiawmin an telpui thin.
Paithar Pastor Bialah hian BKHP Unit pasarih (7) - Paithar, Chawntlangpui, Sihtlangpui, Kawlchaw 'W', Silo-Kawlchaw W, R. Vanhne leh Saizawh E te an ni a, Bial pumpuiah BKHP member 404 an awm a ni.
