Karleh Thawhtanni, May 29, 2017 hi Mizoram Baptist Kohhran Ni pawimawh (Special Day) “TKP Ramthim Ni”a ni a. TKP Unit hrang hrangah urhsun taka hman a ni leh dawn a ni. Kumina TKP Ramthim Ni thupui atan “Tho la êng rawh” (Isaia 60:1) tih thu hman a ni ang. Unit TKP ten an ruahman dan angin Chhun lam-ah emaw, Zan lamah emaw remchang an tih angin hemi pual inkhawm programme hi an siam ang a, BCM Ni pawimawh Programme bu-a Inkhawm kaihhruaina duan sa bakah Unit-in tul leh tha an tih angin Programme an siam thei bawk ang.
He Ni pual Inkhâwmah hian thawhlâwm lâkkhâwm thin a ni a. Bial kal tlangin MTKP-ah thehluh thin a ni. Thawhlâwm hi Mission puala hman a ni ang a, Missionary-te leh Mission rawngbâwlna atâna tawngtaihona neih a ni bawk ang. Tawngtai thupuite chu inkhâwm hruaitu-in emaw Unit-in emaw tul leh tha an tih angin an buatsaih ang.
Tawngtairual thupui:-
- Isua Krista Chanchin Thain khawvêl sual thim a chhun êna Pathian ram chak taka a lo zau zêl theih nân dîl ila. Kohhran leh mission pâwl hrang hrangte rawngbâwlnaah Pathian tanpuina i dîl ang u.
- BCM Mission Department-ah hian thawktu mi 1130 chuang an awm mêk. An inpêkna avângin lâwmthu sawi ila.
- Missionary-te inpêkna siam thar a nih zêl theih nân Pathian Thlarau Thianghlim pâwlna dîlsak ila. An chhûngkua theuh Pathian kutah i kawltîr bawk ang u.
- BCM Mission Department kal tlang leh a enkawlna hnuaiah mimal, chhûngkua, pâwlho leh Kohhran mal leh Bial ten Missionary an châwm a. Pathian malsâwmna dîlsakin nasa zâwka an thawh zêl theih nân Pathian tanpuina i dîl ang u.
- Mission rawngbâwlnaa BCM thawhpui pâwl (Mission Agency) 32 te tawngtaipui ila. Thawhhona tha tak kan neih zêl theih nân i dîl bawk ang u.
- Mission Field-a ring thar leh Kohhrante tân, rinnaah ding ngheta, puitlin lam pan zêla, an chipuite Krista hnêna hruai thlengtu an nih theih nân dîlsak ila.
- BCM hian Mission School kan din leh thawktu kan thawh vena school 61 lai kan nei a, Mission Field leh Station thenkhatah chuan Hostel siamin hma lâk a ni bawk. Pathian kutah i hlân thar leh ang u.
- BCM hian kan thupui (Motto): ‘Chanchin Tha mi tin tân’ tih hi rinawm taka vuan a kan tihhlawhtlin zêl theih nân Pathian buatsaihna dîl ila. Mahni theuh pawh i inhlân thar ang.
| C. Vânlaldintharpuia & Tlantununga Chawngthu | - | Pûkpui |
| K. Vânlalnghâka & Malsâwmtluangi | - | Sêrkâwn |
| Rev J.C. Vânlalluaia & Lalnuntluanga | - | Kikâwn |
| Rbt. Lalhriatpuia Ch. & K. Lalawmpuia | - | Moria |
| Upa P.C. Liankhama & V. Lalhlimzauva | - | Gosen |
| Rbt. H. Lalthangliana & R. Lalnunthara | - | Galili |
| Zothantluangi Khiangte & Rbt. P.C. Rosângzuala | - | Kanaan |
| V. Rokhâwlkima & Rbt. R. Lalruatkima | - | Sethlun |
| Er R. Vânlalmalsâwma & Rev Lianchhûnga Khiangte | - | Hângchalkâwn |
| P. Lalruatpuia & Pensy B. Lalthangliani | - | Bethel, Zobawk ’N’ |
| F. Lalremruatpuia & Dr Isak Lallâwmkima | - | Horeb, Zobawk ’S’ |
TKP Ramthim Ni lo chhuah dan:
TKP hian a din tirh atangin Ramthim veina lian tak a neih avangin Ramthim rawngbâwlna lamah pawh hma a la tan hma hle a. District TKP inkhawmpui hmasa ber, Oct 21-23, 1955 (Pukpui)-ah chuan Agenda “TKP hminga Thuhriltu tirh” tih hi ngaihtuah a ni a. Inkhawmpui vawi hnihna 1956 (Hnahchang)-ah pawh “Tuikuk Takam pual bik neih” tih thu rel a ni leh a. Mahni remchan angin Tuikuk-Takam pual hian hun an lo hmang thin a, thawhlawm an lakkhawm pawh Ramthim puala hman atan Headquarters-ah chhunluh thin a ni. Kum 1959-ah chuan ‘District TKP Tuikuk-Takam Ni’ atan October 5 (Thawhtanni) hman ni se tih a ni a, 1960-ah chuan September thla Thawhtanni hnuhnung ber hman ni se tiin rel a ni a, chumi kum-a September thla thawhtanni hnuhnung ber chu September 26 a ni.
September 26 hi hun rei tak chhung chu Ramthim pual atan hman zui a ni ta zel a ni. “Tuikuk-Takam Ni” tih chu huap zim deuha hriat a nih avangin 1969-ah chuan ‘Ramthim ni’ tiin thlak a ni. Amaherawhchu September thla hi Beirual thla a nih avangin TKP tana Ramthim ni hman hi a remchang tawk lo deuh thinin hriat a ni a. Kum 2006 MTKP (S.Vanlaiphai) Rorelna chuan May thlaah sawn nise tiin a rêl a. MTKP Executive Committee chuan bawhzuiin BCM-in ram pawna missionary a tirh chhuah hmasak ber, Rev.H.Rokhama-te nupa tirh chhuah ni, May 29, 1968 denchhenin May 29 hi TKP Ramthimni atan a ruat fel ta a. 2007 atang chuan kum tin TKP Ramthim Ni hi May 29-ah hman a lo ni ta a ni.
TKP leh Mission :
MTKP, Bial leh Unit-in Mission Support an pe thin a, Mission Support pe hi an la pung zel a ni. MTKP hian missionary damlo leh tanpui ngaite tanpui nan TKP Ramthimni thawhlawm a dawn khawm atangin Mission Relief a sem ve thin bawk a ni. Heng bakah hian MTKP, bial leh unit ten Mission lama hma kan sawn theih nan thuzir tur te buatsaihin, mission consultation te neiin, work camp leh mission visit-te neih thin a ni bawk.
A hnuaia link-ah hian He ni pual atan Organiser Sermon a awm e.
Sermon/Message from Organiser, MTKP
