Serampore Convocation - AICS, 2013[/caption]
August 18, 2013 Pathian Ni hi BCM ni pawimawh, Theological Education Sunday a ni a. He Ni pual hian Mizoram Baptist Kohhran Biak In tinah hman a ni ang a, Headquarters atanga thupui thlansa ' Hma i sawn zel ang u" tih hmangin thuchah ngaihthlak a ni ang, AICS Report chhiarchhuah leh Tawngtai thupui ruahman sa angin tawngtairualna hun hman a ni bawk ang.
Theological Education Sunday lo chhuah dan:
1956 atangin “Serampore Collage Ni” tiin kan Kohhran Calendar-ah dah a ni thin. Rev. Dr.C.L.Hminga chuan Serampore College atangin 1955-ah B.D. a zo va. College atanga an lo chhuah dawnin Serampore College hian tanpui an ngaihzia mahni Kohhran theuhva sawi darh turin an inchah a. Ani pawh hian a sawi thin a. 1956 Assembly-ah (Chutih lai chuan Presbytery tih a ni) Phawngpui Bial atangin Serampore College puala chawlhni vawi 1 hman rawtna a lo lut ta a, Assembly pawhin a lo remti ta a ni.
Serampore College dintu William Carey piancham hi August ni 17 a ni a, chumi hnaih ber Pathianni apiang chu he mi ni atan hian ruat a ni thin. He mi ni hi Serampore College tangkai zia sawi nan te, tawngtaisak nan te hman a ni a. Pathianni zing thawhlawm chu headquarter-ah thawn a ni a. A hlawmin Serampore College tanpui nan pek a ni thin.
Hun a lo kal zel a, tunhma angin kan Pastorte Serampore-ah vek Pathian thu zirin tirh theih leh tirh sen an ni ta lova; India ram chhung Theological College hrang hrangah an lo zir ta hlawm a. Chuvangin Serampore College Ni tih chuan a huapzo tawk ta lova; a hming hi College dang pawh huap vekin Theological Education Sunday tih a lo ni ta a. A hun thuah pawh a changa Pathianni vawi 2-na, a changa Pathianni vawi 3-na hman thin ai chuan Assembly chuan Pathianni vawi thumna hi a ruat nghet ta a. Thawhlawm pawh hmun khata chhun luh vek a rem tak loh avangin Headquarters-a thawn kher lovin Chawlhni tuk dang thawhlawm ang bawkin a zalen ta a; tualchhung Kohhran in a duhnaa a hman theihin a awm ve ta a ni.
..............................
Theological Education Sunday Thuchah
“Hma i sawn zel ang u” (Phil. 3: 26)
- Rev.Dr.R. Zolawma, Principal, AICS
Pathian hruaina-in “Theological Sunday” kanthleng leh ta reng mai. Baptist Kohhran member zawng zawngte Pathian Thu tisaa chang, Isua Krista hmingin chibai ka buk a che u. He ni hi kohhranhoten hun kal tawha Theological Educationkan kalpui dan thlir letna leh hma lam thlir lawkna hun atan hmang ila. Mahni lawina kohhran theuhvah hlawk taka program in hman theih nan duhsakna ka hlan a che u.
Pathianin Theological Education department thiltihte a hriatpui a ni tih hi BCM member zawng zawngte hian hre thar leh ila a tha awm e. Ka hriat phak chinah pawh Theological Education-ahkanthang nasa hle. Kan hun lai chuan Pastoral Committee-in Pathian thuzir tur a la a, written exam pawh nei lovin interview min neihpui nghal a. Tin, Eastern Theological College Jorhat-a B.Th zir thei nih chu vannei kan inti hliah hliah a. B.Th. course zir zova thiante nen hlim tak maia Mizoram chhungah rawngbawl thuai thuai kan chak tih hriat fahrana kan haw chhoh hun te pawh a la rei lo hle. B.Th. zir theuh theuh pawh Naga thian thenkhatte nen inang lo riauva hriatna kan nei bawk a, a chhan chu BCM tirh zirlaite chuan a tlangpui thuin zir thiamna ngawr ngawr aiin rawngbawlna kan dah thupui zawk thin a. Chuvangin, khatih lai keini hunah chuan M.Th. leh Doctorate degree te chu kan ban phakah kan ngai lo va, kan tan chuan Vana rah ang hial a ni awm e. Chu a chhapah rawngbawl tam hman loh hlauhna avangin B.D. zir leh pawh hman ti lo thiante zingah an awm awm e. Pathian thuzir zawng zawngte chu pastor zir an tih hun kha a ni a. Course kan zir zawh hmain November thlaah kan awmna tur posting Pastoral committee-in a tichhuak a. Probationary pastor appointment hmuh hnuah leh awmna hmun pawh hre sa-in final exam kan hmachhawn a. Tun hun nena khaikhinin keini ho chu khawngaihna huna pastoral ministry-a lut angah ka ngai a. Lehlamah chuan Pathian thu zir duh tlem te zinga tel kan nih vangin khawngaihna dawng tlakah Pathianin min ngai pawh a ni thei e.
