Lib.Pic: Palm Sunda 2018:: Serkawn KNP[/caption]
Kum 2012 hma lam kha chuan Tumkau Pathian ni hi BCM Ni pawimawh (special days programme)-ah telh hranpa a ni lo va, amherawhchu he ni hi Kohhran hoten nipawimawh bik a nih angin Kristian kan nih hnu atangin urhsun takin kan lo hmang tawh thin a ni. Kristiante ni pawimawh, a ni leh thla pangngai reng lo chi (movable feast) an tihte zinga pakhat a ni a, March leh April thla chhunga thleng thin a ni. Kum 2012 atang khan BCM Ni pawimawh programme-a telhin Headquarters atang thupui thlan sa hmangin he ni hi hman chho zel a lo ni ta a ni.
(Kumin-a BCM calendar-ah hian April 14 hi "Tumkau Pathianni/Martarte Ni' ti-a chhut kai palh a ni a. Martarte Ni ni hi March 31-a hman tawh kha a ni a, April 14-ah hian "Tumkau Pathianni" hi hman tur chu a ni. Admin)..........
Thuchah : Tumkau Pathiani
Tumkau Pathian ni hi Lal Isua, Jerusalema lal a nih anga a luh ni hriat rengna ni a ni a. Pathian ni a nih bakah Kristiante tan ni pawimawh bik, Lal Isua lal a nihna puan chhuah thar lehna hun leh amah chawimawina ni atan hman a ni. Hetianga hmang hmasa bertute chu Jerusalem kohhran an ni a, kum zabi 4-na tawp lamah an hmang tan chauh niin sawi a ni. A tak taka Lal Isua Jerusalem-a lal anga a luh atanga kum 300 hnu daihah he ni hi serh tan a ni chauh tihna a ni.
Tumkau Pathian ni hi ‘Hnehna nena (Jerusalema) luhna ni’ (Triumphal Entry) ti pawhin sawi a ni bawk. He hun hi a pawimawh em avangin Chanchin Tha bu ziaktu palite hian an ziak theuh a ni (Matt.21:1-17; Marka 11:1-11; Luke 19:28-42; John. 12:12-14). A pawimawhna chhan chu:
1) He khawvela a awm chhunga vantlang hriat khawpa langsara Jerusalem khua a luh chhun a ni. 2) Tisaa a awm chhunga mipui vantlang chawimawi a hlawh ve tum a ni. 3) Vantlang hriata Lal a nihzia tarlana a awm tum a ni.He ni ropui takah hian mipui zinga a tam zawkin Lal Isua kalna kawngah chuan an puante an phah bakah thinga mi chhawl an sat a, an phah bawk tih Matthaia chuan a sawi a (Matt.21:8). Johana chuan Jerusalem mipuiten tumkau kengin an hmuak, a ti a (John 12:12-13). Lal Isua chu Galili ram atangin a thilmak tih hmutu tam takin an rawn zui a, Jerusalem khawpuia cheng, amah ringtute’n an lo hmuak bawk a, amah rawn zuitute leh lo hmuaktute chuan rilru hmun khatin Lal Isua chu an theih tawkin an chawimawi a ni. Chutianga amah ngaisangtuten an chawimawina chu chhunzawmin, tumkau/hnahchhawl chawiin Lal Isua chawimawina kawng zawh hi Kristiante zingah neihzui a ni ta zel a ni. Tumkau Pathian ni-ah hian Lal Isua chawimawia tumkau nena kawng zawh hi naupang (KNP) tih turah kan dah deuh niin a lang a, a tawk lo hle. Jerusalem chhehvela mipui, Lal a nihzia la hre chiang tak tak lotute mahin khati khawpa an chawimawi chuan, keini a hre chiangtu, thinlung tihvar tawhte hian theihtawpa chawimawi hi kan tih ngei tur a ni.
Read Story & Message: Tumkau Pathianni
