April 5, 2020 (Pathianni) kha Kristiante ni pawimawh – Tumkau Pathianni (Palm Sunday) a ni a. He Ni hi khawvel pumah Kristiante chuan urhsun takin kan hmang thin a, Mizoram Baptist Kohhran pawhin Kohhran Nipawimawh zingah telhin kum tin he ni hi urhsun takin kan hmang thin a ni. Kumin Tumkau Pathianni thupui chu ‘ Isua, mi zawng zawng Lal (T.T.10:36) tih a ni.
Kuminah hian hri leng – Corinavirus (Covid-19) avangin Khawvel pum-ah kan buai a. India ram leh Mizoram-ah pawh he hri leng laka inven nan pun khawm leh pawn chhuah khap a nih avangin, Kohhran Inkhawm Programme pawh neih theih a ni ta lo va. Chuvangin he Tumkau pathianni pawh hi kum danga kan hman angin kan hmang thei ta lo a ni.
Amaherawhchu, Khawtlang leh Kohhran hruaitute ruahmanna-in Khaw tam takah chuan Kohhran pawl hrang hrang te insiamremin YMA tlangauna hmangin Tumkau Ni hi a rualin hman a ni hlawm a. Mahni in leh kawtkaiah te Tumkau kengin YMA Aurinna hmanga au hla an puan chu zawmin Pathian chawimawiin an au rual a, khaw tam takah chuan Kohhran leh KNP hruaituten Aurinna hmangin kawthler hmun rem lai ah inhlat taka ding in Lal Isua chawimawina au hla an kaihruai bawk.
