Pathianni liamta, January 15, 2023 khan BCM Sunday School Syllabus-a tarlan leh ruahman angin Kohhran tinah Zirtirtute pualin Sunday School Orientation neih a ni a. Christian Education Deparment-in ruahmanna a siam angin Tualchhung Kohhran Sunday School Committee chuan Orientation programme duangin Resource Person pawh an ruat a, report kan dawn danin he Orientation hi Kohhran hrang hrang-a Sunday school Zirtirtu ten an hlawkpui hle.

January 15, 2023 chawhma dar 10:00 khan BCM Biak In, Lawngtlai Bazar-ah Missionary Tirhchhuah Inkhawm buatsaih a ni a. Tun tumah hian Missionary atana lak thar mi 4 tirhchhuah an ni. Missionary Tirh chhuah Inkhawm hi Rev. Lalremsiama Ralte, Mission Director-in a kaihruai a, Upa T. Lallianngura leh Upa T. Lalnunmawia, Mission Board member ten Pathian thu chhiarin, Pu T. Nghaksanga, Mission Promoter-in Missionary Tirhchhuah turte hmelhriattirna a neih hnu-ah Tirhchhuah turte hnen atangin Testimony tawi ngaihthlak a ni bawk.

January 14, 2023 Inrinni khan Mizorama Chanchin Tha lo thlen dan - Documentary Film "Mingo Hnuhnung" atana a chang tur thlanna Audition thawh hnihna chu Baptist House, Aizawl-ah neih a ni a, Audition hi December 22, 2022 khan Lunglei-ah neih a lo ni tawh a, hemi tuma tling te nen an vaiin Documentary Film chang tura Audition paltlang te hi mi 7 an ni.

January 14, 2023 khan Mizoram BMP Hruaitute OB leh Executive Committee member thenkhat chu Hnathial-ah kalin, February 10-12 chhunga MBMP Inkhawmpui, Hnathiala neih tur atan inbuatsaihna leh Pandal sak mek te a hmunah enin, MBMP Inkhawmpui Organising Committee member te nen inkawmhona an nei nghal a, Organising Committee member te hian Inkhawmpuina atana hmalak dan te lo hrilhin, hmabak tih tur la awm te an thlirho bawk.

ṬKP Sakawrdai Pastor Bial chuan January 13-15, 2023 chhung khan ''Ṭhalaite leh Tunlai khawvel'' tih thupui a hmangin BCM Biak In, Lungsumah Bial Inkhawmpui an nei a. Inkhawmpui Speaker atan Upa R.Lalrochama, MṬKP President hmangin, MṬKP Senior Adviser Upa Pc Vanlalrova’n Inkhawmpui hi a hmanpui bawk. Speaker hnen aṭangin thu ṭha tak tak ngaihthlak a nih bakah, Nl. Lalchhanchhuahi (Chhantei),Hnahthial Bazar Unit leh bial chhunga zaithiam hrang hrang ten zaia rawngbawlna an nei bawk

Tripura Baptist Youth Fellowship Annual Conference, 2023 chu ni 13-15, January chhung khan Kailashahar Baptist Ṭhalai Pawl- in, Hmunbei Baptist kohhran Biak In, Tripura ah an thleng. He conference-ah hian Rev F. Zorinkhuma, Secretary, MṬKP chu Speaker panga zinga pakhat a ni a. MṬKP Secretary hian Inrinni zan (14.1.2023)-ah thuchah sawiin, MṬKP hruaitu Pu Chanchinmawia Fanai(ECM) leh Pu K. Lalrintluanga (ECM) ten an ṭawiawm a ni.

Kar hmasa Inrinni leh Pathianni (January 14&15) khan BHKP Champhai huap-in BCM Biak In Kahrawt ah Nu mawhphurhna leh Thuawihna tih thupui hmangin Seminar cum Retreat neih a ni a. He hun hmanpui hian MBKHP hruaitute atangin Executive Committee member - Pi F. Lalawmpuii leh Pi C. Zonunsangi  te kalin hun an hmanpui.