Pathianin kum sangbi tharah BCM a hruai kai a, Theological Education lamah bung thar a kaipui bawk a. Mizoram chhunga BCM pastor qualification atan BD tal ni se tih leh mahniin zirna sang college nei ila tihte a ngaihtuah a. Tichuan, Pathianin Theological College duhawm tak AICS min dinsak a. Hetia BCM-in zirna inpui a neih hnuah chuan zirtu lak chungchangah pawh a duhtui a, Written exam leh interview a neihpui ta a. Chuti anga tlingte chu kum thum (tunah chuan BD chu kum li) teh meuh training pek an ni a. Hlawhtling taka fiahna hrang hrang paltlangte chuan probationary pastor emaw missionary emaw an dil thei a. Amaherawhchu, result tha tak tak neite pawh hna-in a daih rih loh avangin a kum leh nghah a tul a. Hetia zir chhuak tha tak tak zinga duh thlang thei dinhmuna Pathianin BCM a dintir hi malsawmna kawng khat chu a ni. Lehlamah zir chhuak mi thiam tak tak leh fel tak takte thawhna indaih rih lo erawh engtia kalpui tur nge tih ngaihtuahna min sentir a. Kum 2000 atanga ding AICS hmanga BCM rawngbawlna hi Mizoram leh India ramah a chhuanawm khawp mai. Rawngbawltu tam tak, pastor leh missionary a chher chhuak tawh a, pastor/minister chhuanawm tak tak leh missionary hlawhtling tak takte pawh he zirna in hian a chher chhuak tawh a, a chher mek bawk a ni.
Board of Theological Education chuan ‘Lo chu khawvel a ni’ tih a taka BCM-in a kalpui theih nan AICS-ah post graduate program hawn tum nise tih a rel a. Pathian remtih zawng a nih chuan tun atanga kum hnih thum lekah mahni college atangin zirna sang Master of Theology (M.Th)kanla zir thei dawn a ni. Kohhranho tawngtaina chuan theological education lamah nasa takin min thantir a, BD leh M.Div. college min pe tawh a,kanmamawh tak tak a nih chuan Pathianin M.Th. program pawh min tihhlawhtlinsak ngei ang. Chubakah, zirna sanga kal remchang lote tan pawhJubileeBibleSchooldin Assembly-in min phalsak tawh a. Tunah hian tihhlawhtlin tumin chak taka hmalak mek a ni.
Tirhkoh Paulan, “Kan thlen chin atang khan hma i sawn zel ang u” tia Philipi khuaa mite a sawm angin, Pathian ropui nan Pathian thuzir leh hriatna kawngah hmasawn zel i tum ang u.
.....................
Theological Education Sunday Pual -
AICS Report
Serampore Convocation 2013:
Nikum lamah chuan kan vei ber chu Serampore Convocation BCM-in AICS-a a thleng tur kha a ni a. Pathian hnenah kohhranho kan tawngtai a, kan thawkrim bawk a, kan beisei angin kan phak tawkah tha takin Convoctaion chu February 6-11, 2013 khan kan thleng a. Famkim lohna khawvela cheng mah ni ila, kan ti tha viau a ni tih pawnlam atanga lo kal thian thate atangin kan hre thei a ni. Chumi zarah chuan AICS hmel pawh nasa takin a danglam a, hmasawnna kawng tinrengah a lang a. BCM hruaitute leh AICS hruaitu hmasate thawhrimna rah a lang zel a ni. Pathian hnenah lawmthu i sawi ang u.
