Tunkar Pathianni, December 6, 2015 hi Mizoram baptist Kohhran, Christian Education Department chuan Sunday School kum tawp exam hun atan a ruat a. Pathianni Chawhma Inkhawm banah Exam hi neih a ni ang. Christian Education Department Director chuan zirlaite thahnem-ngai leh dik taka exam turin a chah a ni.

Sunday School kum tawp exam zawhnate hi Headquarters atanga siam niin, Bialtu Pastor kaltlangin Pastor bial Sunday School Secretary hnenah thawn vek a ni a, ram pumah Sunday School Department hrang ang zelin question inang tlang an chhang dawn a ni. Answer paper endik chu Pastor bial Sunday School Committee remruatna angin Bialchhung Kohhran theuhah zirtirtu ruat bik emaw, Bial huap a hmun khata en emaw a ni ang a, Bial Sunday School hruaituten ruahmanna an siam ang.

Kum danga lo tih thin ang thovin kuminah pawh Senior ‘B’ Department leh Senior ‘A’ Department Question chu Pathianni hmasa khan zirlaite hnenah sem chhuah niin in lamah (Zirlaibu leh Bible enin) an chhang a, Exam Ni-ah hian an chhanna an thehlut ang. Hetia in lama zawhna chhan theiha buatsaih hi Senior ‘B’ ah chuan hun rei fu kalpui tawh a ni a, Senior ‘A’ erawh chu kumin hi a vawihnihna a ni. Department dang zawng chuan Sunday School Hall/Biak In-ah exam hi an chhang dawn a ni.