Tunkar Pathianni, November 29 hi Mizoram baptist Kohhran Ni Pawimawh (Special Sunday) – “Rualbanlote Ni” a ni a. Hemi ni pual hian Mizoram Baptist Kohhran tinah Pathianni Chawhma Inkhawm hun hman a ni ang. Kumin Rualbanlote Ni thupui-chu “Ka khawngaihna i tan a tawk e” (2 Korinth 12:9) tih a ni. Thuchah sawitu-in thupui thlansa hmang hian thuchah sawi theuh tura beisei an ni a, Tin, Headquarters atanga Hemi ni pual thuchah chhiar chhuah tura buatsaih chu Kohhran tinah chhiar a ni bawk ang.
“Rualbanlote Ni” hi kum 2009 atangin BCM Ni pawimawhte zingah telh a ni a, Kohhran Calendar-ah pawh hemi kum atang hian tarlan a ni. Rualbanlote tanpui hi Lal Isuan rawngbawlna pawimawh tak pakhata a hman a ni a. Baptist Kohhrante pawh Lal Isua rawngbawlna dungzuia kal kan nih avangin Lal Isua rawngbawlna chhunzawmna kawng pawimawh tak anih hriain kum 2008 Assembly chuan kum khat chhunga Pathianni vawi khat Rualbanlote Ni atana serh hran chu awm hlein a hria a, kum 2009 atanga hman tan turin a rel a.
A hun thuah Ni pawimawh dangte nena insu buai lo thei turin Administrative Committee kutah a dah a. Administrative Committee chuan ngun taka thlirin khawvel huapa Rualbanlote ni (World Disabled Day), December ni 4 hnaih ber Pathianni a thlir a. December Pathianni hmasa ber hi Bible Sunday atan kan lo hman tawh avangin November Pathianni hnuhnung ber chu Rualbanlote Ni atan a ruat nghet ta a; chu chu kum 2009 atangin Calendar-ah dah a ni ta a ni.
........................
THUCHAH (Biak Ina chhiarchhuah tur)
Mi thiamte chhut dan chuan khawvela mihring za zela panga hi rualbanlo an ni a, rualban lohna hi taksa leh pianphung leh rilru lama rualban lohna a awm thei a ni. A chhan hrang hrang a awm a, nuin nau apai lai atanga fel lo lo awm atang te, pian hlim/tirh atanga thil lo awmdan atang te, naupan laia natna vei avang te, ei leh in tha tlakchham avangte leh thil dang avangte pawhin a awm thei a. Mizoho chuan, “Piansualin tlai luat a nei lo” kan tih thin angin accident chi hrang hrang avangte leh ruihhlo leh thildang avang pawhin puitling kan nih tawh hnuah pawh a awm thei a ni.
Mizohovin rualbanlote kan en dan leh kan hmuh dan leh an chunga kan rilru put dan hi a tha vak lo va, chuvangin kan inzir thar a ngai a ni. Hnam changkang apiangin rualbanlote enkawl an thiam a, an chunga an rilru put phung pawh a dik a ni. Rilru lama rualbanlote chu finna, rilru lan thanna zirtir theih an awm a, zirtir theih an ni. Mi pangngai angin an zir chak lo a nih pawhin anmahni rau rauvah hma an sawn ve thei a ni. Mizote hian mi ang lo, rualbanlote hi bawl kan ching a, hei hian an dinhmun dawmkan aiin kan tichhe zawk thin a ni tih kan hriat a tul ta hle a ni. Mi pangngai chen lo nia kan ngaihte pawh hi kan enkawl thiam chuan mi pangngai ang maia tangkaina an nei ve thei a ni.
Khawvelah hian rualbanlo ni si, mi ropui tak tak sawi tur an awm teuh a ni. Mitdel zai thiam em em leh music lama mi ropui tak takte pawh an lo awm tawh a, rualbanlo politician ropui tak tak te, scientist ropui tak tak te, zirna lam leh infiamna lama rual pawl tak takte pawh an awm a ni. Chuvangin rualbanlote mi ropui tak tak an awm thei a, kan tu leh fate thleng pawhin an chunga kan rilru put dan tur kan inzirtir a ngai hle.
Lal Isuan he khawvela rawng a bawl lai pawh khan rualbanlote a khawngaihin a tidam thin (cf. Matt 9:32-34; 10:27; Marka 7:31-35) a ni tih i hre nawn leh ang u. Mitdel, kebai, piangsual, zeng leh ramhuai man a tihdam thute pawh bible hian min hrilh teuh a ni. Chuvangin kan thupuiah pawh “Ka khawngaihna i tan a tawk e,” tih kan han thlang a. Pathianin a khawngaih rualbanlote hi kohhranten kan khawngaih a ni tih i lantir ve zel ang u.
