Mizoram Baptist Kohhran leh mizote tana sulsutu ropui Rev. Dr. CL Hminga, Serkawn chu Serampore College (University) chuan a hnathawh leh a sulhnu ropui tak avangin Doctor of Divinity (Honorary) an hlan dawn. He degree hi Serampore College Annual Convocation December 7, 2017 a neih turah Rev Dr CL Hminga hnenah hian hlan a ni ang.

Rev Dr CL Hminga hi Baptist Kohhran hruaitu hmasa, Sapho kutchhuak la dam tlemte zing ami, mi rinawm leh mi nghet a ni a, October 4, 2017 khan kum 90-a tlinna champha ropui takin Lungleia amah ngaisangtute leh a chhung leh khat ten an lawm sak a, a sulhnu leh rawngbawlna chanchin te zirhona buatsaih a lo ni tawh a ni.

Hetiang chawimawina ropui leh hlu tak a dawng tur hi kan lawmpuiin kan chhuang  takzet a ni.

...............

REV. DR CL HMINGA CHANCHIN

Rev. Dr. CL. Hminga hi Thanzînga Chhangte leh Thangpuii Haunar fa pahnihna a ni. A pa Pastor atana nemngheh tûra Sêrkâwna a kal hlânin Darzo khuaah October ni 4, 1927-a piang a, ft 5. 4” a sâng a ni. Thufingte 18:10 a innghatin ‘Lalpa hming chu ka kulhpui a ni’ tiin a pa chuan a hmingah Lalhminga tiin a sa ta a ni tih amah hi a hrilh. Kum 1929-ah Chawnhu khuaah an insawn a; Mission Primary School a lo awm a, chu chu a lehkha zir tanna a ni. A lehkha zirnate: 1938 – Primary School, Chawnhu. 1939-1943 – Middle Vernacular (M.V) & Middle English (M.E) Serkawn 1944-1948 – Matric. Govt. H/S. Shillong, G.U Pathian Thu (Theology) zirna: 1949-1955 – B.D., Serampore Theological College 1961-1963 – M.A., Manchester University, UK 1974-1976 – D.Miss., Fuller Seminary, USA. Rawngbawl hna a chelh tawhte: 1955-1956 – Bible Translation, JBS & Teachers Training School teacher, 1958-1961 – Finance Secretary 1963 – Literature Secretary 1964 – Principal, JBS & Kohhran Beng Editor 1964-1967 – Principal, Lunglei College 1968-1971 – ZBM Secretary 1971-1972 – General Secretary 1973-1974 – Bible Translator 1977-1980 – ZBM Secretary 1980-1988 – General Secretary 1988-1989 – Jubilee Bible School Teacher 1995-1996 – President, BCM Mi mal nuna thil thleng pawimawhte:

