Tunkar Pathianni, November 30, 2014 khi Mizoram Baptist Kohhran Nipawimawh “Rualbanlote Ni” a ni a. He Ni hi Mizoram Baptist Kohhran pum-ah Pathinni zing Inkhawm-ah hman a ni ang. Kumin Rualbanlote Ni thupui atan  ‘Riangvaite hnena Chanchin tha”(Lk.4:18) tih chu hman a ni ang a. Hemi Puala Headquarters atanga thuchah buatsaih chu Kohhran tinah chhiar chhuah a ni bawk ang.

Mizoram Baptist Kohhran chuan Rualbanlote Ni hi Kohhran Ni Pawimawh (Special Sunday) ah telh ve ni se tiin kum 2008 Assembly-ah a passed a. kum 2009 atanga hman tan turin Calendar-ah chuan tir a ni ta a ni.  A hun thuah hian khawvel huapa Rualbanlote ni (World Disabled Day), December ni 4 hnaih ber Pathianni a thlir a. December Pathianni hmasa ber hi Bible  Sunday atan kan lo hman tawh avangin November Pathianni hnuhnung ber chu Rualbanlote Ni atan a ruat nghet ta a; chu chu kum 2009 atangin Calendar-ah dah a ni ta a ni.

....................................

“Riangvaite hnenah Chanchin Tha”

(Vawiin - Rualbanlote Ni Thuchah)

Mi thiamte chhût dân chuan Khawvêl mihring za zêla panga hi Rualbanlo an ni a, rualbanlohna hi rilru lam chauh te, taksa leh pianphung chauhva rualbanlohna te, a pahniha rilru lam leh pianphunga rualbanlohnate a awm thei a ni. Rualbanlohna chhan hrang hrang a awm a, nuin nau a pai lai atanga fel lo awm thei atang te, piantirh lai thil awm dân leh naupan laia natna vei atang te, ei tha tlâkchhamna avang te, leh mizovin kan sawi thin angin, ‘Piansualin tlai luat a nei lo’, an lo tih angin, accident chi hrang hrang avângin rualbanlohna a awm thei a ni.

Mizoten rualbanlote kan hmuh dân leh kan ngaihdan hi a tha vak lova, kan inzir a tûl hle. Hnam changkâng apiangin rualbanlote enkawl an thiam a, rualbanlote hi rilru lama banlo an nih chuan finna zirtîr theih an ni a, mi pangngai angin an zir chaklo a nih pawhin anmahni rau rauvah hma an sâwn thei a, an thiamna zir theih ang ang kha anmahni inenkawl nân leh thil tangkai thawhchhuah ve nân an hmang thei a ni. Mizo hian mi ang mang lote kan bâwl khawlo fo va, mi pangngaia chhuah theihte pawh chhûngkua leh khawtlângin kan en dân leh kan enkawl dân avângin mi ang lovah kan chhuah fo niin a lang.

Mi pângngai chen zân lote pawh enkawl thiam chuan mi pangngai ang maia chhuah theih leh mi an chen lohna laite pawh sawitham loh leh pawitham lovin a chhuah theih a, chu chuan mahni tân leh chhûngkaw tan, hnam pumpui tân a tha êm êm a ni, tih hria ila. Pianphunga rualbanlo pawh a tul ang zêla zirtîr leh hmanrua nêna thuamin an rualbanlohna lang lo hialin tanpui theih an ni. Khawvêlah hian rualbanlo ni si mi ropui tak tak an lo chhuak fo tawh a, mitdel, zaithiam leh hla phuahthiam, vawiin thlenga hla ropui ber ber phuahtute, mitdel , khawvêl khawmualpui zawng zawnga tlângsâng berte lâwn chhuak vek thei khawpa chak te,  bengngawng, scientist ropui tak te, fuke kim lo, mi pângngai–in an tihtheih loh thiltithei tam tak sawi tûr an awm a ni.

 Lal Isua khân khawvêla rawng a bâwl lai khân rualbanlote a khawngaihin a ti dam thîn a, Mathaia 10:27, 9:32-34, 15:29-31 te, Marka 7:31-35 te kan en chuan Lal Isuan mitdel, kebai, piangsual tinrêngte, zengte, Ramhuai man (Rilrubuai) a tih dam thute kan hmu a ni. Keini pawhin kan zînga awm rualbanlote hi kan enkawl that a pawimawh a, Kan Lalpa thupêk pawh a ni tih i hre thar leh ang u.

Khawvêl ram changkângte chuan rualbanlote tân inzirnate, School hranpa leh infiamna anmahni pual bîkte siamin zin veivahnaah pawh athlâwna chuan theihna te, an tâna remchânna chi hrang hrang an siamsak thîn a, kan ram pawhin hetiang lamah hian hma kan sâwn ve hret hret a, chak zâwka hma kan lâk zêl pawh a tûl hlê a ni.