July 30, 2017 (Pathianni) hi Thalai Kristian pawl (TKP) din champha vawi 66-na a ni a. Hemi ni hi Mizoram pumah TKP member ten urhsun takin an hmang leh dawn a ni. Kumin TKP Day thupui “Hrehawm mi tuarpui rawh” (II Tim 2:3)  tih a ni ang. Kumin TKP Day hi Pathianni a nih avangin Pathianni zing emaw, pathianni zan-ah emaw Unit leh Tualchhung Kohhran inberawnnin Inkhawm Programme hi Unit tinah siam a ni ang a. Inkhawm thawhlawm hi Bial kaltlangin MTKP Hqrs.-ah thehluh tur a ni. Inkhawm-ah hian Tawngtai Rual a awm ang a, tawngtai thupui chu a hnuaia tarlan ang hi a ni ang:

Tawngtairual thupui:

• Thalai Kristian Pâwl min din avângin Pathian hnênah lâwmthu sawi ila. He pâwl lo dinna tûra Pathian hmanrua mithahnemngaite avâng pawhin lâwmthu i sawi ang u.
• Tlâng leh mual hrang hrang, Mizoram chhûng leh pâwna TKP member zawng zawngte tân tawngtai ila, Pathian malsâwmna i dîlsak ang u.
• MTKP, Pastor Bial leh Unit hrang hranga TKP hruaitute tân tawngtai ila. An chhûngte pawh i dîlsak ang u.
• Mizoram TKP hmalâkna leh rawngbâwlna hmachhawpte Pathian kutah hlânin a hlawhtlinna i dîl ang u (Hmalâkna leh hmachhawpte hi hruaitu lam atangin puan chhuah ni se)
• TKP hi Krista leh Kohhran tân kutke tangkai a nih zêl theih nân Pathian tanpuina dîl ila. Chutiang tûrin mahni ngei pawh i inhlân thar ang u.

MTKP Hruaitute Progamme

Kumin TKP Day hmanpui tur hian Mizoram Thalai Kristian Pawl (MTKP) hruaitute (Executivew Committee member chin) chu Unit hrang hrangah an fehchhuak dawn a, kan hriat theih chinah hetiang hi an hun hmanna tur a ni ang:

Kohhrana thalaite puala rawngbawlna huang hran siam tura uluk leh fimkhur taka an ngaihtuah hnuah, July 30, 1951-khan Serkawn-a thalai rualte leh kohhran upate chuan kan Zosap Missionary-te kaihhruaina hnuaiah Thalai Kristian Pawl hi an lo din a. Hruaitu hmasa te chu President – Pu Lungruala; Vice President – Pu Vanlalkunga; General Secretary – Pu K. Lalliana; Treasurer – Pu T. Ropianga; Senior Adviser – 1) Rev.H.S.Luaia; 2) Upa.C.Saizawna; 3) Zomawia Nu (Mrs FJ.Raper) 4) Pu Lalmama te an ni. Executive Committee members Nl. Rothuami; Pu Hrangthanga; Pu Lalsawma; Pu Remkunga leh Pu Thanghmuna te an ni. Thalai Pawl din hi Presbytery (tunah Assembly)-in a lo phalsak tawh avangin 1952 Presbytery inkhawmpui (Pukpui) chuan Thalai Kristian Pawl lo ding ta chu a pawmpui nghal a. TKP hi Presbytery hian Biala din phalna a pek nghal bawk avangin bial hrang hrangah pawh TKP hi din nghal a ni.

Hetih lai hian Mizoram hi Assam state chhunga district pakhat mai a nih avangin TKP inkhaikhawmna pawh District TKP tih a ni a. District TKP inkhawmpui hmasa ber pawh 1955 khan Pukpui-ah neih a ni. Hun rei tak chhung chu TKP Day atan hian District TKP inkhawmpui hmasa bera (1955)-a ni hmasa zawk, October 22 chu hman a ni thin a. Amaherawh chu he ni hi dik tawk lova hriatna a awm avangin MTKP Rorelna chuan vawi hnih/thum lai a ngaihtuah hnuin 1995 MTKP Rorelna (Sethlun) chuan Kohhran hruaitute leh kan missionary-te kaihhruaina hnuaia Serkawna TKP an din ni, July 30 hi TKP Day-ah hman ni tawh se a ti a, chu chu BCM General Committee pawhin a pawmpuiin 1997 atangin TKP Day hi July 30-ah hman a lo ni ta a ni. BCM Statistics 2016-2017-in a tarlan danin Pastor Bial 82-ah Unit 470 awmin, Member hmeichhia – 27930 leh mipa – 17118 niin an zavaiin member 45048 an ni. Read more about this topic >> TKP DAY