Vawiin, August 28,2015 hian a thawh hnihna atan ‘Training of Trainer on HIV/AIDS’ chu Lunglei District huamchhunga Group hnihna 'Lunglei North Group' huapin BCM Venglai Biak Inah an nei ve leh dawn. He Programme hi MTKP Rorel 2015-a an pass, ‘HIV/AIDS chungchang inzirtirna kawngah hma lak nise’ tih bawhzuina kal zelah MSACS leh World Vision te nen tangkawpa buatsaih a ni.
A thawh khatna chu nimin, August 27,2015 (Ningani) khan Lunglei South Group pualin BCM Lunglawn Biak In, Lungleiah he programme hi hman a lo ni tawh a, TKP Unit hrang hrang atangin mi 60 vel an tel a, MTKP hruaituten he hun hi an hmanpui bawk.
He seminar a presentation a tarlan danin Mizoram a thisen test zawng zawng 3,12,768 atangin HIV hrik pai mi 10,093 hmuh chhuah anih thu tarlan a ni a. Heng zinga 69.28% chu Sex atanga kai an ni a, Drugs avangin - 24.57%, Nu atangin naute-ah - 3.60% leh kaina chiang lo 2.56% an awm thu tarlan a ni. Population atanga HIV hrik pai hmuhchhuah tam lamah Nagaland chu pakhatna niin 0.88% a ni a, pahnihna Mizoram chu 0.68% niin, pathumna Manipur chu 0.64% a nih mek thu tarlan a ni bawk.
MSACS Asst. Director MS. Dawngliana chuan, HIV hrik pai hmuhchhuah tam ber chu General population zing atang a nih thu a sawi a, za zela 90% vel zet a tlin phak thu a sawi.
He training ah hian thupui then pali hmangin zirtirna pek niin, MSACS lam atangin Asst. Director MS. Dawngliana’n ‘Basic of AIDS’ tih thupui hmanga zirtirna pein, ‘Inngaihzawnna leh thalaite’ - Jacob Lalruatpuia, MSACS ten zirtirna an pe a. ‘Tunlaina leh Sex’ tih thupui hmangin Pu Laltholeha Chhakchhuak, MTKP Executive member leh Thalai Entu Editor chuan zirtirna a pe a, Rev Lianchhunga Khiangte, Organiser Social Concern Deptt. BCM chuan, ‘Sex hmansual leh leh Bible’ tih hmangin zirtirna a pe bawk.
Src: Lunglei Chanchinthar
