Rev RF Tucker(95)[/caption]
Tlaikhaw hnu-a kan hriat angin Baptist Missionary Society (BMS) in Mizoram a Missionary an rawn tirh la dam awmchhun pahnih zinga pakhat - Mizo ten Zopari Pa emaw, Pu Truck-a tia an koh, Rev R.F. Tucker chu January ni 31, 2016 Pathianni tlai khan kum 95 mi niin Lalpa hnenah a chawl ta. February ni 15, 2016 khian a chenna St Jones Home-ah Baptist Pastorin a vui liam ang. Mizoram Baptist Kohhran chuan Pu Tucker-a thihna ah hian tuarpuina leh Mizoram Kohhran tana a hnathawh tawhna avanga lawmthusawina lehkha, a fanu Zopari hnenah an thawn a, a fanu Zopari pawhin kan tawngtaisak thinna avangin Mizo kohhrante hnenah lawmthu a sawi a ni.
Rev. RF Tucker hi kum 1945-ah Mizoram Baptist Kohhran-in Bible School dinpui tur mithiam rawn thawn tura BMS an dil chu rawn chhangin Pu Truck-a te nupa chu a rawn tir a. A rawn thlen kum atang hian hma la nghalin 1946-ah Serkawn-ah Jubilee Bible School chu a lo din ta a ni.
Tin, Lunglei leh Chhim Bial tana a hna thawh pawimawh tak chu Mizoramah High School pakhat chiah - Aizawl-ah a la awm a, chhim lamah a la awm loh avangin Lunglei High School chu BMS Missionary pahnih Rev. RF Tucker-a leh H.W Carter(Pu Kara) te nen an din leh a, chutah chuan Principal hmasa ber a niin Pu Kara chu Science Teacher hmasa ber a ni thung. Lunglei High School chu Assam Sorkar-in a rawn pawm a, Sorkar-in a enkawl chhunzawm ta a ni.
Kum 1951 thleng Jubilee Bible School leh Lunglei High School a enkawl hnu-ah 1951-ah sap ram lamah an haw thla a, 1961 kum tir-ah lo chhuak lehin February 8,1961 Serkawn-ah Kristian High School (tuna Baptist Higher Socondary School) hi a rawn din leh a, Principal hmasa ber niin hun rei lo te a awm hman chauh tihin 1962-ah a retired a, sap ram lamah a haw leh ta a ni.
A sulhnu leh a hnathawh te avangin Mizoram Baptist Kohhran chauh ni lovin, Mizoram leh Zofate, a bik takin chhim lam tan mi pawimawh leh zirna sang zawk kai thei tura chhim lam zofate min chawi chhuaktu pawimawh ber a ni kan ti lo thei lo vang.
.
