Mirzoram Baptist Kohhran chuan Rev.Dr.CL Rema, August 3,2016-a thi ta chu Kohhran tan channa nasa tak leh mi uihawm tak a ni tiin, Mizoram Baptist Kohhran nena an thawhhona kal mek leh a rawngbawlna te avanga lawmthu sawiin 'Pathian mi ropui Rev.Dr.CL Rema kan then ta" tiin  amah thlahna thu  hetiang hian a chhuah:-

....................

Pathian Miropui  Rev. Dr. C.L. Rema kan then ta

Pathian rawngbawltu ropui leh Mizoram leh India ram tana mi tangkai leh thawhhlawk em em, Rev. Dr. CL Rema’n August 3, 2016-a Ropuina ram min pan san ta hi, Mizoram Baptist Kohhran chuan a uiin channa nasa takah a ngai a. Kohhran pumpuiin a sun takzet a ni.

Rev. Dr. CL Rema hi IAS Officer a nihna angin India Sorkar hna zahawm leh sang tak tak a chelh lai pawhin Pathian leh A Kohhran tana mi tangkai leh inpe em em a ni a. Chu chu duhtawk mai lovin Full Time-a LALPA rawng bawl turin a hna zahawm tak bansanin North Bank Baptist –ah hotu chan changin hun rei tak rawng a bawl a. Chumi hnu-ah Good News Society dinin Mizoram Baptist Kohhran te nen India hmar chhak-a Muslim te leh Assamese te zingah kum 2011 atangin rawngbawl hna kan thawk ho a. Vawiin thlengin he Mission hi hlawhtling takin a la kal mek a, Thlaraubo tam tak Lal Isua hnenah hruai thlenin an awm reng a ni.

Amah mai pawh ni lovin, rawngbawlnaah hian a fate - Rev. Dr. Rothangliani chu BWA-ah Hotu pawimawh te zingah tel theiin rawngbawlna kawngah leh BWA nena kan indawrtawnna-ah te Mizoram Baptist Kohhran tana mi tangkai leh pawimawh tak a ni bawk a, tin, Dr. Lalnunthangi pawh Living Words Communicator hotu niin, he mission nen pawh hian partnership Agreement neiin rawng kan bawl ho mek bawk. Amah Dr.Lalnungthangi ngei pawh hi kan recognized Missionary ni lai mek a ni.

Rev. Dr. CL Rema leh a chhungte nena kawng hrang hranga Pathian rawng kan bawlho naah hian lawmthu kan sawi a, rawngbawlho zel kan la duh laiin Lalpan a hnena chawl turin a lo hruai ta zawk a ni. Lalpa rawng a lo bawl tawhna zawng zawngah Pathian hmingin lawmthu kan sawi a, a mission pawh hi kan theih ang chin china chhunzawm zel pawh kan kan rilru-ah chuan a awm a ni.

A kalsan tak, a chhungte zawng zawng leh a rawngbawlpui zawng zawngte Lalpa’n thlamuanin awmpui zel rawh se tih hi kan tawngtaina a ni.

‘A Mithianghlimte thihna chu Lalpa ngaih chuan hlu tak a ni’ (Sam 116:15)

Sd/- REV. F. RAMDINMAWIA General Secretary, Baptist Church of Mizoram

.........................................................................

Original file

RevDr CL Rema Sunna(PDF)