Ṭhalai Kristian Pawl (ṬKP) Republic Vengthlang Pastor Bial chuan November ni 18-20 chhung khan BCM Biak In, Venghlui-ah 'Pathian thuawih' tih thupuia hmangin inkhawmpui vawi 3-na an nei a. Speaker atan MṬKP Vice President Pu F Lalremruatpuia an hmang. Speaker bakah hian MTKP Executive Committee Member pahnih - Pu Lalrammuana Sailo leh Nl.H.Lalengliani ten Inkhawmpui hi an hmanpui bawk.

November 17 leh 18, 2022 khan Baptist English School, Zawlnuam chuan an kum 50 tlinna, Golden Jubilee ropui takin an lawm. Jubilee lawmna hi School compound-ah Pandal zar-in an hmang a, Zirtawpni zan dar 7:00 ah hawnna Inkhawm neiin, bialtu MLA Pu Lalrindika Ralte, Hachhek Constituency chu khuallianah hmangin, BES Jubilee zaipawl ten hawnna hla sa-in Managing Board member boral tawhte sunna neih a ni bawk. Chief Guest-in thu sawiin, zirlai tithate hnenah lawman semna te neih a ni a, Special Item hrang hrang a awm bawk.

November 18, 2022 (Zirtawpni) khan Worship Department-in Musical Instuments an lei thar te Pathian hnenah hlanna neih a ni a. Rev. ZD Rodingliana, Department Director-in Musical Instruments mamawhna leh a tulna te, sawiin Committee-in lei tura a passed hnu-ah Finance Committee phalna-in lei a nih thu a sawifiah a. Worship Department chuan heng Musical Instruments te hi a hman dan tur duangin ruahmanna te a la siam dawn a, a dahna tur leh a enkawl zui dan tur pawh uluk ataka duan a nih tur thu Director hian a tarlang a ni.General Secretary Charge latu, Rev. Dr. R. Lalthanmawia, AGS Mission-in Lawmthusawiin, Pathian hnenah  a hlan.

Tunkar Thawhlehni atanga Zirtawpni, November 15-18 chhung hian  Christian Hospital Serkawn chuan Rev. F. Sangvela  Speaker-a hmangin Thawktu te leh zirlai te pualin Intuaitharna (Retreat) an nei mek a.   Christian Hospital, Serkawn-a thawktute hi Duty pawimawh tak tak nei an nih avangin, ruahmanna siamin thawktute chu batch hnih-ah inthenin, ni hnih ve ve hun hmangin, Damdawiin inenkawlna leh duty ti buai lovin Retreat hi ruahman a ni.

November Pathianni  vawithumna hi Mizoram Baptist Kohhran Ni pawimawh “Naupangte Ni” a nih angin, Tunkar Pathianni, November 20 hi Tualchhung Kohhran tinah Naupangte Ni atan hman a ni dawn a. Kuminah hian Naupangte Ni thupui siam a ni lo va, Tualchhung Kohhran tinah Naupangte Ni pual thuchah BCM Ni pawimawh Programme-a dah chu chhiar chhuah a ni ang.

Finance Department-in, kum 2022-2023 Bial Target hmuh dan Statement-a a tarlan danin, thla sarih (April-October) chhung atana Kohhran thawhlawm atanga hmuh tura beisei (Church Contribution) cheng nuai 4605.04 (Rs. 460,504,917) chu cheng nuai 347.04 (Rs.34,704,919) in  khum a ni.  Kum 2022-2023 Financial Year atana Assembly Target (Church Contibution) pumpui chu cheng nuai 789.43 (Rs. 789,437,000/-) niin, Thla 7 (April – October) chhunga hmuh tawh zat chu za zela 62.73 a ni.

Administrative Committee chuan Headquarters Office-a thawktute intuaitharna leh in chher hriamna hmanrua atan Exposure Programme buatsaih ni se tiin a rel a. Hemi thu bawhzui hian ruahmanna siamin Headquarters Office-a thawktu mi 11 te chu Novemnber 14-22, 2022 chhungin Shillong, Guwahati leh Kolkata te tlawh turin an chhuak.

Tunkar Nilaini, November ni 16, 2022 chhun dar 12:00  khan North East India Christian Council – Women Assembly (NEICC-WA) Executive Committee Meeting, NEICC Conference Hall, Shillong ah neih a ni a. Meeting-ah hian Nl. Lalhmingmawii Chongthu, MBKHP Secretary chu member a nih angin a tel a, Nl. Jessie Lalramneli, NEICC Secretary atana lak thar pawh he Meetingah hian a tel ve nghal a ni.

