Upa K. Lawmsanga (Kum 65) Ambassador for Christ Team Speaker chu vawiin, April 5, 2022 (Thawhlehni) zing zing dar 3:10 khan Lungphu chawl avangin a boral a, hemi ni vek chawhnu dar 11:30 ah BCM Biak In Durtlang, Aizawl-ah vuina Inkhawm neihpuiin, Durtlang thlanmual-ah ropui taka thlah liam a ni ta.
Up K. Lawmsanga thlahna hi zing dar 10:00-ah in lamah neiin, Upa J. Lalsawta’n a kaihruai a, hemi hnu hian Biak In lamah Vui inkhawm neih a ni a. Rev. Dr. F. Lalsangliana, Bialtu pastor, Ramhlun Bial-in vui inkhawm a kaihruai a, Upa Dr. C. Lalzuithanga, Secretary, BCM Durtlang leh Upa Lalchhuanawma Hrahsel, Chairman, Ramhlun Pastor Bial ten a rawngbawlna chanchin sawiin, Upa K. Chhawnthuama’n chhungkaw aiawhin thu a sawi a, Vuitu Pastor-in Thuchah a sawi bawk. Vui Inkhawm zawh hian Thlanmual lamah kalpui a ni a. Thlanmualah hian Upa H. Lallungmuana’n tawngtaina-in a thlah liam ta a ni.
[caption id="attachment_21123" align="alignright" width="218"]
Upa K. Lawmsanga & a Nupui Pi F.Lianzari[/caption]
Upa K. Lawmsanga hi Pu K. Thangluaia leh Pi J. Lalzami te fa panga zinga a naupang ber niin, November 21, 1957-ah Thiltlangah a piang a, kum 1977 ah a nupui Pi F. Lianzari nen inneiin, fanu pathum leh fapa pakhat neiin tu 6 an nei a ni.
Upa K. Lawmsanga hi Thlarau bo vei mi leh rawngbawlna ngaipawimawh em em mai a ni a. Nupui a neih hnu lawkah an fa hmasa ber an pai laiin an nupa-in Mire ram, Chittagong Hill Track (Bangladesh)-ah Missionary (Volunteer)-in an kal a, kum thum an awm hnuin Malaria in a tlakbuak tak avangin an lo chhuak leh a. Kum 1982-ah Ambassador for Christ, Evangelistic Team-ah Speaker niin Zoram dung leh vangah rawngbawlin an feh chhuak thin a, an team kaltlang hian Thlarau bo tam tak Isua hnenah hruai an ni thin. Kum 1989-ah Rawngbawltu-ah thlan a ni a, kum 1991-ah Kohhran Upa atan nemngheh a ni. Kum 2017 khan Carlson Theological Seminary chuan a rawngbawlna avanga chawimawina atan B.Min (Bachelor of Ministry) Degree leh 2018 ah M.Min (Master of Ministry) Degree te a lo hlan tawh nghe nghe a ni.
Upa K. Lawmsanga hi Evangelistic Team-ah a in hman mai bakah Tualchhung Kohhran, Bial leh ABC thlengin rawngbawlna hna pawimawh tak tak chelhin Kohhran khaipa leh ban pawimawh te zing a mi a ni a, Assembly Committee hrang hrangah pawh Committee member a lo ni tawh thin a ni.
Upa K.Lawmsanga hi mi hrisel pangngai tak a nih laiin, kum 2014 khan Minor Heart attack vangin Durtlang Hospital-ah dahin ICU-ah enkawl hial a ni a, chumi hnu-ah lo tha chhuak lehin 2021 ah hemi vang tho hian Civil Hospital, Aizawlah enkawl leh a ni a, a that chhuah leh hnu-ah tun tumah hian April 4 khan Heart attack vang bawkin Civil Hospital, Aizawl panpui leh a ni a, April 5, 2022 zing dar 3:10 khan a rawng a bawl thin, Lalpa hnenah min lo haw san ta a ni.
Mizoram Baptist Kohhran chuan BCM Recognised Evangelistic Team - Ambassador for Christ Team, Speaker ropui leh hlu tak Upa K. Lawmsanga a chan ta hi a sun tak zet a, a kalsan a nupui leh a tu leh fate Lalpa’n thlamuanin awm pui zel se tiin, ui tak chungin a thlahliam ta a ni.
