Upa Dr. KL Biakchungnunga(Ma-a), Principal, BHSS chuan Lungna(heart problem)ย leh kal tha lo (Kidney failure) vangin June 13, 2016 (thawhtan) zing dar 8:30- khan Ropuina ramah min haw san ta. Vawiin, June 13 vek hian a ruang hi Aizawl atanga rawn hawpui a ni ang a, zaninah tlaivarpuiin naktuk, June 14, 2016(thawhlehni)- dar 12:00-ah Kohhran Upa a nihna angin amah thlahna inkhawm neihpui a ni ang a, Serkawn thlanmualah vui liam a ni ang.
Upa Dr.KL Biakchungnunga(Ma-a) hi April 23,1964-ah Rev.KL Vanngaia leh Pi Tlangmawii te inkarah a piang a. Zirna lamah a taimakna piah lamah mi bik (special person) a nihna lo langin lehkha thiamthei te zingah chhiar tel zel a ni. Zirnaah hian a graduate hnu-ah Pathianthu lamah pawh experiance neiin M.Div a zir zo va, M.A, M.Phil tha taka a zawh hnu-ah Ph.D pawh tha takin a zo leh a ni.
July 1,1996-ah BHSS -ah Lecturer atan substantive post-ah lak niin Mizo subject a zirtir a. BCM Assembly-in Serkawn-ah English Medium School din ni se ti-a a rel angin BES chu din chhoh a ni a, kum 2001 -ah Deputation-in BES Headmaster-ah ruat a ni leh a. BES-ah hian 2003 thleng a thawk a. 2003 Assembly Nomination Committee-in BHSS Principal atan a ruat a. Kum 2008 January thleng Principal hna hi thawkin Doctoral Study (Ph.D) zir turin Delhi-ah a kal leh ta a ni. Ph.D a zir zawh hnu-ah 2012, January 16-ah BHSS -ah bawk rawn kir leh-in 2016 BCM Nomination Comt.chuan 2016-2019 term atan BHSS Principal-ah a ruat leh a. April 12-a BCM hruaitu tharte Charge inhlan hun a thlen hma ni 2/3 chauh a la awm tihin a natna hian a rawn tlakbuak ta a, Christian Hospital, Serkawn-ah hun engngemawchen enkawl a nih hnu-in Aizawl lamah phurh phei niin Civil Hospital-ah enkawl chhunzawm a ni ta a ni.
Mizoram Baptist Kohhran-a mi tangkai leh mi hlu bik a nihna te, a rawngbawlna hmun School lama a hnathawh ropui tak te, a lawina Kohhran tana mi chhuanawm leh thalaite entawn a nihna te, Zoram dung leh vang mai ni lo, India ram leh khawvel hmun hrang hranga a rawngbawlpuite leh a rawngbawlna avanga amah hrechiangtu thalai tam takte tan channa nasa tak a ni.
Mizoram Baptist Kohhran chuan Upa KL Biakchungnunga thihna hi a sun takmeuh a, BCM History-ah a chanchin hian hmun a awh reng tawh dawn a ni. A kal san a chhungte leh a rawngbawlpui zawng zawng te Lalpaโn thlamuan zel rawh se.
