Rev. Rodinmawia Ralte[/caption] Baptist Church of Mizoram hnuaia Minister thawk lai Rev. Rodinmawia Ralte chuan tha takin Doctor of Theology (D.Th) November ni 27, 2015 khan a pass. Rev. Rodinmawia Ralte hian Serampore College (University) hnuaia sakhaw hrang hrang zirna bik; Religion Department atangin Doctor of Theology hi a pass a ni.
Rev. Rodinmawia'n zirna (research) a neihnaah hian Hindu sakhaw puithiam (Guru) hrang hrang ten Lal Isua an hmuhdan leh an hriatthiam dan lam hawizawngin zirna a bei a, a Research (Thesis) title chu "Select Indian Gurus' Interpretation of Jesus Christ and their significance in inter-religious relations." tih a ni.
Rev. Dr. Rodinmawia Ralte hian Doctor of Theology (D.Th) a zirchhung hian nasa takin a thawk rim a, a zirchhung hian a zirlaipuite leh zirtirtute fak tlakin a zirnaah hian a taima (sincere) a, zirna pawh kum 3 chhung lekin a zo fel vek a ni.
October 2015 khan Serampore College (University) hnuaia Research Department hotuten a Thesis-ah a pass thu an hrilh
Rev. Dr. Rodinmawia Ralte hi kum 1998 khan Baptist Church of Mizoram (BCM) in Pastor hna thawk turin a la a, kum 2001 Assembly khan Minister puitling ni turin a nemnghet (ordain) a, 2003 - 2005 khan Master of Theology (M.Th) zirin Serampore College-ah a awm a, 2005 - 2011 chhung AICS-ah Lecturer hna thawkin a awm leh a, 2011 - 2014 chhungin Doctor of Theology a zir.
Doctor of Theology (D.Th) a zir zawh April 2014 atang khan Bishop's College, Kolkata in BCM hnena an dil angin vawiin ni thlengin Bishop's College, Kolkata-ah Asst. Professor hna a thawk a ni.
Dan angin Doctor of Theology (D.Th) result te hi Council of Serampore College Meeting in a pawm hnuah SERAMPORE COLLEGE CONVOCATION nakum February ni 6, 2016, Andhra Christian Theological College, Hyderabad hmuna neih turah Degree hlanna hi neih a ni ang. Kan kohhran atangin Rev. Dr. R. Lalthanmawia (New Testament) leh Rev. Dr. Rodinmawia Ralte (Religion) ten D.Th Degree an dawng dawn a ni. An pahnih hian kan lawmpuiin kan chhuang takzet zet a ni. Lalpa’n an rawngbawlna zel turah malsawmin awmpui zel rawh se.
Serampore College (University) hnuai atangin heng kan kohhran mite hian Doctor of Theology (D.Th) Degree an pass tawh a ni:
1. Rev. Dr. R. L. Hnuni (Old Testament) – 1996 2. Rev. Dr. Vanlchhawna Khiangte (New Testament) – 2011 3. Rev. Dr. R. Zolawma (Christian Theology) – 2012 4. Rev. Dr. C. Vanlaldika (Old Testament) – 2014 5. Rev. Dr. R. Lalthanmawia (New Testament) – 2015 6. Rev. Dr. Rodinmawia Ralte (Religion) - 2015 Reports - Maruata Lalruatkima
