Upa M.S.Dawngliana Zongte, Archivist, BCM Headquarters Office chu December 1, 2024 atang khian Superannuation pension-a a chhuah dawn tak avangin BCM Headquarters Office-a a thawhpui ten November 26, 2024 (Thawhlehni)chawhnu dar 2:30 khan BCM Hall-ah amah thlahna an nei.
Upa M.S.Dawngliana Zongte thlahna inkhawm hi Upa K. Lalrohlua, Finance Director-in kaihruaiin, Nl. Lalrammawii Thangluah-in Pathian thu chhiarin tawngtaina a nei a, Rev. Dr. R. Lalbiakliana, General Secretary-in BCM aiawhin thlahna thu a sawi a, Assembly aiawh leh Staff Welfare aiawh ten ngaihhruihna thilpek an hlan zawhah Upa Lalbiakthanga Chawngthu-in Office Staff Welfare aiawhin leh Upa MS Dawngliana te nupa in thu an sawi bakah Office-a a thawhpui te leh hotute hnen atangin a chanchin leh uina thu sawi hrang hrang ngaihthlak a ni bawk. Rev. H. Lalfakzuala, MBMP Secretary-in a rawngbawlna avanga lawmthusawina leh malsawm tawngtaiin hun a khar ta a ni.
Upa M.S.Dawngliana Zongte hi August 1, 1990-ah Relief & Development Deparmtent-ah Coordinator-in a thawk tan a, kum 2001-ah Director ah hlankai niin, kum 2016-ah Manager BCO ah dah a ni a, April, 2019-ah Headquarters Office-ah Archive & Library enkawl turin dah ni lehin, a pension thlengin Archivist hna hi a thawk ta a ni. Fapa hlir pali neiin, anmahni in, Ramzotlang, Serkawnah an khawsa a ni.
