May 29, 2012 - Thawhleh Ni  hi  TKP Ramthim Ni a ni a. He Ni hi ram pumah  TKP Unit tinin urhsun takin kan hmang thin a. Mizoram Baptist Kohhran Calendar-ah pawh Special Day angin tarlan thin a ni.  Kuminah pawh he ni hi TKP Unit hrang hrangah urhsun taka hman a nil eh dawn a. Kumina TKP Ramthin Ni thupui atan “Pathian thuruk enkawltu (1 Kor 4:1)” tih thu hman a ni ang.

 

Hun hman dan tur:

1. Unit tinin mahni remchan angin zing/zan ah thupui, Pathian thuruk enkawltu (1 Kor 4:1) tih hmang a inkhawm nise.
2. Kohhran member te leh Fellowship dang te pawh tel tur a sawm nise.
3. Thawhlawm lakkhawm a ni ang a, Bial kaltlangin MTKP ah thawn tur a ni a, Mission rawngbawl nan hman a ni ang.
4. Missionary te pual a tawngtai rual nise.
5. Thuziak a hnuai a mi hi chhiar nise.

   

TKP Ramthim Ni lo chhuah dan :

TKP te hian an din tirh atangin Ramthim veina lian tak an neih avangin Ramthim rawngbawlna lamah pawh hma an la tan hma hle a. District TKP inkhawmpui hmasa ber, Oct 21-23, 1955 (Pukpui)ah chuan Agenda “TKP hminga Thuhriltu tirh” tih hi ngaihtuah a ni a. Inkhawmpui vawi hnihna 1956 ah pawh “Tuikuk Takam pual bik neih” tih rel a ni leh a. Mahni remchan angin Tuikuk-Takam pual hian hun an lo hmang thin a, thawhlawm an lakkhawm pawh Ramthim puala hman atan Headquarters-ah chhunluh thin a ni. 1959-ah chuan ‘District TKP Tuikuk-Takam Ni’ atan October 5 (Thawhtan ni) hman nise tih a ni a, 1960-ah chuan September thla Thawhtan ni hnuhnung ber hman nise tiin rel a ni a, chumi kum chuan September thla thawhtan ni hnuhnung ber chu September 26 a ni. September 26 hi hun rei tak chhung chu Ramthim pual atan hman zui a ni ta zel a ni. “Tuikuk-Takam Ni” tih chu huap zim deuha hriat a nih avangin 1969-ah chuan ‘Ramthim ni’ tiin thlak a ni. Amaherawh chu September thla hi Beirual thla a nih avangin TKP tana Ramthim ni hman hi a remchang tawk lo deuh thinin hriat a ni a. Kum 2006 MTKP (S.Vanlaiphai) Rorelna chuan  May thlaah sawn nise tiin a rel a. MTKP Executive Committee chuan bawhzuiin BCM-in ram pawna missionary a tirh chhuah hmasak ber, Rev.H.Rokhama-te nupa tirh chhuah ni, May 29 hi a ruat fel ta a. 2007 atang chuan kum tin TKP Ramthim Ni hi May 29-ah hman a lo ni ta a ni. TKP Ramthim Ni-ah hian inkhawm buatsaih thin a ni a. Heta thawhlawm lakkhawmte hi Headquarters-ah chhung lutin Mission rawngbawlna atan hman thin a ni.

 ..............................  

‘Pathian Thuruk Enkawltu’

Rev.Samuel Lalremsanga, Organiser, MTKP

-

Thuhma:

TKP hian a din tirh atangin Ramthim veina lian tak a neih avangin Ramthim rawngbawlna lamah pawh hma a la tan hma hle a. District TKP inkhawmpui hmasa ber, Oct 21-23, 1955 (Pukpui)ah chuan Agenda “TKP hminga Thuhriltu tirh” tih hi ngaihtuah a ni a. Inkhawmpui vawi hnihna 1956 ah pawh “Tuikuk Takam pual bik neih” tih rel a ni leh a. Mahni remchan angin Tuikuk-Takam pual hian hun an lo hmang thin a, thawhlawm an lakkhawm pawh Ramthim puala hman atan Headquarters-ah chhunluh thin a ni. 1959-ah chuan ‘District TKP Tuikuk-Takam Ni’ atan October 5 (Thawhtan ni) hman nise tih a ni a, 1960-ah chuan September thla Thawhtan ni hnuhnung ber hman nise tiin rel a ni a, chumi kum chuan September thla thawhtan ni hnuhnung ber chu September 26 a ni. September 26 hi hun rei tak chhung chu Ramthim pual atan hman zui a ni ta zel a ni. “Tuikuk-Takam Ni” tih chu huap zim deuha hriat a nih avangin 1969-ah chuan ‘Ramthim ni’ tiin thlak a ni. Amaherawh chu September thla hi Beirual thla a nih avangin TKP tana Ramthim ni hman hi a remchang tawk lo deuh thinin hriat a ni a. Kum 2006 MTKP (S.Vanlaiphai) Rorelna chuan  May thlaah sawn nise tiin a rel a. MTKP Executive Committee chuan bawhzuiin, BCM-in ram pawna missionary a tirh chhuah hmasak ber, Rev.H.Rokhama-te nupa tirh chhuah ni, May 29 hi a ruat fel ta a. 2007 atang chuan kum tin TKP Ramthim Ni hi May 29-ah hman a lo ni ta a ni. TKP Ramthim Ni-ah hian inkhawm buatsaih thin a ni a. Heta thawhlawm lakkhawmte hi Headquarters-ah chhung lutin Mission rawngbawlna atan hman thin a ni. Kumin hian TKP Ramthim ni thupui atan “Pathian thuruk enkawltu” 1 Kor 4:1 thlan a ni.

