Tunkar Zirtawp Ni – May 29, 2015 hi  Mizoram Baptist Kohhran Ni pawimawh (Special Day) “TKP Ramthim Ni”a ni a. Kuminah pawh he ni hi TKP Unit hrang hrangah urhsun taka hman a ni leh dawn a. Kumina TKP Ramthin Ni thupui atan “Li thuk lam pan rawh" (Luka 5:4) tih thu hman a ni ang a, Tawngtai thupui inkhawm hruaitu/Unit-in buatsaihin tawngtairualna neih a ni ang. Hemi ni (zan) Inkhâwm thawhlâwm chu Mission rawngbâwlna atân Headquaeters-ah thleh luh tur a ni.

TKP Ramthim Ni lo chhuah dan :

TKP hian din a nih tirh atangin Ramthim veina lian tak a neih avangin Ramthim rawngbawlna lamah pawh hma a la hma hle a. District TKP Inkhawmpui hmasa ber, Oct 21-23, 1955 (Pukpui)-ah chuan Agenda “TKP hminga Thuhriltu tirh” tih hi ngaihtuah a ni. Inkhawmpui vawi hnihna 1956 (Hnahchang)-ah pawh “Tuikuk Takam pual bik neih” tih rel a ni leh a. Mahni remchan angin Tuikuk-Takam pual hian hun an lo hmang thin a, thawhlawm an lakkhawm pawh Ramthim puala hman atan Headquarters-ah chhunluh thin a ni.

1959-ah chuan ‘District TKP Tuikuk-Takam Ni’ atan October 5 (Thawhtan ni) hman nise tih a ni a, 1960-ah chuan September thla Thawhtan ni hnuhnung ber hman nise tiin a rel leh a, chumi kum chuan September thla thawhtan ni hnuhnung ber chu September 26 a ni. September 26 hi hun rei tak chhung chu Ramthim pual atan hman zui a ni ta a ni. “Tuikuk-Takam Ni” tih chu huap zim deuhva hriat a nih avangin 1969-ah chuan ‘Ramthim ni’ tiin thlak a ni.

Amaherawh chu September thla hi Beirual thla a nih avangin TKP tana Ramthim ni hman hi a remchang tawk lo deuh thin a. Kum 2006 MTKP (S.Vanlaiphai) Rorelna chuan  May thlaah sawn nise tiin a rel a. MTKP Executive Committee chuan bawhzuiin BCM-in ram pawna missionary a tirh chhuah hmasak ber, Rev.H. Rokhama-te nupa tirh chhuah ni, May 29, 1968 denchhenin May 29 hi TKP Ramthimni atan a ruat fel ta a. 2007 atang chuan TKP Ramthim Ni hi May 29-ah hman a ni ta a ni. TKP Ramthim Ni-ah hian inkhawm buatsaihin, thawhlawm pawh Headquarters-ah lutin Mission rawngbawlna atan hman thin a ni.

TKP leh Mission :

2013-2014 chhungin TKP Bial 68 leh Unit 209 in Mission Support an pe a, Mission Support pe hi a la pung zel a. Hemi kum chhung tho hian MTKP chuan BCM Headquarters-ah Mission Support Rs 135,000.00 a pe bawk a, MTKP Mission Relief atangin Missionary damlo leh tanpui ngaite leh Mission Field-a tul dang atan Rs 101,300.00 a sem chhuak bawk. Tin, 2014-2015 chhung hian a chunga kan tarlan bakah Rs 100,000.00 chu Zawlpuia Missionary Nurse Quarters sakna atan a pe bawk a ni. Heng bakah hian MTKP, bial leh unit ten Mission lama hma kan sawn theih nan thuzir tur te buatsaihin, mission consultation te neiin, work camp leh mission visit te neih thin a ni bawk.

TKP Ramthim Ni Order of Service.

A hun                       : May 29, 2015 (Zirtawpni)

Thupui                      : “Li thuk lam pan rawh”. Luka 5:4

Inkhawm hruaitu   :

Hla sak-hona            :

Tawngtaina              :

Thu pawimawh puan:

Special Item I           : BMP, BKHP or KNP atangin awm   thei se.

Hla sak-hona            :

Tawngtai rualna       : Item chu hruaitu-in a buatsaih ang

Thuchah                   :

Special Item II         : TKP atangin

Hla sak-hona            :

Malsawmna / Lalpa tawngtaina

TKP Ramthimni atana hriattur pawimawhte :

1.   Kumin TKP Ramthimni thupui atan ‘Li thuk lam pan rawh’ (Luka 5:4)  tih a ni. Order of Service ruahman chhinna dah a ni a, Unit remchan dan anga siam that / siam belh theih a ni e.

2.   Kohhran member tam zawkin min telpui theih nan uar takin sawm ila, a theih chuan Fellowship dangte (BKHP, BMP, KNP) pawh chanvo siamsak ve nise

3.   Thawhlawm lakkhawm a ni ang a, Bial kal tlangin MTKP-ah chhun luh tur a ni. Mission rawngbawlna atan hman tur a ni.

4.   Missionary-te pualin Tawngtai rualna neih nise, Inkhawm hruaituin ruahmanna siam se.