Tunkar Pathianni, January 29, 2023 hi “Phar pual Pathianni” (The Leprosy Sunday) a ni a.  Mizoram Baptist Kohhran chuan he ni hi kum tinin urhsun takin a hmang thin a ni. Kumin Phar pual Pathianni thupui chu “Phar te tithianghlim ula” (Mt 10:8) tih a ni ang.

BCM Theological Education Committee in professor a a hlankai te Rev. Dr. Vanlalchhawna Khiangte leh Rev. Dr. Elungkiebe Zeliang te chuan January 25, 2023 khan AICS ah profesorial lecture pe in hun an hmang. Rev. Dr. Vanlalchhawna Khiangte hi BCM ordained minister niin, doctor of theology New Testament subject a nei a ni a, kum 2019-2021 chhunga AICS principal niin, tunah hian Hrangchalkawn bialtu pastor ani mek ani.

January 21-22, 2023 khan Tlawh khat Bial tlawh programme hmangin MBKHP Hruaitute Lalhmingmawii Chongthu,Secretary leh exe comt member-te Pi Laldinliani leh Pi V.Lalnunziri te chuan BKHP Vaţhuampui Pastor Bial an tlawha. Hemi prog denchhen hian BKHP Vathuampui Pastor Bial Meet leh Seminar an lo buatsaih chu an hmanpui nghal a ni..

Tunkar Nilaini, January 25, 2023 khan BKHP Hauruang Pastor Bial chuan Bial BKHP hruaitute pualin Leadership Training BCM Biak In Imanuel Hauruang  an buatsaih a. He hunah  hian MBKH Hruaitute - Pi V. Biaklawmi Asst. Secretary leh executive Committee member pahnih –Pi R. Lalnunziri leh Pi Lalnunsangi Khiangte te kalin Training hi an pe a ni.

Ni 21-23 January 2023 khan Rev. R. Lalrintluanga Executive Secretary Aizawl Area chuan Farkawn, Thekte leh Vaphai hmuna  raltlan te hnenah BCM Charity fund leh MTKP aiawhin relief fund Rs 160,000 chu chhungkaw 100 hnenah cheng 1500 theuha pe in, kohhran hnenah cheng sing khat pek a ni bawk.

January, 20-22, 2023 chhung khan ṬKP Chanmari Pastor Bial, Lunglei te chuan 'Lalpa lokal lehna' tih thupuia hmangin Inkhawmpui vawi-47 na BCM Biak In, Galili-ah an nei a, Speaker atan Rev. VL Nithanga, New Serchhip bialtu pastor an hmang. Inkhawmpuiah hian bial ṬKP rorel vawi 48-na neih nghal a ni a, thu pawimawh tam tak relin kum 2023-2024 Budget atan ₹280,000/- an pawm a ni.

Thenzawl Pastor Bial Ṭhalai Kristian pawlin inkhawmpui Rorelnaa a lo passed tawh bawh zuiin, January 21, 2023 (Inrinni) khan Bial huapin Blood Donation Camp a buatsaih a, thisen Unit 49 an pe. Thisen  pek hunah hian Rbt. R. Lalramnghaka, Bial ṬKP President in hunserh a hmang a, tawngtaina leh lawmthusawina tawi neiin, midang te nun chhan nana thisen pe zel turin TKP member te a fuih bawk. Thisen petute hi mipa 34 leh hmeichhia 15 niin, District Hospital Serchhip, Blood Bank a thawktuten an rawn la sak a ni.

January 19-22, 2023 khan Bru Baptist Church hnuaia Thalai Pawl Central Khristian Juaing Dol (CKJD) Inkhawmpui Vawi 5-na, BBC, Putlungasih-ah neih a ni a. He Thalai Inkhawmpui hi MṬKP aṭangin Secretary Rev. F Zorinkhuma, Vice President F. Lalremruatpuia leh Executive Committee Member Pu Pc. Lalbiakdika leh Tv. Lalrempuia Khiangte ten an hmanpui a. Inkhawmpui Thupui atan 'Jisu Bai (Isua Nen)' tih niin MṬKP Secretary leh Vice President te hi speker ah hman niin, an ni hnen atang hian thuchah ngaihthlak thin a ni.