1. Class III a exam kum hian chhim bialah mi 128 zingah 5-na a ni. Mission scholarship hmuin a zir zawm a, M.V. leh M.E-ah 1-na ve ve a ni. Sorkâr Scholarship leh B.M.S. châwmna hmuin Shillong Govt. High School-ah a zir zawm a, 1948-ah Gauhati University hnuaia Matric Exam hmasa berah telin a pass.
2. Matric Result a chhuah tlai avangin College kal a laklawh a, kum khat Bible translation leh Christian literature hna hmelhriat tûrin Sêrkâwn Mission Office-ah an thawhtîr hnuin Bible translation hna thawk tûra inbuatsaih nân Serampore College-ah B.D. zir tûrin Mission-in an tîr. Kum khat a zir hnuin, “Jubilee fund hmangin kan zirtîr che a, kan hmang zo tawh a, hna thawk tawh mai rawh,” tiin Bible translation hna beitu Pastor senior-te zîngah an teltîr ta a. “Pathian thu pawh ka la zir tak tak lo va, ka bond signed bo chuang lovin, mahni inchâwmin ka zir zawm ang e,” tiin a dîl a, an phalsak a, 1955 kumah B.D. a pass ve ta a ni.
3. 1957 March ni 10-ah Theiriat Biak inah Church Secretary Rev. H.S. Luaian a ordain. Assembly Chairman H.W. Carter-an inkhawm a kaihruai a, Rev. E.G.T. Madge, BMS India Field Secretary-in fuihna thu a sawi.
4. 1961-1963 chhung Manchester University-ah M.A. a zir a, November thlaah zir zovin a lo hawng a, Sâp rama a awm chhûngin nipui chawlh laiin Sunday School & Youth Leadership Training Theological Student te tâna short course, West Hill College, Selly Oak, Birmingham-ah a tel a, Lark Hill, khaw thar, Kohhran la din lohnaah Pastor hna thla hnih chhûng an thawhtîr bawk. A hâwn hmain Ecumenical Institute, Geneva bul, Switzerland-ah Theological Student tân thla khat course an laktîr bawk. Manchester Baptist College-a a awm laiin Pathian ni apiangin Kohhran hrang hrangah thu sawiin an kal thîn.
5. September 1964 – July 1967 thleng Lunglei College Principal hna an thawhtîr a, kum khatna chu part time-in a thawk.
6. 1964 December-ah Lalêngzami Sailo Ngopa lal fanu nen an innei a, fapa 3 leh fanu 1 an nei. A fapate pahnihin kum 35 mi ve vein an thihsan a, an fapa upa ber C.Lalthanpuia(Architect) leh an fanu C. Lalthangmawi(Asso.Professor, JB College) ten nupui/pasal neiin in hrang an chang tawh a ni.
7. 1939-ah Scout a zawm a, Sâp rama a zir laiin a Scout thianpa zârah Baptist Scout Guild Honorary member nihna an pe a; an Conference-ah vawi 3 a tel. International Training Centre, Gilwell Park-ah a senso tumsakin Wood Badge Training ni 10 awhah a tel ve a, Wood Badge pawh a dawng. Bharat Scouts and Guides Assam Sate Council-ah 1967-1972 thleng a awm a, 1972 kuma Mizoram State Concil a lo din atangin member a ni zêl a. Mizoram Sate Council 1977-1997; 2001-2007-ah Vice President SC a ni. Mizoram Bharat Scouts and Guides Council-in 1998-ah Medal of Merit an pe a. National Council-in chawimawina sang Silver Star leh Elephan Star an pe bawk.
8. Mizo Writers Association leh Art & Culture Department tangkawpin November 2, 2005-a THU LEH HLA KUTPUI vawi 10-na Vanapa Hall, Aizâwl-a a buatsaihah Chawimawina Certificate an hlan. Hemi kum vek hian Mizo Who’s Who 2005-ah an telh ve.
9. Vulmawi Award 2008 ah Lifetime Achievement Award hlan a lo ni tawh bawk a, kum 2008 Zoram Ni ah MZP chuan chawimawina an lo hlan tawh bawk a ni.
10. Lunglei Chanchinthar in kum 2015 a CK Cars Lunglei Award an buatsaihah khan Rev Dr CL Hminga hnenah hian LEITLANG NOPUI kan lo hlan tawh bawk a ni.

Rawngbawlna kawnga thil thleng pawimawhte:

1. 1955 May- 1958 chhung Bible translation hna a thawk a, Jubilee Bible School-ah leh Teachers Training School-ah a zirtîr pah bawk a.
2. Kohhran ngenna avangin 1958 -1961 July chhung full time-in Finance Secretary hna a thawk.
3. 1963 November atangin Literature Secretary hna a thawk a, 1964-ah Bible School Principal hna leh Kohhran Beng Editor hna an kawp.
4. 1968 February atanga 1971 June thleng Z.B.M. Secretary full time-in a thawk.
5. June 1971 – March 1975 chhung General Secretary hna chelh tur a ni a, mahse 1973-1974 August chhungin full time Bible translation hna an thawhtîr leh ta zâwk a. August 1976 atangin Literature Secretary hna a chelh a; April 1977 – March 1980 thleng ZBM Secretary hna a thawk.
6. April 1980 atanga General Secretary hna thawkin, he hna atang hian April 1988-ah a pension. Pension hnuin part time-in kum 1 Bible School-ah a zirtir.
7. Pension-a a kal hnuah 1989–1993 chhung Mc Gavran Istitute Co-ordinator and Lecturer for N.E. India a thawk a. 1994 kuma Mizoram Gospel Centenary lawmna buatsaihin kum khat hun a hmang. April 1995 – March 1996 chhungin BCM full time President hna a thawk a. June 1996 – De cember 1999 chhung Calcutta-ah Carey Centre for Post-graduate Theological Studies Director hna a thawk leh bawk.

A lehkhabu ziak published-te:

1. Mizoram Chhim Biala Thawk tawh B.M.S. Missionary-te Chanchin (1978)
2. The Life and Witness of the Churches in Mizoram (1987)
3. William Carey Chanchin (1993)
4. Mizoram Baptist Kohhran Chanchin (2003)

Publish lohte :

1. Spirit in the New Testament and the Relevance of the New Testament View for the Christian Church in Lushai Hills. Serampore College B.D. Thesis (1955)
2. Christianity and the Lushai People. Manchester University M.A.Thesis (1963)
3. Chanchin Tha Johana ziak Hrilhfiahna. Sunday School zirtûr (Cyclo-print)
4. General Epistles Hrilhfiahna, Sunday School zir tûr (Cyclo-print).

