Tunkar Pathianni, June 29, 2014 hi Mizoram baptist Kohhran, Christian Education Department chuan Sunday School kum chanve Exam hun atan a ruat a. Pathianni Chawhma Inkhawm banah Exam hi neih a ni ang. Christian Education Department Director chuan zirlaite thahnem-ngai leh dik taka exam turin a chah a ni.

Sunday School kumchanve Exam Zawhnate hi Headquarters atanga siam lovin Pastor bialin a buatsaih thin a, Answer paper endik pawh Pastor bial remruatna angin Bialchhung Kohhran theuhah zirtirtu ruat bik emaw, Bial huap a hmun khata en emaw a ni ang a, Bial Sunday School hruaituten ruahmanna an siam ang. Senior 'B' Department leh Senior 'A' Department Question chu Pathianni hmasa khan  zirlaite hnenah sem chhuah niin in lamah (Zirlaibu leh Bible enin) an chhang a, Exam Ni-ah hian an chhanna an thehlut ang. Hetia in lama zawhna chhan theiha buatsaih hi Senior 'B' aah chuan hun rei fu kalpui tawh a ni a, Senior 'A' erawh chu kumin atanga tih thar a ni thung. Department dang zawng chuan Sunday School Hall/Biak In-ah exam hi an chhang dawn a ni.