Mizoram Thalai Kristian Pawl (MTKP) Inkhawmpui 2016 neihna tur leh a dawltu tur Lawngtlai khawpui chhunga Kohhran hrang hrang Thalaite huapin Inkhawmpui nimin November Ni 11(Nilaini) khan khawpui chhung thenfai hnatlang an thawk.   He hnatlang hi zing lam Dar 10:30 atanga tanin Lawngtlai khawpui chhunga kawngpui dung leh kawmkar/tui luan kawr te hrut-in bawhhlawh an chhar/thian a. Thalai 500 rual zet an thawk chhuak a ni.  Lawngtlai Bazar Areopagy-ah tawpna hun tawi hman a ni a, Lawngtlai Area TKP Co-ordination Committee Chairman Rbt. R. Lalrintluanga'n kaihruaiin Pu Lallawmpuia, SDO Phe, Pu Hc. Vanlalruatpuia, Sanitation Officer LADC & GS CYLA leh Rev. H. Ramthianghlima-ten thusawina an nei a, Pu Sangkima SAY leader-in tawpna tawngtai neiin hnatlang hi tih tawp a ni. Sawi tawh thin ang khan Mizoram Thalai Kristian Pawl(MTKP) hian Inkhawmpui hi kum hnih danah neih thin a ni a. kum 2016, February 18-21 khian Lawngtlai-ah neih a ni dawn a, Inkhawmpui thupui tur chu 'Isua Krista - Mamawh chhanna" tih a ni ang. Hemi atan hian a dawltu tur Lawngtlai Pastor Bial 3 inzawmkhawm leh Lawngtlai Area TKP  Coordination Committee mai bakah Khawtlang Pawl hrang hrang leh Kohhran hrang hrangte an in buatsaih ngawrh tawh hle. Inkhawmpui Souvenir -  T.Shirt leh Hlabu pawh tun hnai khan an release tawh bawk.   Reports: Mc Lalsangliana Mapuia