Tunkar Pathianni, May 29, 2016 hi Mizoram Baptist Kohhran Ni pawimawh (Special Day) “TKP Ramthim Ni”a ni a. Kuminah pawh he ni hi TKP Unit hrang hrangah urhsun taka hman a ni leh dawn a ni. Kumina TKP Ramthim Ni thupui atan “I puan in hmun chu zauh rawh” Isaia 54:2 hman a ni ang. Kumin TKP Ramthim Ni hi Pathianni a nih avângin Tualchhung Kohhran leh Unit TKP ten an ruahman dan angin Pathianni zing inkhawm-ah emaw Pathianni zan lamah emaw remchang an tih angin hemi pual inkhawm programme hi an siam ang a, BCM Ni pawimawh Programme bu-a Inkhawm kaihhruaina duan sa bakah Unit-in tul leh tha an tih angin Programme an siam thei bawk ang.
He Ni pual Inkhâwmah hian thawhlâwm lâkkhâwm thin a ni a. Bial kal tlangin MTKP-ah thehluh thin a ni. Thawhlâwm hi Mission puala hman a ni ang a, Missionary-te leh Mission rawngbâwlna atâna tawngtaihona neih a ni bawk ang. Tawngtai thupuite chu inkhâwm hruaitu-in emaw Unit-in emaw tul leh tha an tih angin an buatsaih ang.
TKP Ramthim Ni Programme-a Headquarters hotute leh MTKP hruaitute hun hmanna tur kan hriat theih te lo tarlang ila:-- Rev. Dr.C. Vanlaldika, AGS i/c Mission - Shillong-ah
- Rev.B.Lalrinawma, Mision Co-ord.- Serkawn Kohhran(Zan)
- Rev. F. Ramdinmawia, G.S - Ramzotlang Kohhranah(Zan)
- Rev. Jc Vanlalluaia, Pres. MTKP - Bethel, Venghlun(Zing), Electric Kohhran(Zan)
- Rev. Lianchhunga Khiangte, Organiser - Bazar Bial Meet
- Rbt. Lalthangliana, V.Pre. MTKP - Gilgal,Theiriat(Zan)
- Nl. Zothantluangi - Fin.Secy, MTKP- Zotlang North(Zan)
TKP hian a din tirh atangin Ramthim veina lian tak a neih avangin Ramthim rawngbâwlna lamah pawh hma a la tan hma hle a. District TKP inkhawmpui hmasa ber, Oct 21-23, 1955 (Pukpui)-ah chuan Agenda “TKP hminga Thuhriltu tirh” tih hi ngaihtuah a ni a. Inkhawmpui vawi hnihna 1956 (Hnahchang)-ah pawh “Tuikuk Takam pual bik neih” tih thu rel a ni leh a. Mahni remchan angin Tuikuk-Takam pual hian hun an lo hmang thin a, thawhlawm an lakkhawm pawh Ramthim puala hman atan Headquarters-ah chhunluh thin a ni. Kum 1959-ah chuan ‘District TKP Tuikuk-Takam Ni’ atan October 5 (Thawhtanni) hman ni se tih a ni a, 1960-ah chuan September thla Thawhtanni hnuhnung ber hman ni se tiin rel a ni a, chumi kum-a September thla thawhtanni hnuhnung ber chu September 26 a ni.
September 26 hi hun rei tak chhung chu Ramthim pual atan hman zui a ni ta zel a ni. “Tuikuk-Takam Ni” tih chu huap zim deuha hriat a nih avangin 1969-ah chuan ‘Ramthim ni’ tiin thlak a ni. Amaherawhchu September thla hi Beirual thla a nih avangin TKP tana Ramthim ni hman hi a remchang tawk lo deuh thinin hriat a ni a. Kum 2006 MTKP (S.Vanlaiphai) Rorelna chuan May thlaah sawn nise tiin a rêl a. MTKP Executive Committee chuan bawhzuiin BCM-in ram pawna missionary a tirh chhuah hmasak ber, Rev.H.Rokhama-te nupa tirh chhuah ni, May 29, 1968 denchhenin May 29 hi TKP Ramthimni atan a ruat fel ta a. 2007 atang chuan kum tin TKP Ramthim Ni hi May 29-ah hman a lo ni ta a ni.
TKP leh Mission :MTKP, Bial leh Unit-in Mission Support an pe thin a, Mission Support pe hi an la pung zel a ni. MTKP hian missionary damlo leh tanpui ngaite tanpui nan TKP Ramthimni thawhlawm a dawn khawm atangin Mission Relief a sem ve thin bawk a ni. Heng bakah hian MTKP, bial leh unit ten Mission lama hma kan sawn theih nan thuzir tur te buatsaihin, mission consultation te neiin, work camp leh mission visit-te neih thin a ni bawk.
TKP Ramthim Ni-ah hian inkhawm buatsaih thin a ni a. Heta thawhlawm lakkhawmte hi Headquarters-ah chhung lutin Mission rawngbawlna atan hman thin a ni.
