March 19, 2022 (Inrinni) khan TKP Electric Pastor Bial, Lunglei te chuan an planning “Nungcha humhalhna kawnga Inzirtirna neih ni se” tih bawhzuina atan Sipai lui dung thenfai hnatlang an nei . 
Bial chhunga unit 4 te, unit 2 ve ve a inkawpin pawl hnihah an inthen a, TKP Electric Veng Unit leh TKP Gosen Unit te’n Sipai lui hnar lam Pandong atanga thian faiin TKP Farm Veng Unit leh TKP Chanmari Vengthlang Unit-te’n Sipai lui mawng lam atangin an thian fai ve thung a ni.
Lunglei khawpuiah hun rei tak bawlhhlawh paih dan mumal awm lo a in bul luikawrah bawlhhlawh paih a nih mai thin avangin, he’ng luikawrin a fin, Sipai lui chu nasa takin a tibawlhhlawh a, luia cheng thin nungcha te tan harsatna namen lo a thlen bakah, Sipai lui hian Tlawng lui fin thla lehin chu chu Lunglei khawpuia chengte’n kan tui tlan ber a ni a. Mahni bawlhhlawh paih thli vek kan tlan leh avangin mihring hriselna atan pawh a tha lo hle a ni.
Hei vang hian TKP Electric Pastor Bial chuan kan bawlhhlawh sawngbawl dan leh paih dan chungchangah hmasawnna kan neih phahna a nih beiseiin Sipai lui dung thenfai hnatlang hi an thawk a. Hnatlangah hian mipa-62 leh hmeichhia-22 , an zavaiin mi- 84 an thawk chhuak a ni.
