Tunkar Pathianni, November 25,2012 khi BCM Ni pawimawh "Rualbanlote Ni hi BCM Ni" a ni a. He Ni hi BCM pum-ah Pathinni zing Inkhawm-ah hman a ni ang. Kumin Rualbanlote Ni thupui atan ‘Samari mi tha angin”(Lk.10:30-37) tih chu hman a ni ang a. Hemi Puala Headquarters atanga thuchah buatsaih chu Kohhran tinah chhiar chhuah a ni bawk ang.
Mizoram Baptist Kohhran chuan Rualbanlote Ni hi Kohhran Ni Pawimawh (Speacial Sunday) ah telh ve ni se tiin kum 2008 Assembly-ah a passed a. kum 2009 atanga hman tan turin Calendar-ah chuan tir a ni ta a ni. A hun thuah hian khawvel huapa Rualbanlote ni (World Disabled Day), December ni 4 hnaih ber Pathianni a thlir a. December Pathianni hmasa ber hi Bible Sunday atan kan lo hman tawh avangin November Pathianni hnuhnung ber chu Rualbanlote Ni atan a ruat nghet ta a; chu chu kum 2009 atangin Calendar-ah dah a ni ta a ni.
..............................
THUCHAH
Mithiamte chhut dan chuan Khawvel mihring za zela panga hi Rualbanlo an ni a, rual banlohna hi rilru lam chauh te, taksa leh pianphung chauhva rual banlohna te a pahniha rilru lam leh pianphung a rualbanlohna te a awm thei.
Rualbanlohna chhan hrang hrang a awm a, nu in nau a pai lai atanga fello awm thei atang te, pian tirh lai thil awmdan leh naupan laia natna vei atang te, ei tha tlakchhamna avangte, leh mizovin kan sawi thin angin, Piansualin tlai luat a nei lo, an lo tih angin, accident chi hrang hrang avangin rualbanlohna a awm thei a ni.
Mizoten rual banlote kan hmuh dan leh kan ngaihdan hi a tha vak lova, kan inzir a tul hle. Hnam changkang apiangin rualbanlote enkawl an thiam a, rualbanlote hi rilru lama banlo an nih chuan finna zirtir theih an ni a, mi pangngai angin an zir chaklo anih pawhin anmahni rau rauvah hma an sawn thei a, an thiamna zir theih ang ang kha anmahni inenkawl nan leh thil tangkai thawh chhuah ve nan an hmang thei a ni. Mizo hian mi ang manglo te kan bawl khawlo fova, mi pangngai a chhuah theih te pawh chhungkua leh khawtlangin kan en dan leh kan enkawl dan avangin mi ang lovah kan chhuah fo niin a lang.
Mi pangngai chen zan lote pawh enkawl thiam chuan mi pangngai ang maia chhuah theih leh mi an chen lohna laite pawh sawi tham loh leh pawi tham lovin a chhuah theih a, chu chu anmahni tan leh chhungkaw tan, hnam pumpui tan a tha em em a ni, tih hria ila.
Pianphunga rualbanlo pawh a tul ang zela zirtir leh hmanrua nena thuamin an rualbanlohna lang lo hialin tanpui theih an ni. Khawvelah hian rualbanlo ni si mi ropui tak tak an lo chhuak fo tawh a, mitdel, zaithiam leh hla phuah thiam, vawiin ni thlenga hla ropui ber ber phuahtute, mitdel, khawvel khawmualpui zawng zawnga tlangsang berte lawn chhuak vek thei khawpa chak te, bengngawng, scientist ropui takte, fu ke kim lo, mi pangngai –in an tih theih loh thil ti thei tam tak sawi tur an awm a ni.
Lal Isua khan khawvela rawng a bawl lai khan rualbanlote a khawngaihin a ti dam thin a, Mathaia 10:27, 9:32-34, 15:29-31 te, Marka 7:31-35 te kan en chuan Lal Isuan mitdel, kebai, piangsual tinreng te, zeng te, Ramhuai man (Rilru buai) a tihdam thu te kan hmu a ni. Keini pawhin kan zinga awm rualbanlote hi kan enkawl that a pawimawh a, Kan Lalpa thupek pawh a ni tih i hre thar leh ang u.
Khawvel ram changkangte chuan rualbanlote tan inzirna te, School hranpa leh infiamna anmahni pual bikte siamin zin veivahnaah pawh a thlawna chuan theihna te, an tana remchanna chi hrang hrang an siam sak thin a, kan ram pawhin hetiang lamah hian hma kan sawn ve hret hret a, chak zawk a hma kan lak zel pawh a tul hle a ni.
Kan Hospital, Christian Hospital Serkawn pawh Sorkarin rualbanlote enkawlna, District Disability Rehabilitation Centre (DDRC) atan min ruat a, Falkawn a centenary building hnuaiah hmunhma te pawh neiin hma lak a ni a, rualbanlote tanpui theih tur te dap khawmin, an tana thil tul ngaihtuahsak te in bul kan tan a, Sorkar nena thawhhona a nih avangin mahni duh ang anga kal bawrh bawrh theih a ni lova, thil thui tak la ti thei rih lo mah ila hma sawn ve zel kan tum a ni.
