Mizoram Baptist Kohhran puipate chuan nimin, October 21, 2015 (Nilaini) khan Serampore College Principal atana ruat thar Upa Dr. Vansanglura chu Kohhran Office, Serkawn-ah lengah sawmin duhsakna thinpui an inpui.
He hunah hian BCM General Secretary chuan Serampore College Principal atana Upa Dr.Vansanglura ruat a ni chu lawmawm a tih thu leh, a kal zelna turah BCM chuan a thawhpui zel dawn a ni tih sawiin, Pathian hruaina a chan zel theih nan duhsakna a hlan a. Upa Dr. Vansanglura pawhin BCM puipaten hetiang hun an siam sak chu lawmawm a tih thu leh thlamuanthlak a tih thu sawiin, tawngtaina nena thawhpui zel turin a sawm bawk.
Serampore College Principal ni mek, Upa Dr. Laltuangliana Khiangte chu kumin October thla hian a term a lo tawp dawn tak avangin a hmun ruak luah khat tur hian Upa Dr.Vansanglura hi ruat a ni a, a ni hian November thla atangin a hna thar hi a zawm dawn a ni.
Tarlana tawh ang khan Dr Vansanglura hi 1965-ah Ngopa khuaah a piang a, Lalhriatpuii, Chhinga Veng nen July 12, 1990-ah inneiin, fa pathum an nei. NEHU aṭangin M.A a zo a, Mizoram University aṭangin Ph.D a zo. Theology lamah degree a nei nual a; kum 1995-ah Serampore College (University) aṭangin Bachelor of Christian Studies a zo a, Therapon University, USA aṭangin Doctor of Theology a zo leh bawk. Teachers College, Columbia University, New York, USA-ah kum 2010-11 chhungin visiting scholar hna a thawk tawh a ni. J.Buana College Lungleiah Associate Professor niin, Bazarveng, Lunglei-ah an chhungkuain an cheng mek a ni.