Kar hmasa Zirtawp ni, January 20, 2023 khan Mizoram Baptist Mipa Pawl (MBMP) Executive Committee Meeting BCM Chanmari Committee Hall, Lunglei-ah neih a ni a. Meeting hi Rbt Chawngrolura, MBMP President-in a kaihruai a, Rev. H. Lalfakzuala, Secretary MBMP-in report a pe.

Vawiin, January 24, 2023 (Thawhlehni) chawhma dar 10:30 khan Mizorama Kohhran Hrang Hrang hruaitu ten Kohhran inzawmkhawm dan tur ngaihtuaha inrawnkhawmna an nei. Tun tum Kohhran hruaitu te inrawnkhawmna hi Mizoram Baptist Kohhran in thleng in, Sap Upa leh Pu Buanga Hall, Headquarters Office, Serkawn-ah neih a ni a. Rev. R. Lalbiakliana, General Secretary, Mizoram Baptist Kohhran-in, kohhran hruaitu kalkhawmte lawmna leh chibaibukna a nei a, hemi hnu hian kohran hrang hrang atanga hruaitu lo kal te inhmelhriattirna neih a ni a, Presbyterian Church of India, Mizoram Synod (PCI), Evangelical Church of Maraland (ECM), Baptist Church of Mizoram (BCM), The Salvation Army, Lairam Isua Krista Baptist Kohhran (LIKBK) aiawh kohhran hruaitu mi paruk theuh  he inrawnkhawmna ah hian an tel.

Tunkar Ningani, January 19, 2023 khan Mizoram Baptist Kohhran, Mission Board Meeting, BCM Hall, Serkawn-ah neih a  ni a. Meeting hi   President Rev. Dr. R. Zolawma’n a kaihruai a. Rev Dr. R. Lalthanmawia, AGS (Mission)-in report tlangpui a pe.

Baptist Church of Mizoram, Assembly hnuaia Rorelna sang ber, Assembly  Executive Committee Meeting ni hnih awh tura ruahman chu January 18,  2023 (Nilaini) khan BCM Hall, Headdquarters Office, Serkawn-ah neiin zawh fel nghal a ni. Meeting hi BCM President, Rev. Dr. R. Zolawma’n a kaihruai a, Upa C. Hrangdula, Statistician-in Meeting Pathian hnenah hlanin a tawngtai a, General Secretary Rev. R. Lalbiakliana’n Department hrang hrang report khaikhawmin a pe.

January 13 atanga 16, 2023 khan Shillong bial BKHP member 10 te chuan mission field pathuam- Assam, Bengal leh Bhutan Field te an tlawh a. January 13 ah West Bengal Field pana chhuakin, Filed headquarters Birpara ah zan inkhawm te nei nghalin, a tuk ni 14 ah missionary te awmna hmun hrang hrang te tlawhin missionary te leh bengal field ring tu te nen inkawmhona hun tha tak an nei a ni.

Mission Board Meeting No. 57, dt. 19,Jan.2023 thu angin heng a hnuaia tarlan missionary te hi an awmna tur siamfel a ni a. An thawhna tura ruatah hian April 15, 2023 aia tlai lova zawm tura hriattir an ni a, remchang lo te erawhchu hotuten a tul dang angin ruahmanna an siam sak ang. Quarters chhuahsan tur ten felfai taka chhuahsan tur a ni. Joining Report chu Field Director/Headmaster kaltlangin Mission Director, hnenah an pe ang.

January 18, 2023 (Nilaini) chhun dar 12:30 khan BCM Assembly Hall sakna tur lungphum phumna neih a ni a. Property Director, Er. Victor Lalrinawma Sailovin Assembly Hall sak tura ruahman a nih dan leh Hall dinhmun tur report tlangpui a sawi hnu-ah Rev. R. Lalbiakliana, General Secretary-in Lungphum phumin, BCM Puipate-in an chhilh a,  Rev. KV Thanga, President Elect-in Pathian hnenah tawngtaiin a hlan.