July 30, 2013 (Thawhlehni) khan TKP chuan an in champha phak vawi 62-na chu tluang takin an hmang a. TKP Day thupui atan hian ‘Khawvel Eng in ni e’ tih hman a ni a. July 30 zingkarah Unit tam zawk chuan Social Works thawkin khawlai leh Biak In leh a velte tan tifai a, Unit thenkhat chuan he hnatlang hi nilengin an thawk bawk. Zan lamah  Inkhawm programme duan lawk angin hun hman a ni. Kan hriat theih chinah TKP Day denchhen hian  Saiha bial TKP -in Unit 17(Mipa 13, Hmeichhia 4) leh Haulawng Bial TKP ten unit 115 (Mipa-85, Hmeichhia 30) ammamawh apiangte hman turin  thisen an pe a ni.

A din tanna hmun, Serkawn Unit chuan TKP Day pual hian July 27 (Inrinni)-ah nilengin Biak In leh a vel tifaiin hna an thawk a, July 30 (Thawtan) zanah Sunday School Hall-ah intihlimna (Gathering) programme hlung takin an hmang a, July 30 zing karah Khawlai phiat faiin an hnatlang a, member za chuang zet an hnatlang a ni. Zan lamah TKP Day Programme hman chhunzawmin Inkhawmna hlung tak an nei bawk.

 

 

TKP din dan leh TKP Day :

A tirah chuan Thalai Pawl din chu hlauhthawn an neih avangin Kohhran Upaten an phurpui vak lova. Tihsual palh hlau takin  fimkhur leh uluk takin Serkawn Kohhran Upate chuankanZosap Missionary-te kaihhruaina hnuaiah kum 1951 July 30-zanah Serkawn M.E School (tuna BHSS Junior ) ah thalai thahnem tak kalkhawmin, phur takin Thalai Kristian Pawl chu an lo din ta a ni. Hemi zan hian hruaitu thlan a ni a, hengte hi thlan an ni:-

President	:	Lungruala
Vice President	:	Vanlalkunga
General Secretary	:	K. Lalliana
Treasurer	:	T. Ropianga
Sr.Adviser	:	1) Rev. H.S. Luaia 2) C.Saizawna 3) Lalmama 4) Mrs. F.J. Raper

Kum 1952 Presbytery Pukpuia neih chuan pawmpuiin Pastor Bial tinah din a phalsak bawk a. Hetih lai hian Mizoram chu Assam State hnuaia District pakhat mai a nih avangin TKP khaikhawmtu chu District TKP tih a ni a. District TKP Inkhawmpui hmasa ber chu Pukpuiah kum 1955 ah neih a ni a, he inkhawmpui ni hmasa zawk October 22 chu TKP Day atan hman a ni thin a. Amaherawhchu, hei hi dikhlel deuhva hriatna alo awm a, kum 1995 MTKP rorel Sethluna neih chuan Serkawna TKP din tan ni July 30 hi TKP Day atan hman nise a ti a. Hei hi BCM General Committee chuan pawmpuiin kum 1997 atang chuan TKP Day hi July 30 ah hman a lo ni ta a ni.

Mizoram Baptist Kohhran Inchhiarna (BCM Statistics -2012-13) a lan danin TKP te hi Pastor Bial 72 ah Unit 373 neiin , member  mipa 24810 leh hmeichhia 14643, a vaiin 39453 an awm a ni.