April ni 19, 2013 khan Valedictory Service:
Pathian hruaina-in zirchhuakte thlahna valedictory service vawi 11-na April 19 khan neih a ni a. Valedictory Speaker atan Rev. Dr. K. Thanzauva hman a ni. Hetah hian zirlai course hrang hrang zir zo, graduates 38 kan nei a. B.D. graduates 24, M.Div. 7, Diploma in Mission Studies 5, leh Diploma in Church Music 2 hnenah Diploma leh completion certificate pek an ni a, tin, an pualin valedictory ruai pawh a chhimtu zawng zawngte nen theh a ni bawk.
Board of Theological Education meetings:
April ni 24 khan Board of Theological Education (BTE) meeting neih a ni a, chutah chuan BD zir tur 20 leh M.Div (Miss) zir tur 10 lak an ni a, tin, Music zir tur 3 lak an ni bawk.. Tin, he meetingah hian Rev. Dr. R.L. Hnuni, principal kal chhuak turin Assembly Nomination Committee-in principal atan a ruat thar Rev. Dr. R. Zolawma hnenah principal mawhphurhna a hlan bawk a. Board of Theological Education meeting hi July 4, 2013-ah neih leh a ni a, hetah hian Mr. C. Lalhmachhuana, Assistant Professor Contract-a rawih mek chu Temporary Assistant Professor atan lak a ni. Tin, post graduate program AICS-a hawn tum nise tih a rel bawk.
Lay leadership Training :
Kum tina kan lo neih thin angin kuminah pawh College chawlh chhungin Rev. C. Vanlaldika, Dean of Ministerial kaihhruaina hnuaiah Lay Leadership Training hmun hnihah buatsaih a ni a. May 8-12 chhungin Serte Pastor bial huapin BCM Serte-ah neih a ni a, Kohhran hruaitute 81 laiin he training hi an zawm a. Tin, May 23-26 chhungin Bru Baptist Church hruaitute pualin Nghalimluiah buatsaih a ni bawk a, BBC hruaitu 70 hnenah certificate hlan a ni.
Academic session thar:
June ni 5 khan college session thar tan a ni a. Tunah hian kan zirlai neih dan hetiang hi a ni: B.D. 87; M.Div 14; Probationary Pastor 5; Diploma in Mission studies 10; Diploma in Music studies 4; an zavaiin 120 an ni. Student te hi a tam ber chu BCM sponsored an ni a,Indiahmarchhak state tin atang lehMyanmaratanga kal te an ni.
BCM Theological Education enkawlna hnuaia zirna sang Doctorate leh M.Th zir mekte:
Kumin February thla khan Serampore Convocation AICS-ah Rev. R. Zolawman D.Th degree a dawng a, tunah hian Mr. Senti Aier chu viva voce nei tura koh a ni a; Rev. C.Vanlaldika leh Rev. R. Lalthanmawia ten result an nghak mek. Doctorate zirlaikanenkawl mekte chu Rev. H. Lalthlamuana, Rev. R.D.Mawia Ralte, Mr. Andrew Lalhmangaiha leh Rev. Lalhmingchhuanga Jongte te an ni. M.Th zir mekte chu Rev. PC Zosangliana, Rev. C.Vanlalhruaia, Rev. R. Lalrintluanga leh Rev. Joe Laldinpuia te. Anni bakah, Lalbiaknii chu Basic scholarship pek a ni.
Retreat Program :
June 29-July 1, 2013 khan Rev. T.C. Laltlawmlova speaker-a hmangin thlarau lama intuaihriamna, retreat hlawk leh hlimawm taka neih a ni.
Jubili Bible School:
BCM Assembly-in a rel angin Mizo tawnga Pathian Thuzirna, Jubili Bible School chu Rev. C. Ngurhnemna, Dean-in a hlawhtlin theihnan chak takin hma a la mek a. Tunah hian Syllabus peih fel a ni tawh a, textbook siamtu turte pawh ruat vek a ni tawh a, nakum 2014-a class tan hman tura beisei a ni.
A tawp berah chuan theological education hmsawnna tura kohhran memberte inpekna avangin lawmthu ka sawi a. Pathianin BCM Theological Education department rawngbawlna malsawm zel rawh se.
Ka lawm e,
R. Zolawma
Secretary,
Theological Education Board,
Baptist Church of Mizoram
