Kumin TKP Day, July 30 chu Covid-19 hrileng avangin a huhova hman a rem dawn tak loh avangin MTKP ruahmanna-in TV leh Youtube lama tih chhuah turin TKP Day lawmna Programme an siam .

Kan hriat angin kumin chhungin Kohhran programme hrang hrang te neih theih a nih tak loh avangin, TKP Day pawh ruahmanna angin hman theih a ni dawn lova. Hemi chungchang hi MTKP Executive Committee Meeting chuan a ngaihtuaha, Mizoram hmun hrang hrang leh Mizoram pawna TKP member ten kan lo chhima TV leh Youtube kaltlanga kan lo hman theuh turin Programme buatsaih ni se ti-a a rel ang in TKP Day Programme hi buatsaih leh ruahman a ni a. He Programme hi TKP Day July ni 30 zan dar 8:00 ah ZONET (Bawhbel) Channel leh LPS 10 Channel-ah a rualin tih chhuah a ni ang a, hei bakah hian Lunglei, lawngtlai leh khawpui dang-ah te Local cable-ah tihchhuah tum a ni bawk. Tin, BCM leh MTKP Youtube Channel ah te pek chhuah a ni bawk ang.

He programme ah hian MTKP President hnen atangin TKP Day thuchah tawi a awm ang a, zaithiam tak tak ten Pathian fakna, hlain an puang chhuak ang a, zaihona thlirtu te zawm theih turin buatsaih a ni bawk ang. TKP Day programme hi ngaipawimawha mahni hmun theuh atanga TV emaw Youtube emaw kaltlanga lo zawm ve turin MTKP hruaitu te chuan TKP member zawng zawng te a sawm in a ngen a ni.