Tunkar Pathianni, August 2, 2015 hi Mizoram Baptist Kohhran ni pawimawhte zinga mi ‘Thlai thar hlan ni’ a ni a. Mizoram Baptist Kohhran tinah Pathianni Chawhma Inkhawm-ah hemi pual hian hun hman a ni ang. Headquarters atanga hemi Ni pual thuchah chhiarcvhhuah tura buatsaih chu Biak In tinah chhiar chhuah a ni ang a, Programme chu Tualchhung Kohhran ten tha an tih angin an siam ang.
Thuchah (chhiar tur):
Kan pi leh pute hun laiah September thla hi Mim kut thla tih a ni a, Kristian an nih hma chuan hemi thlaah hian mitthi pualin thlanah thlai leh ei tur thildang an chhiah thin. Kristian an nih hnuah chuan an thlai tharte chu mitthite tan chhiah lovin, Pathian ram tan an pet a zawk a. Chu chu thlai thar hlan ni lo chhuah dan chu a ni.
Hun rei tak chu September thla Pathian ni hmasa berah hman thin a ni a. Hemi ni hian lo, leipui leh huana thlai thar remchang apiang la khawmin Biak In hulhliap (varandah)-ah an chhung vum hnuk thin. Tichuan inkhawm banah an lilam thin a ni. Hmun thenkhatah chuan he ni hi Inrin ni atanga hmangin ruai hial an lo theh thin a, Pathian fak leh chawimawiin an lam mup mup a, thlai thar kut an ti thin a ni.
September thla Pathian ni hmasa ber hman thin hi thingtlang hmun thenkhatah chuan thlai thar rem tawh lam a nih avangin kum 1993 BCM Assembly chuan August Pathian ni hmasa ber hi Thlai Thar Hlan Ni atan a ruat ta a ni. A tirah chuan hemi nia pawisa tlingkhawm hi Headquarters-ah thehluh a ni thin a, kum 1984 BCM Assembly chuan mahni tualchhung kohhran puala dah ni tawh se a ti a, tun thlengin tualchhung kohhran pual a ni ta zel a ni.
Tunah chuan kan khawsak dante a lo danglam ta a, thlai thar hlan tur kan nei mumal ta mang lo. Mahse thlai thar hlan tur nei lote pawhin kan neih thil hlu Pathian hnena hlanna ni atan kan hmang ta zel a, uar deuh deuh thei ila a duhawm hle. Thlai thar hlan tur nei lote pawhin kan thinlung leh kan neih thildang hlan ila, Pathian chawimawi nan leh a rawngbawl nan I inhmang sauh sauh ang u.