November 14, 2022 Thawhtanni khan Centre for Baptist Studies, AICS Tanhril, Aizawl –a buatsaih chu Rev. Dr. Raltawnga Chhakchhuak in a hawng a. Centre hawnna hi chawhnu dar 3:00 ah AICS Main Building-ah Seminar neiin bul tan a ni. Seminar hi Upa Dr. Andrew Lalhmangaiha, Dean of Mission Studies, AICS in a kaihruai a, Rev. V.L. Hruaia Khiangte in Baptist Kohhran zirna paper a buatsaih a chhiar a. Seminar neih zawhah Centre Hawnna leh Pathian hnena hlanna inkhawm neiin. Rev. Dr. C. Vanlaldika, AICS Principal-in Inkhawm a kaihruai a, Rev. Dr. Raltawnga Chhakchhuak-in thuchah tawi sawi in Centre a hawng a. Rev. Prof. R. Zolawma, BCM President-in Centre for Baptist Studies chu Pathian hnenah hlanin a tawngtai a, Rev. J.C. Vanlalluaia, AADC Chairman in Malsawmnain Inkhawm a khar a ni.

Tunkar Thawhtanni, November 14,2022 zing dar 10:30 khan Assembly 2022 in a lo phal sak tawh angin Tripura Field-a hman tur Motor lei thar chu Pathian hnena hlanna, Headquarters Office kawt-ah neih a ni a. Motor thar hlanna hunah hian Er. Victor Lalrinawma Sailo chuan Motor thar lei dan report tawi pe-in –Motor lei thar hi Bolero B6 model niin, Registration tihfelna te nen cheng nuai 11, sing 2, sang 6 leh 248 hman a nih thu a tarlang.

Tunkar Pathianni, November 13, 2022 khan BMP Serkawn Unit te chuan Kumin chhungin Kohhran harsate tanpui ni se ti-a Planning-a an dah bawhzuin, BCM Maudarh chu an Biak In sak lai mek tanpuina atan cheng 24,000/- an pe. Kohhran tanpuina thilpek hi Unit hruaitu – OB te leh Executive Committee member mi 7 –in BCM Maudarh-ah kalin Pathianni zing Inkhawm hunah an han hlan.

November 11-13, 2022 chhung khan BMP Muallianpui Pastor Bial Inkhawmpui vawi 2-na,  BCM Biak In, Muallianpui North ah neih a ni a, hetah hian Mizoram BMP President Rbt. Chawngrolura Chawngthu chu Speaker ah hmangin Rahsiveng Pastor Bial zaipawl ten Inkhawmpui hi an hmanpui bawk.

MBKHP Executive Committee Meeting rorelnain a passed “Tlawh khât Bial tlawh” programme kal zelah   November 12 leh 13, (Inrinni leh Pathianni) hmang khan  Tuiphai Pastor Bial an tlawh a. MBKHP hruaitute -  Pi V.Biaklawmi Asst Secy, Pi C.Laltlanthangi Exe.Comt Member leh Upa F. Lallianzami Exe.Comtt Member te an kal. MBKHP hruaitute hi Tuiphai Pastor Bial țhuthmun – Tarpho-ah innghatin, Bial Hruaitute leh BKHP Tarpho Unit hruaituten an lo dawngsawng a, zanriah an lo buatsaih sak a ni.

November 11-13, 2022  khan BCM Chawnhu chuan an Kohhran kum 100 tlin lawmna leh Biak In thar hawnna leh Pathian hnena hlanna hun an hmang. He hun hi General Secretary, Rev. R. Lalbiakliana’n hmanpuiin, Kohhran Centenary Souvenir tlangzarhin Biak In thar a hawng bawk. Centenary Lawmna Inkhawm hi November 11, 2022  (Zirtawp) zanah tanin Pathian Chibai buk Inkhawmin hun hman a ni a. Inkhawm hi Upa ST Heily, Kohhran Chairman in a kaihruai a, Rev. K. Laldosanga, Bialtu Pastor, Lawngtlai ‘S’ Pastor Bialin  Thuchah a sawi a. Inkhawm banah Biak In kawtah Centenary Mei det a ni bawk.

Kar hmasa Inrinni, November 12, 2022 khan BCM Planning-in ruahmanna a siam bawhzuiin, General Secretary Rev. R. Lalbiakliana, Property Director, Er. Victor Lalrinawma leh Asst.Architect Nl. Laldinchhungi te chu Lawngtlaiah kalin Lai Christian Centre sakna tur hmun leh ram te an en a, Rev. Dr. H. Lalthlamuana, Executive Secretary leh Bial hruaitu ten an lo tawiawm. Lai Christian Centre sakna tur an en zawh hian, Lawngtlai Area BMP Meet telpuiin, General Secretary hian chibaibukna (Greetings) a sawi a, Christian Hospital, Lawngtlai Medical Superintendent Qurters saklai an en nghal bawk.