Paper leh articles Lehkhabu leh Chanchinbua chhuah te, Souvenir bua chhuahte tam tak a awm, sawi sen a ni lo. A rawngbawl hun chhunga khawvêl huap (International) Conference etc. a a telnate:

1. Baptist World Alliance Congress – (1) Stockholm (Sweden) 1975. (2) Los-Angeles (USA) 1985. (3) Seoul, Korea 1990. (4) Melbourne (Australia) 2000. (5) Birmingham (England) 2005. (6) Honolulu, Hawaii (USA) 2010.
2. (1) Congress on Evangelism, Asia and Pacific – Singapore 1968. (2) International Congress on World Evangelization, Lausanne Switzerland 1974. (3) International Consultation on World Evangelization-Pattaya Thailand 1980. (4) International Conference on the Church and its Mission – Wheaton U.S.A. 1983. Case Study Paper ka thawh ve. (5) Global Consultation on World Evangelization – Seoul Korea 1995.

Hêngah te hian Kohhran sum sêng lovin a kal thei thîn a, a lâwm hle. A zirna te pawh Kohhran sum sêng lo deuh vekin a zir a ni. Para-Church leh Christian Organization danga a inhman nate:

1. Vice President, Bible Society of India, Assam Auxiliary 1957-1958.
2. Vice President, Bible Society of India, N.E.India Auxiliary 1973-1974
3. Vice President, Bible Society of India, Aizâwl Auxiliary 1983-1991
4. Vice President, N.E.I.C.C. 1977-1978
5. President, N.E.I.C.C. 1979 & 1980
6. President, Council of Baptist Churches inNorthern Indian 1972-1974; 1977-1979
7. General Council Member, B.W.A. 1975-1988;1995-2005
8. Executive Committee Member, Asian BaptistFederation 1980-1988
9. Member, N.E.India Advisory Board of Far East Broadcasting Association 1984-1988
10. Chairman, District Level Committee, Church’s Auxiliary for Social Action (CASA) 1989-1996
11. President, Lunglei IMCA 1994-1996

Peace Mission-a a thawh dan: Mizoram a lo buai khân Rev.H.S.Luaia nên PEACE MISSION-in Aizâwl-ah Kohhranin an tîr a. Mizoram D.C., Mr.T.S. Gill leh Saipai hotute an biakna avângin Lunglei khawpui chu chhiatna nasa tak lakah a him a. Indian Security Forces leh Mizo National Army-ten mipuite harsatna an siamsak loh nân, mipui thlavâng hauh tûrin Lungei Citizens Committee din a ni a. Secretary-ah a tang a. Mizoram Baptist Kohhran leh Mizoram Presbyterian Kohhran tang dunin PEACE COMMITTEE member 7 nei an din a, chungte chu: Presbyterian Kohhran atangin member 4- Rev. Zairema, Rev. Lalngûrauva, Rev. C.Pazâwna leh Rev. Lalsâwma te an ni a, Baptist Kohhran atangin Rev. Dr. H.S. Luaia, Rev. Dr. CL. Hminga leh Rev. Dr. KT. Chungnunga te an ni. Committee hian remna siam tumin theihtâwpin hma a la a. India Sorkâr leh M.N.F ten inrem thei lova inbiakna an tihtâwp hnuin Peace Committee hian inbe leh hram tûrin a ngên a. Kohhran mipuiten nasa takin tawngtaiin tan an la bawk a, inbe lehin thuthlung, Peace Accord an sign thei ta a ni. Rev. Dr. CL. Hminga hian ama insawi danin hna vawikhat mah a dîl lo va, mahse Pathianin khawngaih rawngbâwl hna chi hrang hrang a thawhtîr hi vânnei a intiin a lâwm êm êm a ni. A rawngbâwl chhûng hian a thawhpuite nên lungrual leh hlim takin an thawk thei a, Pathian khawngaihna ropui niin a ngaia a lâwm êm êm a ni. Tun thlengin Tualchhûng Kohhran Committee leh Tualchhung/ Bial leh Lunglei khawchhunga Kohhran thiltih hrang hrangah te, Para Church rawngbawlnaah te a phak tawkin a la tel ve reng a, ; article leh Sermon pawh a la ziakin Pulpit rawngbawlna pawh a la thawk ve zel a ni. “Hetianga khawngaih rawngbâwl hna thawh tûr min pe a, thawk theia min siamtu Lalpa chu fakin awm rawh se”. a ti a ni.