Mizoram Thalai Kristian Pawl (MTKP) chuan kumin chhunga Environment humhalhna kawnga hmalakna pakhat atan TKP awmna hmun apiangah a rual tlangin MTKP, Bial leh Unit ten mahni tui lakna / tuikhur hnar (catchment area)-ah tuihna a tam lehzual nan ‘TKP Thing phun Hnatlangpui’ June 9, 2012 (Inrinni) hian neih ni se a ti a. He hunah hian a rual tlanga thing phun beihpui nei turin Bial leh Unit TKP te chu mahni hmun theuhah hma la turin MTKP chuan a ngen a ni.
MTKP thuchhuah chuan Thing phun belh ngaih lohna a mite chuan thing awm sa humhalh kawngah hma lak ni se. Tin, tuikhur tibawlhhlawh thei tihfai leh tuikhur hiahfaite pawh tih ni sea ti a. Thing phun tur hi mahni Unit theuh inngaihtuah ni se, Bial huapa a huhova hma la duh tan pawh tih theih a ni.Thingphun hnatlang nei unit te chuan hnatlang lai thlalak MTKP Organiser hnenah thawn/thehluh tur a ni a. Thlalak te chu 2013 MTKP Inkhawmpui Photo Exhibition-ah pho chhuah tum a ni. Hriattirna hi Unit tin thleng tura tihchhuah a ni a, Lehkha la hmu hman lo palh kan awm takah Baptist Today-a hriattirna hi hriattirnaah pawm nghal tur a ni.
