April 5, 2020 (Pathianni) hi Kristiante ni pawimawh – Tumkau Pathianni (Palm Sunday) a ni a. He Ni hi khawvel pumah Kristiante chuan urhsun takin kan hmang thin a, Mizoram Baptist Kohhran pawhin Kohhran Nipawimawh zingah telhin kum tin he ni hi urhsun takin kan hmang thin a ni. Kumin Tumkau Pathianni thupui chu ‘ Isua, mi zawng zawng Lal (T.T.10:36) tih a ni ang.
Kuminah hian hri leng - Corinavirus (Covid-19) avangin Khawvel pum-ah kan buai a. India ram leh Mizoram-ah pawh he hri leng laka inven nan pun khawm leh pawn chhuah khap a nih avangin, Kohhran Inkhawm Programme pawh neih theih a ni ta lo va. Chuvangin he Tumkau pathianni pawh hi kum danga kan hman angin kan hmang thei dawn ta lo a ni. Amaherawhchu he Ni hi mimal leh chhungkuaah theih ang ang a Pathian chawimawina hun atan hman theuh i tum ang u.
Kum 2012 hma lam kha chuan Tumkau Pathian ni hi BCM Ni pawimawh (special days programme)-ah telh hranpa a ni lo va, amherawhchu he ni hi Kohhran hoten nipawimawh bik a nih angin Kristian kan nih hnu atangin urhsun takin kan lo hmang tawh thin a ni. Kristiante ni pawimawh, a ni leh thla pangngai reng lo chi (movable feast) an tihte zinga pakhat a ni a, March leh April thla chhunga thleng thin a ni. Kum 2012 atang khan BCM Ni pawimawh programme-ah telhin Headquarters atanga thupui thlan sa hmangin he ni hi hman chho zel a lo ni ta a ni.
