Mizoram Baptist Kohhran Rorelna sang ber – Assembly nithum chhunga neih chu vawiin, March 11, 2023 tlai dar 3:15 khan zawh fel a ni a. Rorel palai zawng zawng hi 1348 niin, BCM Assembly Rorel palai kal tam ber kum a ni.

Mizoram Baptist Kohhran Assembly – vawi 127-na neih mekah, vawiin khan  a ni hnihna atan Rorelna neih chhunzawm niin, 2023-2024 Budget ruahmanna thlirin ruahman angin pawm a ni.  Budget pumpui-ah cheng nuai 12,642.87 pawm a ni a. Kohhran Thawhlawm atanga hmuh beisei zat chu cheng nuai 8254.04 niin, Department thawhchhuah tura beisei zat chu cheng nuai 4,388.83 a ni. Kum hmasa aia budget pumpui punna chu cheng nuai 851.84 a ni a, budget pumpui punna hi za zelah 7.22 a nih laiin, Kohhran thawhlawm (Church Contribution)  punna chu za zela 4.62  a ni.

March 8, 2023 (Nilaini) zan atang khan Mizoram Baptist Kohhran Rorelna sang ber – Assembly vawi 127-na chu BCM Biak In, Salem, Lunglawn Pastor bial-ah neih mek a ni a, thupuiah Sam 22:28  thu  “Ram chu Lalpa ta a ni” tih chu hman a ni. March 8 (Nilaini) zan-ah Pathian Biak Inkhawm neih a ni a,  President Rev. Dr. R. Zolawma’n Assembly hawngin, Inkhawm a kaihruai nghal a, General Secretary Rev. R. Lalbiakliana’n Palai lawmna neiin Rev. C. Lalrochama’n thuchah a sawi a, Bial Zaipawl pathum – Chanmari Bial, |awipui Bial leh Lungsen Bial zaipawl te an zai bawk.

Director, Medical & Health Department report in a tarlan danin-  February 2023 chhungin Christian Hospital Serkawn-ah damlo 1554 in entirin, an zinga 241 admit an ni a, nau piang 54  an awm lai in mitthi 9 an nei thung. Mi 71 zai an ni a, an zinga 52 chu Zai pui (Major Operation) an ni. Laboratory-ah mi 1224 exam an ni a, mi 465 X Ray-in dam lo te hnenah thisen unit 54 an pe bawk.

March ni 8, 2023 (Nilaini) khan MṬKP Executive Committee Meeting Vawi 541-na, Sap Upa leh Pu Buanga Hall, BCM Hqrs Office, Serkawnah neih a ni a. Meeting hi Upa R.Lalrochama, President MṬKP in a kaihruaia, Rev.F.Zorinkhuma MṬKP Secretary chuan hmalakna leh rawngbawlna hrang hrang report a pe a. Nl. J.Lalrintluangi, Treasurer leh Tv. H.Lalruatkima Fin.Secretary ten MṬKP sum hmuh leh hman dan ziakin report an  pe bawk.

Ni 3 March 2023 tlai dar 3:30 khan North Vanlaiphai Pastor Quarters hlanna Rev Vanlalmuankima Director, Pastoral Department in a nei a. Headquarters office aṭangin Rev F. Zorinkhuma, Secretary MṬKP in a ṭawiawm bawk.

March 7, 2023 khan ṬKP Ebenezer Unit, Zobawk chuan kum 50 an tlinna champhaphak - Golden Jubilee kum 50 tlin lawmna hun an hmang a. Jubilee thupui atan I Samuela 7:12 thu -   "Hei leh chen hi Lalpan min pui a ni" tih hman a ni. MTKP hruaitu te, Rev. F.Zorinkhuma- Secrcetary, Pu K. Lalawmpuia- Asst.Secretary leh  Executive Committee Member pathum ten an ṭelpui a ni.

March 6, 2023 (Tue) chawhnu dar 2 khan BCM Bethel Kohhran Committee Room-ah Chin Baptist Association of North America hruaitute leh BCM Bethel Pastor Bial hruaitu ten inkawmhona hun an nei a, he inkawmhona ah hian Bialtu Pastor, Champhai pastor bial leh BCM Bethany, Aizawl hruaitu te pawh an tel a. Champhai khawpui chhunga raltlan awmte tana Kohhran din dan tur chungchang sawiho a ni.

