May 14, 2023 (Pathianni) khan TKP, Kolasib Pastor Bial chuan BCM Biak In, Kawnpuiah, Bial huap Leadership Training an buatsaih a. Resource person-ah Rev. Joe Laldinpuia, Bialtu pastor hman a ni a. Training hi Aizawl Area ṬKP Coordination Committee hruaitute - Chairman, Pu Lalhmunsiama Pautu leh Vice Chairman Pu FC Lalchhuanawma te bakah Executive Committee member te - Tv. Vanlalruata, Nl. Lalruatfeli leh Tv. Lalfelkima, Area Media Cell Comm Member ten an hmanpui.

May 15, 2023 (Thawhtanni) khan kum 2022-2023 chhunga MTKP Inkhawmpui 2025 dawltu tanpuina atana member tina Rs. 20 khawn tlingkhawm Rs. 7,72,440 chu MTKP Office Bearers ten Lunglawn Bial TKP hruaitu te hnenah an hlan a. Lunglawn Bial hruaitute leh TKP hruaituten an lo dawngsawng a ni.

May ni 14, 2023 Pathian Ni chawhnu khan ṬKP Republic Vengthlang Pastor Bial leh NIELIT hmalakna in Ṭhalai Kristian Pawl, Bethlehem Vengthlang Unit-ah "Cyber Security & IT Act" tih thupui hmangin Cyber Crime Awareness Campaign neih a ni

Rev. R. Lalnunzira AGS (Service) Resource person-a hmangin Hnahthial Bazar Pastor Bial chuan May 13, 2023 (Inrnni) khan BCM Biak In, Bethel Hnahthial ah Bial Chhung Upa leh Rawngbawltute pualin Seminar an buatsaih a. Bial chhunga Kohhran Upa leh rawngbawltu mi 45 an kal. Seminar-ah hian Kohhran humhalh leh Enkawl tih thupuia hmangin Resource Person-in paper a buatsaih chu zir ho a ni a. Sawihona hun tha tak neih a ni bawk.

May ni 13, 2023 (inrinni) khan MṬKP Executive Committee Meeting vawi 542-na chu Sap Upa leh Pu Buanga Hall, Serkawnah neih a ni a, Upa R.Lalrochama, President in Meeting kaihruaiin, Rev.F.Zorinkhuma Secretary-in report tlangpui pein rawngbawlna hmachhawp hrang hrangte a tarlang nghal a.  Nl. J.Lalrintluangi, Treasurer hnen atangin MTKP sum dinhmun tlangpui ngaihthlak a ni bawk.

Fellowship Department committee chuan Mizoram pum huap Kristian Naupang Pawl te tan Lemchan tawi intihsiak buatsaih a rel a. Ruahmanna siam turin Lemchan tawi sub-committee dinin, Sub-committee chuan Lemchan tawi intihsiak chungchanga ruahmanna hetiang hian a siam a, KNP Unit te he lemchan intihsiaknaah hian a tam thei ang ber tel turin an sawm nghal a ni.

May 13 leh 14 hmang khan Asia Pacific Baptist Federation General Secretary Rev. Dr. Vasekhoyi ‘Vee’ Tetseo leh a nupui Rev. Ai-Nohara te chuan BCM Headquaters, Serkawn an rawn tlawh a. General Secretary leh hotu dang ten lo dawngsawng in, Pathianni zing-ah Ramzotlang Kohhrana-ah  Inkhawmin, chibaibukna leh thuchah a sawi a, chawhnu lamah BCM Office Committee Room-ah Kohhran hruaitute nen inkawmhona neiin, zanriah an kilpui nghal.

Tunkar Thawhtanni, May 15, 2023 khan Cyclone Mocha siper tlehin BCM Biak In, Thaizawl leh Bualte a tih chhiat leh Thaizawl-a Raltlante awmna camp a tih chhiat te tlawhin  Relief & Development Department thawktu te – Rev. L. Vanlalsanga, Director, Pu Lalrinawma, Coordinator, Nl. T. Lalfawnveli, Asst Coordinator leh Pu Lalrinkima Project Accountant te chu a hmunah an kal

Mizoram Board of School Education in 2023 HSLC Examination result May 11, 2023-a a tihchhuah takah Baptist Higher Secondary School, Serkawn atanga exam beitu zirlai 136 atangin mi 114 ten hlawhtlinna changin pass percentage hi 83.83 niin, Passed te hi Distinction-ah mi – 9, First Division mi – 32, Second Dvision-ah mi – 53 leh Third Division mi – 20 an ni.

May 10, 2023 (Nilaini) dar 12:00 khan JH Lorrain Hall, Baptist House, Lawngtlai Bazar-ah Lawngtlai Area Development Committee Meeting neih a ni a, Meeting-ah hian Lawngtlai Area chhunga pastor bial hrang hrang pastor-te bakah Lawngtlai East, North, South, Diltlang South, Siaha East leh West bial aṭangtein an tel a, General Secretary Rev. R. Lalbiakliana leh Pastoral Ministry Department Director Rev. Vanlalmuankima te'n an telpui a ni.

May 2 atang khan Kolkatta leh Guwahati region hnuaia Mision Field hrang hrang Kolkatta leh Guwahati Regional Director Office-ah Audit neih a ni a. Mission Field Accounts Auditor te - Upa K. Lalrohlua, Fianace Director (Convener) hovin, Pi Angel Zairimawii, cashier Pu Michael Lalremruata, Cashier leh  Upa F. Lalzarmawia, Lunglawn ten Audit hi an nei a ni.

Assembly Puipate leh Department hruaitute inrawnkhawmin an rel angin, kan thenawm State, Manipur-a buaina nasa tak thleng mek-ah, buaina-in ziaawm lam a pan a, remna leh muanna a awm thuai theih nan, May 10, 2023 (Nilai zan) Pathian Biak Inkhawmah Mizoram Baptist Kohhran hnuaia Tualchhung Kohhran zawng zawng ten tawngtairualna neih a ni

May 8 leh ni 9, 2023 khan North East India Theological Association (NEITA) chuan CBCNEI, Guwahati-ah Annual Meeting leh General Conference an nei a, thupui 'Pathianthu zirna inpui ten rawngbawltu te buatsaih kawnga an mawhphurhna (Role of Theologcal College in Ministerial Formation) tih a ni a.

Lawngtlai Area ṬKP Co-ordination Committee hruaitu te chu 6-7 May, 2023 khan ṬKP Bungtlang South Pastor Bial tlawhin an fehchhuak a, hruaitu mi pakua an kal.

May 5, 2023 (Zirtawpni zan) khan ṬKP, Aizawl East Pastor Bial chuan Bial huap-in Ṭawngṭai tlaivar Programme an hmang a. Zan dar 10 aṭanga ṭanin unit tinah he hun hi zing dar 5 thleng hman a ni.