Tunkar Pathianni, November 25 hi Mizoram Baptist Kohhran Ni Pawimawh (Special Sunday) – “Rualbanlote Ni” a ni a. Hemi ni pual hian Mizoram Baptist Kohhran tinah Pathianni zing inkhawmah hun hman a ni ang. Kumin Rualbanlote Ni thupui-chu  “Ka duh e, lo thianghlim tawh ang che (Luka 5:13)  tih a ni a, Thuchah sawitu-in thupui thlansa hmang hian thuchah sawi theuh tura beisei an ni.

BCM Assembly 2008 chuan, “Rualbanlote hi an khawngaihthlakin kan Kohhran hian a ngai pawimawh a ni tih kan lantir nan an pualin Pathian ni hmang ve ila,” tih a ngaihtuah a. Rualbanlote pual hian Pathian ni hun hman nise. Administrative Working Committee-in ruahmanna lo siam se, tih a ni. Administrative Working Committee-in a ruahman angin 2008 atang chuan World Disability Day, December 3 hnaih ber Pathianni, November thla Pathianni hnuhnung ber hi Rualbanlote pual atan kan lo hmang ta a ni.