Sunday School, kum tawp Exam
December 2, 2012 Pathianni hi Mizoram Baptist kohhran chuan Sunday School kum tawp Exam Ni atan a ruat a. Kohhran tinah Exam hi neih a ni ang. BCM Christian Education Department chuan Exam Question siamin Pastor Bial kaltlangin Kohhran tinah a thawn chhuak fel tawh a ni. Senior ‘B’ Question chu Pathianni hmasa khan zirlaite hnenah sem chhuah a ni tawh a, mahni in lamah a bu leh Bible hmangin chhan tur a ni a, cn chhanna chu Exam ni-ah hian an theh lut ang. Begginers Department atanga Senior ‘A’ te chuan tun Pathianni-ah hian exam an bei dawn a ni.
Bible Sunday
December 2, Pathinni hi Kohhran ni pawimawh Bible Sunday a ni a. Zing leh zan inkhawmah thupui neiin thuchah sawi tur ruahman a ni a. Zing inkhawmah ‘Pathian thu chu a nung’ tih leh zan inkhawmah ‘Pathian thu chuan thil a tithei’ tih thupui hman a ni. Vawiin inkhawm thawhlawm hi Bible Society-ah thehluh tur a ni. (Read More)
President Shillong-ah
BCM President, Rev.Dr. Raltawnga chu Wicliff Bible Translation buatsaih Bible lehlin chungchanga Inrawnkhawmna, November 29-30, 2012 hian Shillong bul Barapani-ah a tel a. President hian Pathianni hi Shillong-ah hmangin karleh thawhtan-ah a lo haw ang.
Bualpui V Centenary-ah AGS Service leh Editor kal
Bualpui ‘V’ Kohhran chuan November 30-December 2, 2012 chhung hian Kohhran Centenary an lawm dawn a. He hun hmanpui tur hian AGS i/c Service, Rev. C. Ngurhnema leh kan Editor, KMS.Dawngliana te bakah Baptist Choir leh zaithiam eng emaw zat an kal dawn.
Christian Counselling Centre insawn
BCM in taksa, rilru, thlarau chhanchhuahna atana a buatsaih Christian Counselling Centre (CCC) chu Lunglei Civil Hospital bul atangin Chanmari Biak in Opposite, Pu Lalhmingliana Building chhawng chung berah an insawn fel ta a. Nun kawng hrang hranga harsatna neite tan ni tin (Mon-Fri) 10:00AM- 4:00PM) chhung pan theih a ni e. A hmuna kal remchang lo tan pawh phone number Daisy-i (9436157309) leh S>ni (8730097001)-ah te hian englai pawhin biak theih reng an ni e.
HATIM Drive Aizawl-ah
December 2, Pathianni hmang hian HATIM Campus Development drive Aizawl khawpui chhung Biak in hrang hrang10-ah HATIM Campus Development drive pualin hun hman a ni dawn a. Lunglei atangin AGS itc Mission, Rev.Dr.K. Lalrinthanga, Education Director, Rev. H. Sangchema, HATIM Principal, Dr. Chawngthanapri leh Upa C. Thanseia te an kal a. Zingah leh zanah hun an hmang ang.
Nurse zirlai tharin lukhum khum
Christian Hospital Serkawna Nursing School zirlai batch tharte puala lukhum khum inkhawm vawi 63-na (Capping & Lamp Lighting Ceremony) chu CHS Chapel-ah November 27 khan neih a ni a. BCM General Secretary, Rev.H. Lianngaian khuallian niin a hmanpui a. AGS itc Service, Rev. C. Ngurhnema pawhin thu a sawi. (Read More)
MTKP Hruaitute Programme
NCCI Commission on Youth leh Ecumenical Christian Centre tangkawp buatsaih National Ecumenical Consultation leh NCCI Commission on Youth, National Executive Meeting-a tel turin MTKP Orgsaniser, Rev.Samuel Lalremsanga chu Bangalore-ah a thang mek a. He programme hi December 2-4, 2012 hian White Field, Bangalore-ah neih a ni ang.
November30-December.02, 2012 hmang hian Lungrang Pastor bial TKP chuan Rualalung Biak inah inkhawmpui an nei dawn a. Speaker atan MTKP Sr.Adviser, Upa R. Lalduhawma hmangin thupui chu ‘Pathian beisei rawh’ tih a ni ang. Tin, Falkawn Unit TKP Crusade- ah Speaker atan Pu PC. Vanlalrova (VP) a kal bawk ang.
West Phaileng-ah Ariel Biak in hawng
December 1, 2012(Inrinni) khian West Phaileng khaw chhung, vengchhak lama awm Mizoram Baptist Kohhran Ariel Biak in chu bialtu pastor, Rev.K. Lalmuanpuia’n a hawng dawn a. Tlaiah Kohhranhoten Biak in thar lawmna ruai an kilho nghal ang. Tihian West Phaileng khaw chhungah BCM Biak in 4 a ding dawn ta a ni.
MTKP Inkhawmpui Pandal sa tan dawn
Kum 2013 March thlaa Mizoram TKP Inkhawmpuina tur Pandal chu naktuk (December 3, 2012) hian Haulawng mualah sak tan a ni dawn ta. Zing dar 10-ah bialtu Pastor, Rev. H. Lalfakzuala hovin inkhawm tawi buatsaihin bul tanna neih tum a ni.
.............