January 8, 2023 khan Pi R. Kawlkungi, W/o Upa C. Chalkhuma (L) , Serkawn-in uluk leh roh taka a vawn that, Sap Upa leh Pu Buanga ten an chawhmeh kanna thir bel (suankang) an hman thin chu BCM Archive-a dah turin a pe

January 11, 2023 (Nilaini) kha Mizoram-a Missionary hmasa ber lo thlen champha phak, “Missionary Day”  a ni a. Kumin Missionary day Thupui atan “Chanchin Tha hi hril rawh u” (Marka 16:15) tih hman a ni. He Ni hi ram pumah hman a nih theih nan. Mizoram Sorkar chuan Sorkar chawlh (State Holiday) atan a puang thin a, kuminah pawh Sorkar chawlh-ah puangin, Kohhran hrang hrang ten awmni khamin ruai nen hun an hmang a ni.

Tunkar Pathianni, January 15, 2023 chawhma dar 10:00 hian BCM Biak In, Lawngtlai Bazar-ah Missionary Tirhchhuah Inkhawm buatsaih a ni dawn a. Tun tumah hian Missionary atana lak thar mi 4 tirhchhuah an ni ang.

Vawiin January 9, chawhma dar 11:30 khan BCM hnuaia thawktu ten Inhlantharna hi hmun thum - Headquarters, Serkawn, Aizawl leh Lawngtlai ah te neih a ni a. Headqurters Office, Serkawn leh Lunglei-a Kohhran zirna in leh Office hrang hranga thawktu te puala inhlantharna hi BCM Hall Serkawn ah neih a ni a, Rev. R. Lalbiakliana, General Secretary in Inkhaw a kaihruai.

January 11, 2023 (Nilaini) hi Mizoram-a Missionary hmasa ber lo thlen champha phak, “Missionary Day” a ni a. Kumin Missionary day Thupui atan “Chanchin Tha hi hril rawh u” (Marka 16:5) tih hman a ni ang. He Ni hi ram pumah hman a nih theih nan . Mizoram Sorkar chuan Sorkar chawlh (State Holiday) atan a hmang thin a, Kohhran hrang hrang ten awmni khamin ruai nen hun an hmang thin a ni.  Mizoram Baptist Kohhran chuan he Ni hi urhsun takin a hmang thin a. Kuminah pawh Kohhran tam zawkin Ruai theh-in Chanchin Tha min pek avanga pathian hnena lawmthusawina Inkhawm leh Zaikhawm Programme duangin ruai thehin hun an hmang leh dawn a ni.

Vawiin, January 6, 2023 (Zirtawpni) khan Mizoram Baptist Kohhran chuan Kum thar atana Office kai ni hmasa ber hmangin Office an hawng tan leh ta. BCM thawktu hmun hrang hranga Christmas leh Kumthar hmanga zin chhuak te leh mahni hmun lama hawte pawhin Office kaini hmasa ber hi ngai pawimawhin an haw kim hle. Office kai tan ni-ah hian Headquarters Office, Serkawn-ah chuan Rev. R. Lalnunzira, AGS-in Devotions hmangin Pathian hnena lawmthusawina neiin hun an hmang. Headquarters Office bakah Executive Secretary Office, Aizawl leh Lawngtlai te leh Department hrang hrang ten an Office hi hawngin hna pangngai an chhunzawm bawk.

Kohhran hnuaia thawktu Department hrang hrang-a nitin Office kal te chuan December ni 15, 2022 (Ningani) atangin Krismas leh Kumthar chawlh an hmang tan dawn a, hemi chhung hian Headquarters Office te, Executive Secretary Office, Aizawl leh lawngtlai te leh Department Office dang te pawh khar a ni ang. Hetih lai hian, Hospital lam te, Zirna In te leh Homes te chu anmahni remchan leh kalphung angin Department hotute ruahmanna siamin an kal ang a, Duty leh hna kallai pawh a pangngaiin an kalpui zel dawn a ni.

December 14, 2022 (Nilaini) khan School of Nursing, Christian Hospital, Serkawn chuan General Nuring & Midwifery (GNM) batch tharte pualin Capping & Lamp Lighting leh GNM zirchhuak te tirhchhuahna ‘Graduation Service’ an hmang a. He hunah hian Rev. R. Lalbiakliana, General Secretary chu khuallian a ni.