Mizoram Baptist Kohhran, Headquarters Office, Serkawna Driver Senior ber, tuna Despatch-a awm ta Tv.C. Zonunsanga(54), S/o Upa C. Thangdula(L) Lunglai Bazarveng, chu Lung(Heart) leh Kal(Kidney)failure vangin tukin June 19, 2016 zing lam dar 3:00 khan Christian Hospial Serkawnah thiin Ropuina ramah min haw san ta. Vawiin dar 1:00 pm hian a chenna inah vui a ni ang a, Bazarveng thlamualah thlah liam a ni ang.
Tv. C Zonunsanga hi October 10, 1962 ah Upa C Thangdula leh Pi Thankhumi Hnamte te inkarah an fa hming koh niin a lo piang a, unau pianpui Mipa 3 leh hmeichhia 2 a nei. Kum 1987 November 1 ah BCM Driver hna a thawk tan a. 2015 ah senior a nihna zah sak chung leh a hriselna lam dinhmun avangin Motor khalh lo zawngin Despatch ah dah a ni a, a thihni thlengin he hna hi phur leh thahnemngai takin a thawk a ni.
Mi inngaitlawm leh inthlahrung tak mai a ni a, chutiang ni mahse a duty leh a hmaa tih tura lum chu hlenchhuah tum tlat mi a ni. Titi thiam leh kawm nuam tak a nih bakah a tlawmngai em em a. Dik taka thil tih duh mi a ni a, beisei loh anga mi an awmin tu pawh ni se huaisen takin a khak ngam a, a hnaah a tuiin Motor khalh phei chu a thiam em em a, a motor chan apiang duat leh uluk takin enkawl thin. Office timing a vawng tha em em a. Harsatna lian tak vang a nih loh chuan office a tlai ngai lova, ban hun hmain a chhuak ngai lo a ni.
Kal(kidney) problem a neihna hi a rei tawh hle a. Chuti chung chuan a theih hram chuan office a kal luiin a na a sawi zen zen ngai lo. Tun tumah pawh hian dam lovin leave ni 3 a la a, hlim takin office chu June 16 ah kalin nilengin hna a thawk a. Zan dar 10:00 velah anmahni inah luhaiin a lo tlu a. Damdawiin panpui vat a ni a, mahse a natna hi a lo ril em avangin chhan theih a ni ta lo a ni.
Tv Zonuna thihna hian Mizoram Baptist Kohhran pumpui a nghawr chhuak a, a sun takzet a, mihring te ngaihah hun lo hle-in hre mah ila, rawng a bawl sak thin a Lalpa chuan khawvel hrehawm a tuar phal tawh lovin a hnenah a lo hruai ta zawk a ni. A kalsan a uanaute leh lainate a thlahthlam lovang tih kan ring tlat a. Lapa thlamuanna leh awmpuina an chan zel theih nan BCM chuan rampumah kan tawngtaipui a ni.