 

Pathian thuruk chu:

Pathian thuruk (Lehlin tharah chuan Pathian thu ril tih a ni) ti a Paulan a sawi thin chu Pathianin a fapa mal neih chhun mihringte sual tlan nana hlana chhandamna a rawn siamsakna thu hi a ni a. 1 Kor 2:7 ah chuan Paula chuan, “Pathian thufing thuruk chu kan sawi zawk thin a ni, thu fing inthup, kan ropuina tura Pathianin khawvel awm hmaa a ruat lawk tawh chu” tiin a sawi a. Chhandamna chu Pathian ruahmanna liau liau a nih thu leh Pathianin a fapa thihna kraws hmanga khawvel tana chhandamna a rawn siam chu mihringte finna leh ngaihtuahnain a hriatthiam phak rual loh a nihzia a sawi a, nimahsela ringtute tan chuan chu thuruk chu Kristaah puan chhuahin a awm a ni. Chu Pathian thurukah chuan thil langsar tak pathum kan hmu a :- 1) Pathian mihringa lo chang (incarnation). 2) Mahni inphata misualte tana Lal Isua inhlanna (Sacrifice) 3) Thihna hneha thawhlehna (Resurrection). Heng thil pathumte hi Lal Isua chanchin-ah khan chiang taka tarchhuah a ni a. Chu Lal Isua hnathawh leh kraws-a a inhlanna thuk tak avang chuan khawvel boral mek chuan beiseina thar a nei leh ta a. Mihringte tan chhandamna kawng, a ring apiangte tana chhandamna tur chu, Pathianin a rawn hawng leh ta a ni.

 

Enkawltu:

Enkawltu chu vawnghimtu leh venghim theitu ni tura beisei a ni. Pathian thuruk enkawltu chuan amaha kawltira awm chhandamna thu chu a nihna dik tak leh Pathian hnen atanga lo thleng a nihna anga a vawn a tul ang. Chu chuan Pathian thu dik vawngtu ni turin a phut a ni. Enkawltu chu rintlak a nih a ngai a, a enkawla chungah mawh a phurh rualin thuneihna enge maw chin tal tel lovin enkawltu nihna a famkim thei bawk lo. Huan enkawltu emaw tangka vawngtu emaw pawhin a enkawlna hnuaia mi chu a tangkai thei ang ber leh a neituin a hlawkpui theih tur ang bera a enkawl pawh a ngai ang. A mawhphurhna a hlen loh chuan hrem theih a ni a, a mawhphurhna avang vek chuan hmelma lakah dinhmun khirh leh hlauhawm takah pawh a awm phah thei bawk a ni. Amaherawh chu chumi rual vek chuan a hna a thawh that chuan lawmman pawh a phu a ni.

 

Tlangkawmna:

Pathian thuruk enkawlna hi ringtute mawhphurhna a ni a. Vawng him turte, hmang chhuak tur te, khawvel mite hnena hriattir tur leh puang chhuak tur tein ringtute chuan mawh kan phur a ni. He Pathian thuruk thu-ah hian mahni dinhmun inphata inngaihtlawmna te, midangten malsawmna an chan theihna atana inhlanna te a tarlang a, chu thuruk chu nunpui ve turin chu thu ringtute leh chu thu avanga nun tihdanglam tawhte chu a phut tlat a ni. Amaherawh chu he Pathian thuruk hi inhlanna leh tihtlawma awmna thuah chauh hian a tawp lo, Krista chu tlawm taka hnehchhiahin a awm ngei a, nimahsela ropui taka kaihthawhin a awm leh a. He thuruk ringtute pawh hian tlawm taka nun leh inhlanna thu hi kan chan ni thin mahsela Krista avangin ropui taka hnehtu, he khawvelah leh hun lo la thleng turah pawh kan ni ve zel dawn a ni.