He film ah hian TKP Unit hrang hrang atangin member te an chang a, langsar zual deuh zingah Rosy K. Remsangpuii, Bethsy Lalrinsangi leh Mapuia Chawngthu (Leitlang Pictures) te hi sawi hmaih chi an ni awm lo ve. Anni bakah hian film lama sulhnu lo nei tha tak tak tawh te an chang nual bawk.

He film hi True Story based niin Mizo nula pahnih Phai ram a job agency kaltlanga hnathawk tura chhuk te chungchang a ni a. Mahse an hnathawhna hmunah Vai nu thinchhe tak lo awm vanga hnathawhna hmun sawn tum, chuta hna thar thawh tur kawhhmutu in nawhchizawrhna hmuna a hralh chanchin a tak tak behchhan a ziak a ni a. Hemi, ti hmuhnawm zual tur hian, hmeichhia an bum dan thin pahnih tar lan tel a ni. 'WHERE?" hi Mizo film ah Human Trafficking lam kaihhnawih film puitling hmasa ber a ni.

Director BV-a chuan, "Scene hrang hrang kan uluk em em a, action lang hrang hrang pawh a tak thei ang berin kan chang a, a changtu hrang hrangte an chhelin an taima a, an hahin an inpe em em a, film tha takah kan chhuah ngei kan beisei," tiin a sawi.

K. Lalawmpuia (OPa) MTKP hruaitu chuan, "Unit hrang hranga kan TKP member te, TKP la ni ve chiah lo te leh TKP over toh senior zawkte he film ah hian an chang a. Phut let nei miah lo leh rawngbawlna ani tih hriain hah tak leh mahni insengsovin an chang a, an inpekna a thukin a lawmawm hle a ni," tia sawiin MTKP Executive Member Pu OPa chuan, "Mizo mipuite Human Trafficking chungchanga zirtirna pek an nih theih na atana MTKP hmalak mekna peng pakhat he film buatsaihnaa tha leh hun, sum.leh pai sengtu zawng zawngte chungah lawmthu la sawi tak meuh a ni," tiin a sawi bawk.

He film hi kum 2018 kumtir lamah tlangzarh hman tum a ni.

src: Gilbert Renthlei @ Lunglei Chanchinthar