Tunkar Pathianni, August 3, 2014 hi Mizoram Baptist Kohhran ni pawimawh (Special Sunday) ‘Thlai thar hlan ni’ a ni a.  Mizoram Baptist Kohhran tinah Pathianni Chawhma Inkhawm-ah hemi pual hian hun hman a ni ang a, hun hman dan tur (Programme) chu Tualchhung Kohhran ten tha an tih angin an siam ang.

Thlai thar Hlan Ni lo chhuah dan:

Kan pi leh pute hun laiah September thla hi Mimkut Thla tih a ni. Kristian an nih hma chuan he mi thla-ah hian mitthi pual-in thlan-ah thlai leh ei tur thildang an chhiah thin. Kristianna a lo luh hnu-ah ringtute chuan he ni hi an thlai tharte Pathian hnena hlanna ni-ah an hmang ta zawk a, chu chu Thlai Thar Hlan ni tih chu a lo ni ta a ni.

Hun rei tak chu September Pathian ni hmasa berah hman thin a ni a, he mi ni hian lo, leipui leh huan a thlai thar remchang apiang la khawmin biak inchhung leh hulhliap-ah an chhung vum thur a, Inkhawm banah an lilam thin a ni.  Hmun thenkhatah chuan he ni hi Inrinni atanga a hmangin ruaite thehin Pathian faka zaikhawmin an lam mup mup thin, Thlai Thar Kut an ti hial thin.

September thla Pathian ni hmasa ber hman thin hi thingtlang hmun thenkhatah chuan thlai thar chuai tawh lam a nih avangin kum 1993 BCM Assembly chuan August Pathian ni hmasa ber hi Thlai Thar Hlan ni a tan a ruat ta a ni.

A tirha chuan he mi ni a pawisa tling khawm hi Headquarters a thehluh tura tih a ni a, kum 1984 BCM Assembly chuan mahni tualchhung kohhran pual atan a dah  a, tun thlengin tualchhung Kohhran pual a ni ta a ni.

...................................

Mizoram Baptist Kohhran hian “Thlai Thar Hlan Ni” hi kum tinin August Pathianni hmasa ber kan hmang ta zel a. Tun hma deuh chuan awmni khama Inrinni-ah te hmangin Pathian hnena lawmthu sawina leh zaikhawm nan, a then phei chuan ruai nen hial hmang pawh thingtlang lamah chuan an awm thin. Lo, leipui leh huan lama thlai thar remchang apiang thawh khawmin Biak in hulhliapah an chhung vum thur a, inkhawm banah lilamin an tiral thin a. Darkar rei fu fu a awh hial thin a ni. Kohhran leh khawtlangin a nghahhlelh hun pawimawh tak a ni thin.

Tunah erawh chuan huan leh lo neiha eizawng kan tlem tial tial a, khawpuiah phei chuan thlai thar hlan tur nei lo hi chhungkaw tam zawk kan ni hial ang. Heti chung hian Thlai Thar Hlan Ni hi Special Sunday-ah kan hmang zel a. Thlai thar hlan tur nei lote pawhin kan thinlung leh kan thil neih hlu dangte hlanna hun atan hmang ila. Pathian miten Pathian kan zawmna leh kan inkungkaihna tithar zeltu chu thil hlan inthawina (rawngbawlna) hi a ni. Thil hlan inthawina hi awm lo ta se la, Pathian chibai buk kan tih hi Israel-te nunah a khingbai hle ang. Pathian chibai kan bukna, lawmthu kan hrilhna, kan hmangaihna, Amah nena kan inkungkaihna tilangtu leh kan Pathian a ni a, Ama ta kan ni tih chhinchhiahna pawimawh tak a ni tih hriain kohhranho ten Lawmna thinlung puin i hmang theuh