Kan hotute Programme:

Rev. H. Sangchema (President) Rev. H. Lianngaia(General Secretary), Rev. Dr.K.Lalrinthanga (AGS – Mission), Rev. R. Zohmingliana (Pastoral Coordinator )leh Rev. C. Ngurhnema (JBS Dean) te chu Theological Education Board Meeting, Aizawl-a an neih zawhah, vawiin Education Committee nang hmanin nizan leh tukinah te an rawn haw a. Naktuk zan atangin MBF Conference-ah an tel chhunzawm leh nghal ang.

Committee dawn:

Vawiin(April 24) hian Education Committee, BCM Committee Hall-ah neih mek a ni a,  hetah hian BHSS-a zirtirtu hna ruak diltute interview neih a ni ang. Naktuk April 25, dar 10:30-ah Mission Board Meeting neih a ni ang a, naktuk vek hian HATIM Lunglei-ah HATIM Governing Board Meeting an neih a ni bawk ang, April 28 (Thawhtanni) ah Administrative Committee neih a ni ang a, a tuk, thawhlehni-ah Medical & Health Department Committee leh Revival & Evangelism Meeting a awm leh dawn a ni.

Lawngtlai - Saiha kawngah Poster Crusade: BCM Recognised team zinga mi Evangelical Revivalistic Ministry chuan April 23-27, 2014 chhung hian Lawngtlai leh Saiha inkar kawngpui dungah “Bible (Pathian thu) ah i kir ang u” tih thupui hmangin Poster Crusade an nei mek.

MBF General Conference nei dawn:

Kan tarlan tawh angin Mizoram Baptist Federation (MBF) chuan a vawi khatna atan Lunglei Chanmari Biak inah naktuk, Zirtawpni zan atanga Pathianni zan thleng Conference an nei dawn. Conference thupui atan ‘Inpumkhatna’ (Johana 17:11) hman a ni ang. MBF hi 2012-a din tan a ni a Mizorama Baptist Principle kengtu Kohhranhote inzawmkhawm ‘Mizoram Baptist Federation’ (MBF)tih hmingpu-a din a ni. (Read More)

Buhfaitham Pathianni (April 27):

28th April 2013 hi Mizoram Baptist Kohhran Ni pawimawh (Special Sunday) “Buhfaitham Pathianni”a ni a. Hemi pual hian Mizoram pumah Baptist Kohhrante chuan an hmang dâwn a ni. Pathianni Chawhma Inkhawm-ah Headquarters atanga thupui thlan sa ‘Lalpa tana thilpek’ (I Chro.29:14) tih thupui hmangin Pathian thuchah ngaihthlak a ni ang a. (Read More)

Kolasib Diakkawn Kohhran thar leh Biak in thar:

Kolsaib Kohhran atangin Diakkawn Kohhran an indang dawn a. Naktuk, April 25, 2014 (Zirtawpni) hian Kohhran thar hawnna leh Biak in thar hawnna inkhawm n eih a ni dawn a, bialtu pastor Rev. Zonunvula Ralte  leh Aizawl Area ES, Rev.Dr. V.Laldingliana an hmanpui ang.  He Kohhran thar-ah hian Member 200 chuang zet an awm nghal dawn a ni.

Sunday School Programme:

Christian Education Department chuan April 26-27, 2014 hian Haulawng Pastor bial leh S. Vanlaiphai Pastor bialah te programme neiin an feh chhuak dawn a. Haulawng bialah hian Rev. V. Vanlalchhunga , Christian Education Department Director leh Upa M.Thansiama (Sunday School Trainer) te kalin Sunday School Seminar bakah Intermidiate Meet an neih pui ang a. S. Vanlaiphai bialah hian  Sunday School Promoter, Pi H. Lalkimi leh Counselling Organiser, Nl.Daisy Zomuani te an kal thung ang.

Missionary Accident te kha:

Mission Platinum Jubilee hmang tura lo kal Missionary CT. Lalruatthanga te nupa (B. Vanlalpari) Bike Accident tawkte kha damdawi in atangin an chhuak fel ta a. Doctor-te rawn angin in lamah hahchawl hlekin May thla tir hian an thawhna hmun Damparengpui lam pan leh theih tawh in inbeisei. An chhiatttawh avanga tawngtai leh thilpek hmanga Kohhranhote hmangaihna lantir ropui an tihzia thu kan palai an hrilh a, an lawmzia thu an sawi.

Evangelist-te Programme:

Kan hriat theih chinah Evangelism programme hetiang hian neih mek a ni-

1. Gospel Immanuel Team        - (Speaker : Evan. PC.Lalrinawma) - Saizawh West-ah

2. Gospel For All   Team          - (Speaker : Evan.F.Lalnuntluanga) - Moria, Serchhip-ah