November Ni 26 khan Senate of Serampore College(University) hnuaia Theological Degree harang hrang pekna Convocation chu Harding Theological College, Tura-ah neih a ni. He Convocation-ah hian D.Th, M.Th, BD, B.Th, B.Miss, BCS, Dip CS leh Dip in Clinical and Pastoral Councelling) Degree-te hlan a ni. He Convocation-ah hian BCM Pastor, AICS-a Asst. Prof ni lai Rev. James Chuaukailiana pawh D.Th degree Certificate hlan a ni. AICS Principal, Rev. Dr. C. Vanlaldika pawh Principal a nihna bakah Serampore College Council Representative a nihna angin he Convocation-ah hian a tel a ni.

Pu Lalfamkima Missionary, Jhakhand Field chu November 25, 2022 (Zirtawpni) zan dar 7:50 khan, Ebenezer Hospital, Aizawl-ah a boral a, a tuk, November 26 (Inrinni)-ah BCM Biak In, Tlangnuam, Aizawl-ah vuina Inkhawm neiin, Tlangnuam Thlanmualah vuiliam a ni.

Tunhnai khan Mizoram Nursing Council-in General Nursing Midwiferym(GNM) result 2022 a ti chhuak a. Tun tum result tih chhuah-ah hian School of Nursing, Christian Hospital Serkawn chuan result tha tak neiin, Final Year (III Yr) ah top ten-ah pahnih an lang a, Mizoram pum-ah pangana, pariatna an hauh a ni. 2nd Year atangin pahnihna leh pathumna an hauh a, First Year atangin mi 4 Top Ten-ah hian lang bawkin, 4-na, 5-na leh 10-na pahnih an hauh a ni.

Mizoram Baptist Kohhran – Area Baptist Council (ABC) Rorel leh Inkhawmpui chu November 25-27, 2022 chhung hian ABC 16-ah a rualin neih a ni dawn a. November 25, zirtawp zan atangin Inkhawmpui hi tanin, vantlang Inkhawm atan hman a ni ang. Inrinni nilengin ABC Rorelna neih a ni ang a, ABC Executive Committee thute bakah Pastor Bial  atanga Agenda lut te, ABC kal tlanga Assembly 2023-a thlen tura chhawpchhuah te ngaihtuah a ni ang. Zanlam-ah Pathian Biak Inkhawm awm lehin, ABC thenkhat-ah inkhawm banah Inpawlhona leh Zaikhawm programme an siam bawk. November 27, 2022 (Pathianni) Chawhma inkhawm hi Kohhran Upa Ordination Service atan hman a ni ang a, Pastor Bial 66 atangin Kohhran Upa  162 nemngheh tur awmin, anmahni awmna ABC theuh-ah nemngheh an ni ang. Pathianni chawhnu-ah Lalpa zanriah (Sacrament) kil ho a ni ang a. Zan lamah Vantlang Inkhawm awm lehin inkhawm banah Inkhawmpui an tiak tawh dawn a ni. ABC Rorel leh Inkhawmpui neihna hrang hrang leh Thupui, Kohhran Upa nemnghettu turte chu hetiang hian report kan dawng:-

November 23, nilaini chawhnu dar 1 khan Committee Room No.01, Headquarters Office ah Assembly-in  ‘Mizorama Chanchintha lo thlen dan Documentary Film buatsaih ni se’ ti a a rel bawhzuitu Sub-Committee, Communications Department Committee kal tlanga din chu a vawi 6-na atan an thukhawm a. He thutkhawmna ah hian Documentary Film siamna atana Firm thawhpui tura biak MSPACE Production atangin mi 2 lo tel ve bawkin hmalak chhoh zel dan tur ruahmanna hrang hrang siam a ni.

Aizawl Area TKP Coordination Committee bultumin  tunkar Thawhlehni, November 22 zan khan Baptist Multipurpose Centre, Falkland, Aizawl-ah Gospel Charity Concert neih a ni a. Thalai leh Kohhran miten an hlutin chhimtu an tha hle.

ṬKP Kanaan Unit Lawngtlai AOC Veng ten, November 15-19, 2022 khan BCM Biakin Hruitezawl Sak mek chu work camp neiin an sakpui a. Work camp ah hian member 30, Mipa 22 leh Hmeichhia 8 an thawk chhuak a, Biakin chhuat rualrem lo chhilh mam leh Biakin bang brick rem hna te thawkin, Biakin tukverh chokut pariat (8) Kawngka pui chokut pahnih (2) an siam.