March 3 – 5, 2023 chhung khan Baptist Mipa Pawl, Tawipui ‘N’ Pastor Bial chuan . Josua 3:1 thu “Kei leh ka chhungte erawh hi zawngin, Lalpa rawng  ania kan bawl dawn ni”, tih thupuia hmangin Bial BMP Sports Meet leh Leadership Training, Mualthuam ‘S’ –ah an nei a, MBMP President Rbt Chawngrolura Chawngthu chu Speaker leh Resource Person-ah hmangin, Pu B. Malsawmkima, Chanmari, Lunglei-in a tawiawm

March 2, 2023 khan Mizoram Baptist Mipa Pawl Office Bearers Meeting chuan Kum 2023 –2026 term atan MBMP Executive Committee member tur mi 24 a ruat fel. MBMP Committee Member atan atan hian Lunglei khawpui chhung Pastor bial hrang hrang bak ah, Zobawk, Hnahthial, Lawngtlai leh Aizawl atanga te in ruat an ni.

March 2-5 chhung khan BCM Biak in, Phairuangkai-ah Chakma Baptist Kohhran Assembly neih a ni a. Rorel hi ni hnih chhung Zirtawp leh Inrinni ah te neiin, Rorel palai 191 an kal a, Assembly chhung hian mikhual riak lut 266 an awm. Pathianni ah Ordination Service leh Lalpa zanriah sacrament inkhawm neih a ni a, Pathianni zan inkhawm banah Assembly hi an tiak a ni. CBC Assembly ah hian BCM aiawhin Rev. Lalremsiama Ralte, Mission Director leh Upa K. Siamliana, BCM Lungsen (Mission Board Member) te an kal a. Anni bakah hian Chakma Mission Field Director Rev. Dr. C. Lalrtuatthanga pawh CBC Puipa a nih angin Rorel hi a hmanpui a, Chakma te zinga BCM Missionary engemawzat an tel bawk.

Mizoram BMP Inkhawmpui vawi khatna Thawhlawm tlingkhawm chu Higher and Technical Institute, Mizoram (HATIM) tihchangtlunna atan pek tura ruahman a nih angin February 22, 2023 chawhnu dar  2:30 khan MBMP hruaitu ten HATIM Campus-ah kalin an hlan a.

February 23, 2023 (Ningani) khan Mizoram Baptist Kohhran Hmeichhe Pawl (MBKHP) Rorel vawi-73-na chu BCM Biak In, Ramthar, Lunglei-ah neih a ni a. Rorel Inkhawm hi Lalvohbiki, President, MBKHP-in a kaihruai a. Hun hmasa lamah Pathian hnena inkawltirna leh inhmelhriattirna neiin, Kum 2022-2023 MBKHP Rorel inkara member chatuan ram panta te mi 274 sunna neih a ni. Palai chhiarna neiin Rorel palai hi an vaiin 547 an ni.  MBKHP Rorel Inkhawmah hi Assembly aiawhin Rev. R. Lalbiakliana, General Secretary leh Rev. ZD Rodingliana, Fellowship Department Director ten an telpui a. An ni bak ah hian fellowship dang MTKP, MBMP leh KNP atangin Rorel palai an awm bawk.

February 23, 2023 (Ningani) zing dar 10:30 khan Assembly-in a lo rel tawh angin Executive Secretary Office, Lawngtlai Area-a dah tur, Bus thar chu Headuqrters Office, Serkawn-ah lo thlengin Pathian hnena hlanna neih a ni.

February 22, 2023 (Nilai) zan khan Lawngtlai Area ṬKP Meet Vawi 8-na, 24-26. Feb, 2023 chhunga neih tur hlanna inkhawm neih a ni a. BCM Biak In, New Siaha ah neih ni in, Organising Chairman Upa JF. Vantawna'n a kaihruai a. Siaha East Bialtu Pastor, Rev. Lalchhuankima chuan, Lawngtlai Area ṬKP Meet hi ṭhalai te'n  Pathian thlarau thianghlim awmpuina leh kaihhruaina changa, a chhimtu ten tisa chauh ni lova, thlarau lamah hlawkna nasa tak an chan ngei theihna tura Pathian kaihhruaina dila ṭawngṭaiin meet hlanna hi a nei a ni.