Karleh Thawhlehni, May 29, 2018 hi Mizoram Baptist Kohhran Ni pawimawh (Special Day) “TKP Ramthim Ni”a ni a. TKP Unit hrang hrangah urhsun takin hman a ni ang. Kumina TKP Ramthim Ni thupui-ah “Krista aia palai” (Ambassadors for Christ), II Korinth 5:20. hman a ni ang. Unit TKP ten an ruahman dan angin chhun lam-ah emaw, zan lamah emaw  remchang an tih angin hemi pual inkhawm programme hi an siam ang a, BCM Ni pawimawh Programme bu-a Inkhawm kaihhruaina duan sa bakah Unit-in tul leh tha an tih angin Programme an siam thei bawk ang.

He Ni pual Inkhâwmah hian thawhlâwm lâkkhâwm thin a ni a. Bial kal tlangin MTKP-ah thehluh thin a ni. Thawhlâwm hi Mission puala hman a ni ang a, Missionary-te leh Mission rawngbâwlna atâna tawngtaihona neih a ni bawk ang. Tawngtai thupuite chu inkhâwm hruaitu-in emaw Unit-in emaw tul leh tha an tih angin an buatsaih ang.

1) Isua Krista Chanchin Thain khawvêl sual thim a chhun êna Pathian ram chak taka a lo zau zêl theih nân dîl ila. Kohhran leh mission pâwl hrang hrangte rawngbâwlnaah Pathian tanpuina i dîl ang u.

2) BCM Mission Department-ah hian thawktu mi 1286 an awm mêk (A zât hi a danglam reng avângin a dâwn hnaihah Missionary Tlângau kâwm chhûng lama târlan en ni se). An inpêkna avângin lâwmthu sawi ila. Anmahni leh an chhûngkua theuh Pathian Thlarau Thianghlim pâwlna i dîlsak ang u.

3) BCM Mission Department kal tlang leh a enkawlna hnuaiah mimal, chhûngkua, pâwlho leh Kohhran mal leh Bial ten Missionary an châwm a. Pathian malsâwmna dîlsakin nasa zâwka an thawh zêl theih nân Pathian tanpuina i dîl ang u.

4) Mission rawngbâwlnaa BCM thawhpui pâwl (Mission Agency) 32 te tawngtaipui ila. Thawhhona tha tak kan neih zêl theih nân i dîl bawk ang u.

5) Mission Field-a ring thar leh Kohhrante tân, rinnaah ding ngheta, puitlin lam pan zêla, an chipuite Krista hnêna hruai thlengtu an nih theih nân dîlsak ila.

.........................

TKP hian din a nih tirh atangin Ramthim veina lian tak a neih avangin Ramthim rawngbawlna lamah pawh hma a la hma hle a. District TKP Inkhawmpui hmasa ber, Oct 21-23, 1955 (Pukpui)-ah chuan Agenda “TKP hminga Thuhriltu tirh” tih hi ngaihtuah a ni. Inkhawmpui vawi hnihna 1956 (Hnahchang)-ah pawh “Tuikuk Takam pual bik neih” tih rel a ni leh a. Mahni remchan angin Tuikuk-Takam pual hian hun an lo hmang thin a, thawhlawm an lakkhawm pawh Ramthim puala hman atan Headquarters-ah chhunluh thin a ni.

1959-ah chuan ‘District TKP Tuikuk-Takam Ni’ atan October 5 (Thawhtan ni) hman nise tih a ni a, 1960-ah chuan September thla Thawhtan ni hnuhnung ber hman nise tiin a rel leh a, chumi kum chuan September thla thawhtan ni hnuhnung ber chu September 26 a ni. September 26 hi hun rei tak chhung chu Ramthim pual atan hman zui a ni ta a ni. “Tuikuk-Takam Ni” tih chu huap zim deuhva hriat a nih avangin 1969-ah chuan ‘Ramthim ni’ tiin thlak a ni.

Amaherawh chu September thla hi Beirual thla a nih avangin TKP tana Ramthim ni hman hi a remchang tawk lo deuh thin a. Kum 2006 MTKP (S.Vanlaiphai) Rorelna chuan  May thlaah sawn nise tiin a rel a. MTKP Executive Committee chuan bawhzuiin BCM-in ram pawna missionary a tirh chhuah hmasak ber, Rev.H. Rokhama-te nupa tirh chhuah ni, May 29, 1968 denchhenin May 29 hi TKP Ramthimni atan a ruat fel ta a. 2007 atang chuan TKP Ramthim Ni hi May 29-ah hman a ni ta a ni. TKP Ramthim Ni-ah hian inkhawm buatsaihin, thawhlawm pawh Headquarters-ah lutin Mission rawngbawlna atan hman thin a ni.