November 21-23, 2022 khan Relief & Development Department, Lydia Poject hnuai a Hnahthial, Mualcheng leh MUalthuam ‘N’-a Self Help Group te tlawhin Project incharge, Nl. C. Lalremsangpuii leh Pu Lalrinkima, Project Accountant te an kal a. Self Help Group member te hi ko khawmin Meeting an neihpui a, an hmalakna report te ngaithla-in, Self Help group kalphung leh hmalak dan tur te kawhhmuhin, tan la sauh sauh tura infuih tharna te an nei bawk.

November 14 atanga ni 21, 2022 chhung khan BMP Moria Unit, Rahsiveng te chu BCM Hmarveng,   Kanhmun-ah Biak In sakpuiin, work Camp an nei a, BMP member 20 an thawk chhuak. BMP Moria Unit te hi, November 14 khan Work Camp nei tur hian an kal a,  November 15 atanga 19 chhungin hna hi thawkin, Pathianni an hmang nghal a. Work Camp an neih chhung hian Biakin Beem feet 150 kual siamin ang chhung zo vek a, Sunday shool Hall  kawngkapui 2, tukverh frame 5 leh Ventilation 4 an siam sak a ni.

November 20, 2022 (Pathianni) chawhnu dar 1:30 khan BCM Biak In, Salem Lawngtlai-III ah Lawngtlai Area ṬKP Meet 2023, Siaha-a neih tur pualin joint fellowship neih a ni a, Lawngtlai khawpui chhunga ṬKP unit hrang hrang te an tel ṭha hle. Fellowship hi Pu Beiduasa, Executive Committee Member, LAṬKP-in kaihruaiin, LAṬKP Senior Adviser Upa V. Renhsanga'n Pathian hnena inkawltirna neiin, Rev. Dr H. Lalthlamuana, ES Lawngtlaiin rilru hrisel tih thupui hmangin thuchah tawi a sawi bawk.

Zokhawthar khuaa Kohhran ding thar, BCM Venghnuai, Zokhawthar chuan a hmasa ber atan November 20, 2022 (Pathianni) zan khan inkhawmna an tan a.  Inkhawm hi Upa C. Zarzoliana, Kohhran Chairman-in a kaihruai a, Rev. Vanlalnghaka Jongte, Bialtu Pastor, Bethel Pastor Bial, Champhai-in Kohhran hruaitu tharte lawmluhna a nei bawk. Tualchhung Kohhran Secretary - Rbt. Robert Pianga’n Kohhran report pe-in, Zokhawthar Kohhran Zaipawl leh Champhai Kahrawt Kohhran Zaipawl te'n zaia rawngbawlna an nei a, Rev. PC Lalropuia, Bialtu Pastor, Champhai Pastor Bial-in thuchah a sawi bawk.

November 17-21 chhung khan Rev. Vanlalmuankima, Director Pastoral Department leh Manger, Audio Visual Production te chuan hmarchhak tlangdunga Pastor bial pathum- Khuruhlian Pastor Bial, Sakawrdai Pastor Bial leh Phuaibuang pastor bial te tlawhin an fehchhuak a. Heng bial ah te hian khaw 18 ah tualchhung kohhran 19 awm in, kohhran 2 tihloh chu a hmunah kalin an tlawh vek thei a, kohhran te nen inkawm hona hun tawi nei thei zelin, Kohhran dinhmun tlangpui tarlanna (Pastor Bial Bihchianna) TV Programme buatsaih nghal zel a ni bawk.

November 21, 2022 (Thawhtan) zan khan ṬKP Trinity Unit Zobawk te chuan MṬKP Rorelna-in a lo pass tawh 'Fa Neih Tam Inzirtir' kawnga hma a lak ni se tih thu umzuiin, an Kohhran Sunday School Hall-ah Fa neih tam inzirtirna Inkhawm an buatsaih a, Rbt. LH.Lalhmangaiha, Ṭhalai Entu Editor-in zirtirna pe.

Pu Lalrinawma, Sr.Coordinator, Director, Relief and Development Department chu  November 18, 2022-a Church Auxiliary Social Action(CASA) National Board Meeting leh CASA kum 75 tlin lawmna CASA Headquarters Office, New Delhi-a neih-ah a tel.

Kar hmasa Inrinni, November 19, 2022 khan ṬKP Theiriat Pastor Bial-te chuan MṬKP-in Blood Donation Calendar a siam angin BCM Sethlun Biak In Hall-ah Blood Donation Camp an buatsaih a. He hunah hian Thisen Unit 36 an pe a. Thisen petute hi Mipa 30 leh Hmeichhia 6 an ni. Civil Hospital Lunglei Blood Bank-a thawktu ten a hmunah hian kal chilhin an lak sak a ni.