June 25, 2022 (Inrinni) khan Ṭhalai Kristian Pawl (ṬKP) Chandmary Unit, Lawngtlai chuan Lawngtlai Area Ṭhalai Kristian Pawl Coordination Committee-in Lawngtlai Area-a ṬKP Unit hrang hrangte thisen pek dan tur Blood Donation Calendar a siam bawhzuiin BCM Chandmary Sunday School Hall-ah blood donation camp an buatsaih a, thisen hi District Blood Bank Lawngtlai-a thawktute'n a hmunah kalin an laksak a ni.

Pu Vanlalchawisana, Executive Committee Member-in Pathian hnenah ṭawngṭaiin inhlanna hun a hmang a, LAṬKP Secretary Pu Rohluzuala Chhakchhuak-in mamawhtute hman atana ṭhalaite'n thisen kan pe ṭhin chu lawmawm a tih thu sawiin, nasa zawka thisen pe thei turin inbuatsaih deuh deuh tur in kalkhawmte a fuih a ni. Thisen petute hi mipa 18 leh hmeichhia 3, an vaiin mi 21 an ni a, thisen unit 21 an pe a ni.