Mizoram Baptist Kohhran, Worship & Music Department Committee chu tunkar Nilaini, November 4, 2021 khan Sap Upa leh Pu Buanga Hall, Serkawn-ah an thukhawm a, Meeting hi Rev. Dr. V. Laldingliana, BCM President-in kaihruaiin, Rev. Lalremsiama Ralte, Worship & Music Director-in report tlangpui a pe.
Director report-in a tarlan danin, Kuminah Covid hrileng avangin Programme duan sa tih theih loh tam tak a awm a, hetihlai hian Communications Department, Audio Visual Production te nen tangkawpin BCM Choir Bihchianna Programme hman a nih thu te, BCM Belthei-ah Music Training leh Crusade Pu Muansangpuia hova neih a nih thu te, BCM New Salem, Chawngte-ah Thlai puala Music Training neihpuiin Pu R. Laltanpuia tirh a nih thu a tarlang a. Ni Pawimawh Programme Bu 2022 buatsaih pawh zo tawhin, Printing Press lamah dah mek a nih thu a tarlang.
Meeting thurel langsar zingah Worship & Music Department Plan leh Budget 2022-2023 ruahmanin, Zaipawl Meet buatsaih, Praise & Worship Programme, BCM Choir lo ni tawhte pual Programme siam te, Christmas Carrol buatsaih te, BCM Choir, Aizawl leh Lawngtlai Area Baptist Choir te nena Combine Music Video siam rawtna te, Diploma & Certificate in Church Music zirlai te tan Scholarship siam tura ruahmanna te ngaihtuahin an pawm a. Heng bakah hian Worship Training, Music & Silfa Training te, Worship Trainers Training neih tura ruahmanna an pawm bawk.
