Mizoram Baptist kohhran, Assembly 2021-in Mizorama Chanchin tha thlen champha phak vawi 125-na hriatrengna atan Mission Field thar hawn ni se ti-a lo passed angin, Upper Assam Mission Field thar chu May 30, 2021 (Pathianni) chawhma dar 11:00 hian hawn a ni dawn ta. Upper Mission Field thar hawnna hi a hmun-ah kalin hawnna Programme buatsaih tum a nih lain Covid-19 hrileng avangin ruahman angin tih theih a ni ta lo va, biakhmuhtheihna kaltlanga hawn a ni ang a, Youtube kaltlanga en theih a ni ang.

Field thar hawnna inkhawm hi Rev. K. Lalnunsanga, Regional Director, Guwahati Region-in a kaihruai ang a, Rev R. Lalthangliana, Mission Director-in Upper Assam Field hawn a tulna leh pawimawhna te sawiin Rev James Zorammawia, Field Director, Arunachal far East-in Field hawn tura inbuatsaih dan report tlangpui sawiin Field thara thawk tur te inhmelhriattirna inkhawm hruaitu in a nei ang. Rev. Dr. C. Vanlaldika, AGS – Mission in Field thar hawnna neiin, Rev Dr. V. Laldingliana, BCM President-in Pathian hnenah Field thar hlanna tawngtai a nei ang a, Rev. F. Ramdinmawia, General Secretary-in thuchah a sawi ang a, Nl J.Lalrempuii leh Guwahati Region-a Missionary-ten zaia rawngbawlna nei in, Rev. R. Lalbiakliana, AGS – Service-in Lawmthusawina leh Malsawm tawngtaiin Inkhawm a khar ang.

Upper Assam Field hi Guwahati Region hnuaiah awmin Field Director atan Rev HS Lalramnghaka dah a ni a, March 28, 2021 khan tirhchhuah niin, May 12, 2021 khan an chhungkua-in Field thar hi an thleng tawh a, tunah hian Field Headquarters Diprugarh, Assam-ah an awm mek a ni.

Field thar hawnna programme hi BCM Youtube Channel-ah, May 30, 2021 (Pathiani) Chawhma dar 11:00-ah pek chhuah a ni ang.