Kar hmasa Inrinni, March ni 6, 2021 khan Serte pastor Bial huap-in Intermediate zirlai Pawl Seminar, BCM Biak In, Serte-ah neih a ni. He Meet-ah hian Intermediate zirlai te bakah Senior ‘A’ zirlai te leh Bial chhunga Kohhran hrang hrang Sunday School zirtirtu leh puipa te pawh an tel a ni.
He Seminar hi Upa C. Zakamlova, Chiarman, Bial Sunday School Committee.-in kaihruaiin Pathian hnena inkawltirna hun a hmang a. Hun serh hman zawh-ah 'Information Technology leh Media hman dan dik', tih thupui hmangin Rev. Dr. Lalzarliana, Communications Director-in,zirtirna pe-in, Rev. ZD Rodingliana, Christian Education Director-in “Intodelh” tih thupui hmangin ziritirna a pe bawk.
Chawhnu lamah Upa Sainghinglova Sailo, Bial Sunday School Vice Chairman-in hunserh a hmang a. “Tunlai khawvela thalaite tibuaitu,” tih thupui hmangin Rev. Sangliankhuma Chinzah, Social Concern Dept. Director-in zirtirna pe-in, Pu Lalruatkima, Administrative Officer-in “Career Guidance” zirtirin, zirna leh hna thawhna tura hmathlir awmze nei leh tangkai te a kawhhmuh bawk. Rev. Dr. C. Lalruatthanga, Bialtu pastor, Serte Bial-in “Nuphung zirna” tih thupui hmangin zirtirna a pe bawk. Upa C. Laizika, Secretary, Bial Sunday School Committee lawmthusawina leh fuihna thuchah tawi sawiin, hun tawp a khar.
Intermediate pual seminar hi Serte Pastor Bial sunday school plan 2020 – 2021bawhzuina leh tihhlawhtlinna a ni a, 2019 - 2020 chhung khan neih tura ruahman peih vek a ni tawh a, Covid-19 avangin ṭhulh a ni. 2020 -2021 ah hian plan-ah dah a ni leh ta a ni.
Serte Bialah hian Kohhran panga, Sertlangpui, Serte, S. Lungdai, Ṭhuampui leh Vanhne te an awm a, Intermediate Seminar-ah hian mi 160 vel an kal khawm a ni.
