January 29, 2021 (Zirtawpni) khan Mizoram Baptist Kohhran, Christian Education Department buatsaihin Sunday School Trainers’ Training, BCM Hall, Headquarters Office, Serkawn-ah neih a ni.

He Training hi Rbt. B. Singpari, Sunday School Promoter-in a kaihruai a. Tanna hun serh a neih hnu-ah hriat tur pawimawh hrang hrang te puang nghalin, Sunday School Trainingte tana hriat tur pawimawh te’ tih thupui hmangin zirtirna a pe nghal bawk.

He hunah hian Resource Person atana ruat Upa M. Thansiama, SS Trainer, Rev. PC Liandaula, Rev. ZD Rodingliana, Director, CED ten thupui thlan te hmangin zirtirna an pe a. Rev. R. Lalbiakliana AGS – Service leh Rev. F. Ramdinmawia, General Secretary ten thuchah tawi an sawi a, Nl. B. Lawmsangpuii leh Tv. H. Rosangliana ten fakna hla an sa bawk. Training-a kal ten hlawkthlak an ti hle.

He Training-ah hian Mizoram hmun hrang hrang atanga Sunday School Trainers atan ruat te an kal kim vek a ni. Heng Trainers tura ruatte hian Pastor Bial leh Tualchung Kohhran te mamawhna an ang zelin Christian Education Department-in ruahmanna an siam a. Heng Sunday School Trainers te nen a tul angina Training an neihpui thin a ni.